FBI

TVB好齊人　大食翠如 BB黐大件男開餐

好多讀者都羨慕 FBI可以成日撞到明星，行中環 ifc呢類名店林立嘅商場固然有機會，但查實最多星嘅地方一定非電視城莫屬，不過當然要有入台證先得啦。

 


翠如 BB孖實大件幕後等一行 3人去 canteen食 tea，其間翠如 BB只顧住低頭猛食，冇乜答嗲。估唔到佢人仔瘦瘦都咁大食喎！ 

上星期五，台慶亮燈當晚， FBI就提早入咗電視城，見未夠鐘，咪走去 canteen同西餐廳度食吓 tea，順便𥄫吓星啦。由於呢日係亮燈，所以 TVB吹雞叫咗唔少一哥一姐返嚟影大合照，另外有啲冇份出席亮燈儀式，都返咗廠拍定節目巡禮短片同試造型。 FBI喺 canteen坐咗冇耐，就撞見為新劇《陪着你走》拍節目巡禮嘅黃翠如孖住「大件」男幕後食 tea， FBI發現男幕後一路講，翠如 BB就只顧垂低頭猛咁食，好似幾日都冇食飯勁肚餓咁款。當 FBI食飽飽準備走，又發現一班《愛．回家》演員喺度溫馨開餐。行到去 canteen門外仲撞見林峯，當時林公子同傍實佢嗰幾位工作人員講：「大家想飲乜嘢食乜嘢，我請……」點知林公子未萬歲，已被工作人員叫停：「唔好食住喇，落去化妝先啦！」呢啲幕後花絮，分分鐘好睇過 TVB啲劇㗎。

峯哥萬歲

好耐冇喺 TVB出現嘅峯哥，呢日返廠為同阿佘孭飛嘅《使徒行者》拍巡禮短片，未開工已經話要請班幕後食 tea，認真識撈。

潔瑩戙腳

《 M Club》呢日開廠景，埋位前 FBI就撞到袁潔瑩同張慧儀同幕後吹水，講講吓袁潔瑩仲戙起腳，真情流露喎。

安琪母女搶食

喺 canteen亦發現《巨輪》嘅貝安琪同媽咪劉香萍開餐，其間安琪食食吓麵，佢媽咪就夾埋佢嗰份食添，感情睇嚟幾好喎。

《愛．回家》溫馨

《愛．回家》一班演員喺幕前夠團結，估唔到幕後都幾溫馨，放飯都係一班人一齊食飯。


撰文、攝影： FBI

arrow
arrow
    全站熱搜

    tvb4life 發表在 痞客邦 留言(0) 人氣()

    E-mail轉寄