3D片花師奶都要凸　 3D 派對公然搶錢 @ 明星靚相大分享☆

自《阿凡達》港票房破億，立體電影即如雨後春筍，哪怕見慣扁撻撻的花師奶都加入 3D激凸戰團！到底是劇情所需？還是只為吸引觀眾而勉強加插進去的噱頭？鹹魚青菜各有所好，以前不看 3D的話尚有普通版，如今連普通版都變罕有，是時候想想， 3D熱潮有否剝削觀眾選擇。記者：蔡俊業攝影：周旭文、梁細權

3D片一年多一倍放大圖片
■自去年起，戲院已停止免費供應 3D眼鏡，觀眾要自行購買，如 UA及百老匯院線售每副$6，環保之餘亦令戲院開拓多一門商機。

■自去年起，戲院已停止免費供應 3D眼鏡，觀眾要自行購買，如 UA及百老匯院線售每副$6，環保之餘亦令戲院開拓多一門商機。

動筆前先報定案， 3D電影從來不是我杯茶，皆因入場睇戲劇場為先、畫面為輔，妹仔大過主人婆未必有好下場。像看《愛麗絲夢遊仙境》，畫面拂來拂去似催眠咒語結果瞓着；又試過花 80蚊買飛幫襯《舞出真我 3D》，雖見演員渾身是勁、水花四濺，但三維技術無法突出此重點，感覺搵笨，往後便極少看 3D。話雖如此， 3D叫座力依然，觀乎過去一段時間，電影公司照舊製作，各大院商照例上映， 3D熱潮方興未艾，卻越來越濫，就連《我們這一家》的花師奶都要標榜有三維，在上周公映的劇場版《我們這一家 3D：超能力花師奶！》變身 3D女超人，片長僅 50分鐘收$35，以為好抵？按 100至 120分鐘的電影長度比例作計算，實收$70，貴爆！「我都唔明，同事都話花師奶扁撻撻有咩 3D？好搞笑！」娛藝（ UA）院線副總經理黃韋琪（ Vicky）直言，現在的 3D電影確實過濫，她以數據佐證， 2009開始 3D電影暴增，「當年有 15套上映，去到 2010年已經 28套， 2011年截至現時為止已有 34套，但有可能唔止，你都知有時本來有啲戲唔係 3D都變咗係！」

院商剝削觀眾選擇權

Vicky大唱反調令人訝異，「我唔知其他行內人點睇，可能今次我咁講俾人鬧都唔定！」她認為 3D戲越來越多，對於戲院確實或會帶來反效果，譬如剛過去的聖誕新年檔期，差不多所有戲都是 3D，「《小人國大歷險》、《魔幻王國：黎明行者號》等，總之有得睇就係 3D，變咗我覺得當觀眾消費時，係唔係真係套套都可以 afford得起？再加上如果有啲戲真係唔係效果咁好時，慢慢就會厭倦，影響入場意欲。」但是 3D版賺錢，卻令到普通 35mm版本變得罕有，年卅晚上映的《青蜂俠》，全線 UA院線都播 3D版，反而非主要競爭對手百老匯院線仍在部份戲院放映普通版。 Vicky說去年狂收九千萬票房的《反斗奇兵 3》本身都有普通菲林版，但力谷 3D版當然是看錢份上，「畢竟係一門生意，我哋有 3D設備喺度點解唔做 3D呢？其實放映的 house咁有限，而大時大節又會好多 3D戲上映，好似農曆年成七、八套戲上，你一定會揀個有最高收入保證的！」那是否承認現時觀眾選擇少？「我覺得呢個 moment係，但我自己或者其他行家都會考慮，就係慢慢畀番選擇觀眾。在同一檔期許可的情況下播普通版，好似有啲卡通片咁，老實講，小朋友睇得多 3D都唔好啦！」而她說的時間，是在不太多大片上映的淡季檔期。

放大圖片
■ UA院線副總經理黃韋琪 Vicky

■ UA院線副總經理黃韋琪 Vicky

放大圖片
■ Vicky初以為《死神來了 4》 3D有得做，豈料只得數百萬票房，「證明市民係識得揀！」

■ Vicky初以為《死神來了 4》 3D有得做，豈料只得數百萬票房，「證明市民係識得揀！」

導演刻意 3D阻吸收故事放大圖片
■ 1954年上映的《黑湖妖潭》是全球最早期出現的 3D電影之一。

■ 1954年上映的《黑湖妖潭》是全球最早期出現的 3D電影之一。

面對 3D電影氾濫，《打擂台》的導演之一鄭思傑謂，「家已經唔係咁多人踴躍入場睇戲，仲有咩方法可以成為一種噱頭？ 3D喺屋企未必睇到，你要入戲院睇，我覺得係生意上的計算！」到底是電影公司自製市場效應，還是真有市場？他說這是自由經濟帶來的必然結果，若然第一套 3D成績差就不會再有，「好似當年的《薰衣草》標榜 4D，播映時有埋薰衣草香味，但呢樣嘢到家已經無咗，就證明市場唔接受！」以創作人角度出發，他認為 3D戲切忌為 3D而 3D，言即要將 3D技術與劇本融為一體。他以《阿凡達》作例：「因為係虛構世界，同埋佢哋特技做得好好，成件事都是電腦的 animation， 3D創造出前後景同埋立體感，令觀眾置身其中。雖然睇兩個幾鐘係攰，但我唔介意 enjoy成個 experience。記得上次睇《史力加萬歲萬萬歲》時睇 3D，會覺得好似好專登，阻止我去睇本身個故事，無融入到整件事，咁我就情願去睇普通版。」

放大圖片
■《打擂台》導演之一鄭思傑

■《打擂台》導演之一鄭思傑

放大圖片
■鄭思傑說，《薰衣草》 11年前上映時曾推出氣味電影，但之後同類電影無以為繼。

■鄭思傑說，《薰衣草》 11年前上映時曾推出氣味電影，但之後同類電影無以為繼。

影評人只想快點離場！

影評人皮亞對於 3D電影不以為然，當大家睇 3D版《阿凡達》嘆為觀止時，他卻情願快點散場，「睇到我對眼好攰，真係睇到一半頂唔住要除咗副立體眼鏡對住幾重影像夾硬睇埋佢！」他認為戲院面對 3D電影不是沒有選擇，「荷李活片一定有 3D同普通版畀佢哋揀，所以家絕對係戲院焗觀眾要睇 3D版！」另一資深影評人黃國兆剛在上周末的《蘋影話》專欄中寫道：「潮流興 3D，尤其荷李活，甚麼題材都嘗試用 3D來包裝！以我所看的一場 3D《青蜂俠》， 3D的弊端顯露無遺，畫面灰暗，反差不足（光位不光，暗位不夠黑）。動作場面以傳統的短促鏡頭和急遽剪接呈現，更凸顯了 3D的無所作為。我相信同一影片的 IMAX 3D貴價版好不到哪裏，之前《創．戰紀 3D》給我的信心又再喪失殆盡。我以後都係睇番菲林版本算嘞。」

放大圖片
■影評人皮亞