錫住任影
結婚當日商天娥與老公李偉誠任影唔嬲，傍晚時分仲俾記者入場內影切蛋糕。身穿金色低胸晚裝的娥姐狂晒事業線，豐滿上圍迫爆晚裝。"
娛樂頂點
47歲商天娥結婚唔生仔 奶奶狂呻冇孫抱
2010年10月08日
47歲的商天娥，經歷多次情海翻波終修成正果，與拍拖 4年從事燈飾生意的男友李偉誠（ Patrick）拉埋天窗，於周日（ 3日）在灣仔君悅酒店筵開 43席。當晚群星雲集，就連劉嘉玲與吳君如呢對死敵，都俾面同場出現。
為做個省鏡新娘，商天娥激減 25磅，結婚當日拖實老公，四萬咁口，幸福滿瀉。老公錫到燶，但老爺奶奶對娥姐呢位高齡新抱就唔多滿意，因為老公李偉誠係長子，娥姐講到明唔會生仔，奶奶自然唔 like，仲不時向身旁朋友狂呻冇孫抱，認真濕滯。
互動片段
直擊商天娥結婚
商天娥拖老公唱情歌
商天娥婚宴星光熠熠
商天娥本周日（ 3日）大婚之喜，老公李偉誠早誠早上 10時帶班戥穿石到灣仔君悅接新娘，接到新娘後兄弟姊妹團一齊坐花車去金紫荊廣場行大運，適逢十一黃金周，娥姐被大批自由行重重包圍拍照，場面一度混亂。有指當時娥姐為解圍亂咁噏：「我有 BB！小心呀！」不過已達 47歲高齡的她，事實上與老公已達成共識唔要 BB，仲因為咁令老爺奶奶有微言㖭！
本周日（ 3日）商天娥與老公李偉誠的婚宴玩到凌晨兩點先散席，老爺奶奶由細仔李偉信陪同下離開君悅酒店，記者上前問兩老恨唔恨抱孫，奶奶即拒絕回應快步上的士（右圖）。
接新娘行大運
周日（ 3日）早上 10時，新郎哥李偉誠手揸大紅玫瑰花球到達君悅酒店，仲第一時間叫班戥穿石布置花車。
經過一小時玩新郎及斟茶儀式，李偉誠終於接到娥姐。娥姐見到現場約 20位傳媒，開心到四萬咁口，仲同老公不停向記者揮手。
按照中國習俗，接新娘後如果唔去男家，一對新人就要乘車兜個圈當行大運。眾人去到金紫荊廣場，影咗一輪合照就離開。
花車過千萬
新郎李偉誠的花車隊價值過千萬，花車由灣仔君悅出發，兜去中環再返灣仔金紫荊廣場，非常有氣勢。
嘉玲君如互當透明
劉嘉玲一身黑色低胸晚裝艷壓全場，甫落車即被在場半百記者包圍。對於娥姐讀訓練班時曾暗戀一男同學，嘉玲笑住話唔知係邊個，其後娥姐自認曾暗戀杜琪峯。
吳君如遲過劉嘉玲到達婚宴， Deep V露深坑的君如被記者追問知唔知會同劉嘉玲同場，佢好冷淡咁話：「我唔知喎！」
望長子傳宗接代
娥姐向來唔鍾意小朋友，年前拍無綫劇《翡翠明珠》時，更傳出惡對劇中小演員譚真一，試問佢又點會想生 BB。據知 05年李偉誠與娥姐拍拖不久，便認定對方是終生伴侶，並帶她回家見家長，但兩老卻嫌娥姐年紀大。知情者說：「 Patrick父母知道娥姐大佢個仔幾年，初初好反對佢哋拍拖。老人家始終思想唔同，加上 Patrick係家中長子，當然想個仔可以搵個老婆幫佢傳宗接代。每次講生仔，娥姐就講到明唔會生。再加上娥姐份人好直，講嘢有時冇尾音又倔，老人家覺得佢唔識尊重，所以關係一直都麻麻。」
不過李偉誠未有理會父母反對，拍拖不久便與娥姐同居，去年 7月更向娥姐求婚成功，而兩老知道兒子非卿不娶，亦惟有接受現實。知情人士透露：「 Patrick求婚後，兩老對娥姐嘅態度亦有好轉。不過佢哋始終都恨抱孫，有時出去飲早茶見到啲街坊有孫湊，佢哋都會唔開心，仲不時向人呻話娥姐年紀大唔肯生。不過仔大仔世界，佢哋都冇辦法。 Patrick夾喺中間，當然好難做，佢咪安慰兩老話傳宗接代嘅責任交俾細佬做囉！」
奶奶黑面唔回應
