衞蘭：除了神，我最信任 Leon－明星靚相大分享☆

狀態大勇的衞蘭（Janice），獲老闆黎明力捧，十月將再踏紅館舞台舉行演唱會，積極備戰的Janice，跟神秘師妹JW合唱《男人信什麼》，而Janice這個女人最信任就是Leon，她也深受Leon影響。

Janice對現時的生活感到平安又喜樂，與以前大不同。

百分百‧信任

Janice是黎明（Leon）力捧的愛將之一，兩人關係早已昇華到像家人般親厚，伊人覺得Leon對旗下所有藝人都一視同仁，絕不會偏私，她以一家人形容彼此關係，亦對Leon投以百分百信任票，她說：「初初都有當Leon係老闆，但呢個感覺好快消失，大家有共同理念，公司上下成組人親如兄弟姊妹，佢撐我哋，我哋都撐佢。」

給「哥哥」的愛

Janice跟未曝光的神秘師妹JW合唱《男人信什麼》，Janice笑言：「除了神，我最信任Leon。」在Janice眼中Leon非常尊重旗下每個歌手藝人，她說：「我好欣賞Leon，好相信佢，就好似哥哥咁愛佢！佢睇嘢睇得好遠，佢好明白藝人心態，亦知道觀眾、樂迷想要啲乜，喺工作上佢會直接問你有咩意見？我一定會話你揸主意啦，我完全信任佢，知道無論發生乜事，佢都會為我承擔一切。」

一改怕醜性格

思想正面的Leon，面對種種負面新聞的攻擊，輕易使出一招四両撥千斤就應付過去，Janice笑說：「Leon講嘢好叻、好笑，佢成日教我哋唔使怕人哋點睇、點講，最緊要知道自己唔係咁嘅人。」向來怕醜、內斂的她，不會將內心說話傾吐，但隨着思想日漸成熟，以及Leon豁然開朗的個性影響，她說：「我變得open，有乜都會同佢講，我覺得自己好幸福。」

Janice與黎明的關係亦師亦友，親密如兄妹。（資料圖片)

迷失與平靜之間

曾經有段時間Janice感到好迷失，對自己好易感到懷疑，即使一些無聊事都會受到影響，她說：「嗰時都幾自閉，雖然身邊有朋友，自己又賺到錢，有舒適嘅安樂窩，但就係有種無形孤獨嘅感覺，覺得好唔滿足，覺得有好多幢牆圍住自己，但破極都破唔出，內心完全無法平靜，幸好有主喺沙漠裏面拯救咗我出來。」

珍惜所擁有的

自從與妹妹Jill一齊信主受浸後，Janice承認自己有所轉變，最明顯是她知自己變得開心了，淡泊名利，因為她找到心中那份「愛」，她說：「做人要有信心，一定要信自己，如果自己都唔信，好多嘢都克服唔到，信主後確實畀到好大能量我，以前對眼好似蒙蔽咗，耳仔聽唔到咁，但依家我覺得世界係好美好，好珍惜所擁有嘅一切，都希望將正面嘅訊息宣揚畀大家。」

尋找了心中所愛，Janice終領會到開心的喜悅，她笑說：「細個時覺得開心只係一段時間，唔會長久，原來係錯嘅，發現開心都可以好長遠。」過去的種種經歷，她稱當作是人生試練：「雖然條路唔易行，但我總算搵到自己個方向，唔會再驚，內心好平靜。」