雷凱欣原來已經廿七歲。

遙想從前十七歲卜卜脆，中學剛畢業便入娛樂圈，在有線YMC台做VJ，轉頭又組成三人女子組合3G，繼而再與黃榕拍住上行性感搵銀。輕輕鬆鬆就差不多十年，知名度從來一般，永遠讓人記得的，還是只得那F cup的驕人上圍。「我喺香港買唔到bra，因為香港女仔冇我咁嘅size！」雷凱欣曾經如是說。

一直在娛樂圈半紅不黑地行性感，早兩年o靚模橫行書展之際，甚至已經銷聲匿迹轉行做sales。時來運轉，還是靠那據說會以3D效果，「迫爆大銀幕」的36F咪咪。

「都不是第一次拍三級片了（N年前拍過一套《禁室培慾》），接之前其實諗咗好耐，亦都有拒絕過，最後都係決定接，皆因打定主意，若果今次拍完都唔紅的話，就真係退出娛樂圈，為演藝事業畫上句號。」盡地一煲只望絕處逢生，自然理直氣壯。就算要面對部分衛道之士和口痕網友的各種言詞攻擊，更有人說她「好cheap」。「話我cheap？你班友有本事就唔好睇！」這位賣F者言。

以此為榮

「賣F者言」，其實也是我2004年時訪問雷凱欣的標題，相隔七年仍然用得番，皆因其賣點始終冇變過，只是今日的「小欣子」確實比從前成熟很多，也可以說是「襟撈」了很多。

她自己也還記得當時的情景。

「我記得你，當年係去荒山野嶺小溪影相，仲要我着件LV泳衣，但唔啱size嗰次吖嘛！」

我承認，當年件泳衣係特登細一個碼，想當然地希望能夠更「突出」她的賣點。只不過當時的她，行性感還是處於欲拒還迎的階段，拍攝全程面黑黑，差一點就「罷工」收場。

沒有了當年的稚嫩，這次拍攝過程雷凱欣絕對是自動波，由表情到動作pose，似乎都正好在說明，今時今日的她，終於明白自己的賣點，也願意以此為榮。

戲名是《肉蒲團》，戲服見多啲肉都係好應該嘅，至少雷凱欣着得夠出眾吖。

「我2000年叫做正式入行，當時年紀小，根本不明白自己想要甚麼，加上性格硬頸、主觀，自己覺得好就做，唔鍾意的話就唔做。」

雷凱欣說以前之所以唔想行性感，係因為一直覺得自己好肥、好樣衰。

「直到依家真正大個女了，才知道甚麼是工作，亦會分清楚幾時係工作，幾時係日常生活，所以現在有工作我就一定『拼老命』，好似《肉蒲團》件戲服設計真係好大膽，換轉係以前，我一定死都唔肯着。」

就算她上網見到有人話佢「好cheap」，都係「睇完咪算囉！」。

「以前會唔開心，現在聽過有人背住我講：『拍《肉蒲團》好風光咩？晒命呀？』家陣都睇到化晒啦！你班友有本事就唔好睇！」

唔紅退休

其實雷凱欣的星途從來不算順遂，從有線YMC執笠、到3G組合無疾而終、再發展到與黃榕合組性感Twins，甚至拍了第一套三級片，總是要不時面對冇工開、發吽的日子。

「試過三次同自己講，退出娛樂圈啦！阿媽都曾經同我講，你不如搵份正正經經工，搵幾多冇所謂，好過日日喺屋企啦！最後都係唔死心，有人搵番我做騷咪『復出』囉！」

雷凱欣說頭兩次長期「失業」時，都係幫朋友手睇舖賣衫，直到2009年，真係覺得長此下去唔得喇，至打定主意搵份長工。

中環的D-mop做sales，當時根本冇人特別留意我，其他同事都只係當我普通人，甚至有些人由頭到尾都唔知我做過明星，當時根本已經放棄了做娛樂圈。」

雷凱欣自言，當時見到很多有錢闊太小姐可以日日行街shopping，才開始明白原來搵錢真係「幾重要」。

「我每月家用都要畀一萬，屋企間屋仲供緊，細佬又讀緊書，做娛樂圈工作始終搵錢多，出一個騷可能已經係我月薪三倍，行性感有時仲多好多，好難抗拒喎！」

正值此時蕭定一找她拍攝《肉蒲團》，考慮過後，還是覺得可以再博一鋪。

「初頭唔想接，前後推咗阿一兩次，後來佢哋不斷改劇本遷就我，諗完一輪，兼且睇完劇本覺得好似好好玩，做一個陰陽人，之前未試過，應該可以有發揮，把心一橫決定接拍，拍完都唔紅的話，就真係退出娛樂圈，搵份工嫁人囉！」

一打老公

猶記得多年前的訪問中，雷凱欣的人生終極目標，就是要結婚生仔做賢妻良母，聽落好似「無乜大志」，但其實又對做明星從不死心，三級片都拍，不怕他日後悔嫁唔到好老公咩？

「我從來不會後悔，事業只可以衰在自己手，我絕不會聽人講，自己覺得正確就做，瓜咗都係自己事。就算爸爸媽媽聽我講話拍三級片，都從來冇反對，其他人有乜資格出聲？」

至於脫星可能嫁唔到好老公，雷凱欣亦向來毫不擔心，並誇口說：

「我大把人追，可以做老公嘅name list有一打以上，不過我就一定嫁唔到入豪門喇，門不當戶不對啦！不過我想生孖仔，老公當然要養得起我同仔啦！」

只待緣份到，隨時可以閃電嫁人甚至隨夫移民。

拍過五次拖，現在所有前度都成為好朋友，至於何謂緣份到，最重要都係講feel，性反而是其次。

「雖然性係好重要！食色性也嘛！就等如一日三餐咁係必需的，我要有feel，呢樣緊要過所有性技巧，但有愛先至有性，呢樣嘢我好堅持，所以我每一次做都感覺好正！」

大膽敢言，其實也是深諳宣傳之道。

「成日畀人話我胸大無腦，依家就係要證明我唔係！」

之不過拍得《肉蒲團》，雷凱欣又可知蒲團究竟是甚麼呢？

「吓！我唔知喎！」

我無言。

蒲團其實是神像前一個圓形的咕o臣，讓善信跪下拜神，由於古時是用蒲草編成，所以叫蒲團。

雷凱欣身上有三個紋身，唇紋身，希望提醒自己可以愛自己多一點，2009年生日當天紋的。S字係代表sexy，因為對自己好大意義，最後一個純係自己個名。

面不改容

訪問雷凱欣最多人問的問題，除了關乎「性」之外，應該是到底她有否隆過胸？有否整個容？

多年來她的上圍一直如此偉大，雖然我冇「親手驗證」的機會，但「看」來不假。

只是她的容貌就絕對是翻天覆地的大改變，從前闊面扁鼻，變成今日尖面高鼻，就算佢話冇整過，相信都無人會信。

「瘦面係打botox，鼻樑打透明膠，的確係有人工整過。」

另一個最重要的問題，是到底雷凱欣在《3D肉蒲團之極樂寶鑑》中，出賣了多少色相？作為男性消費者，在買飛入場前我絕對需要知道，究竟「有幾多嘢睇先？」

皆因從來港產三級片，都是請來日本AV露點肉搏，港產女星到最後可能還是「乜都冇露過」，就如經典葉子楣，便曾自豪地聲稱拍過這麼多三級片，但卻從來沒有真正露過點。

「唔講你聽，你入場睇咪知道囉！」

說時真的面不改容。

2002年成為女子組合3G其中一員，個樣同依家有幾大分別？大家自己看個究竟。