娥姐擺酒當晚玩到凌晨兩點先散席，老爺奶奶亦留守至最後才離開。記者上前問老爺奶奶滿唔滿意娥姐呢個新抱，只有老爺笑住答：「滿意、滿意。」記者再問兩老是否恨抱孫，奶奶即黑面拒回應，仲一手推老爺上的士。其後記者致電娥姐問有關老爺奶奶恨抱孫一事，但娥姐接電話後未聽提問便說：「我依家唔喺香港，有咩嘢等我返來再講。」
華倩左右做人難
周日（ 3日）晚娥姐擺酒星光熠熠，就連唔妥到出面的劉嘉玲與吳君如亦俾面同場到賀。當晚就像第 12期無綫電視藝員訓練班聚會一樣，同期畢業的娥姐、曾華倩、劉嘉玲及吳君如本來感情要好，不過嘉玲與君如近年交惡，難為了整晚做和事佬的曾華倩。據知情人士透露：「當晚嘉玲到先，君如後到，原本安排佢哋同枱，後來君如自己坐咗去第二張枱，嘉玲就同過氣情敵華倩孖住坐。場面都幾僵 o架，不過華倩好識做，仲企圖做和事佬，拉埋佢兩個合照，但每次都係華倩夾喺中間。始終成餐飯都唔見佢哋有傾偈，就連眼神交流都冇。」
有咁多圈中老朋友俾面，令娥姐非常高興，曾志偉更帶領第 12期訓練班畢業的藝人衝上台祝福她，志偉即興唱了首〈 Unchained Melody〉，搞到娥姐眼濕濕。講到最感人的一幕，當然是李偉誠大唱黎明金曲〈愛比我重要〉俾老婆聽，娥姐邊聽邊感動到喊。
李偉誠為娥姐，豪花過百萬搞婚禮，不過有傳婚宴有李偉誠契姐包底，所以一定唔會蝕。娥姐婚前既要為新劇《翻叮一族》做宣傳，也要為籌備婚禮奔波，難得結婚當天仍明艷照人。雖然唔生 BB令老爺奶奶感遺憾，但娥姐向來大情大性，一於好少理，堅持與老公過二人世界。
志偉醉酒又抽水
向來人出酒佢出命的曾志偉，呢晚離開時亦明顯飲大咗，捉住女友人又攬又錫。
如藝訓班聚會
曾華倩將娥姐結婚的照片擺晒上微博，其中一張係華倩坐中間，隔開吳君如同劉嘉玲，與同是第 12期訓練班出身的吳啟華、劉青雲及陶大宇合照。
君如搞氣氛
當晚華倩同君如帶頭上台搞搞震，祝賀娥姐（右一）時更大講爛 gag，為婚宴添不少氣氛。
鄧梓峰伸脷賀娥姐
娥姐擺酒當晚，唔少圈中人都即場將照片擺上微博，吳家樂就放咗一張合成照，除咗有蔡一傑同梅小惠合照，仲有鄧梓峰鬼馬伸脷相。
雙下巴唔見咗
娥姐多年來身形都係珠圓玉潤，故有「肥娥」稱號。 08年時娥姐重達 160磅，雙下巴非常明顯。近月娥姐為結婚減肥，冇咗 25磅肥肉，雙下巴冇咗，不過身形都係咁豐滿。
娥姐婚前轉性
向來拍戲俾對手投訴脾氣差的娥姐，婚前心情非常靚。娥姐除了要出席新劇《翻叮一族》的宣傳活動外，仲要忙住去扮靚。雖然連日被記者追訪，但她全程笑住任影唔嬲，非常合作。
朋友送賀禮
上周四（ 9月 30日下午，娥姐出席完《翻叮一族》的宣傳活動，之後再到尖沙嘴拿朋友送給她的結婚禮物（圈）。
之後娥姐再到銅鑼灣髮型屋整頭，離開時大堂保安員祝賀娥姐新婚快樂，娥姐笑得好開心。
騷 Gel甲
上周五（ 1日），娥姐又去銅鑼灣樓上舖整$188的 Gel甲，整完落樓明知有記者在場，娥姐亦識做到攤開手指任影。
47歲商天娥結婚拒生子 男方父母抱怨無孫抱
47歲商天娥與男友李偉誠修成正果終于十一期間結婚
47歲的商天娥經曆多次情海翻波終于修成正果，與拍拖4年從事燈飾生意的男友李偉誠(Patrick)結婚，與10月3日在灣仔君悅酒店筵開43席。當晚群星雲集，就連吳君如與劉嘉玲這對死敵都給面子同場出現。
商天娥結婚當日幸福滿瀉，老公疼愛，但男方父母對商天娥這對高齡媳婦就不是很滿意，因爲老公李偉誠是長子，商天娥也表明不會生子，奶奶自然不喜歡，還不時向身邊朋友埋怨沒有孫子抱，十分不滿。
留言列表
