成日話香港油價貴，冇呃你，依家去到$14.3喇；旨意油公司減價，等中六合彩好過喇！做車主唔想畀油商榨乾，除咗要注意駕駛習慣，唔好下下大腳油、冬天都開行冷氣外，計我話，最實際都係出部慳油車仔，好似富士（Subaru）嘅R2，人人都話「細食」，到底佢有幾慳呢？
根據廠方數字，R2嘅耗油量係24km/L，以目前油價計算，即係$0.6/km左右。早前筆者就同R2做咗個為期四日嘅深入測試，交車前去油站埋單計數，都只係$0.71/km；講明先，筆者揸車冇「就住就住」，依然大腳油加速、開行冷氣，收工做埋「柴可夫」，載埋同事一齊走，$0.71/km呢個數字，睇怕都冇幾多款車慳成咁。 做人要均真，R2已經幫你慳番唔少油錢，你唔會奢求車廂大到SUV咁款、速度拍住法拉利啩？車長只有3,395mm，四座位布局只算係啱啱好，而且後排受制於尾箱空間，所以移動幅度唔大，收工嗰陣，我都要求男同事坐前排，留番後排畀女同事。我就會當R2係雙座車用，假日同女友坐前排，後排留番嚟做迷你艙，放置Shopping後嘅戰利品，咁就Fit晒！ R2屬於K-car類別，日本人就當佢哋係市內嘅短途代步工具，所以大馬力、高速都冇必要，慳油、實用、反應快先至緊要。R2嘅馬力及扭力分別達54ps及6.4kgm，配埋CVT波箱，唔講得話快，不過一踩油都好肯去，充分發揮細車起步、加速夠輕盈嘅特點。況且除咗慳油錢，R2仲係環保汽油私家車稅務寬減計劃嘅受惠車款，所以稅後車價只係$93,375，而且引擎容積喺1.5公升樓下，牌費只係$3,929，加埋保險費，$100,000左右就出到新車，如果閣下嘅女朋友、甚至老婆都咁識幫你錫住荷包就好喇！ 車型：五門四座位揭背車 引擎：直四 容積：658c.c. 最大馬力：54ps/6,400rpm 最大扭力：6.4kgm/4,400rpm 驅動：前置引擎、前輪驅動 傳動：CVT 懸掛：（前）L臂配扭力桿 （後）雙連桿 制動：（前）實心碟 （後）制動鼓 車身體積：3,395×1,475×1,520mm（長×闊×高） 耗油量：24km/L 售價：$93,375 查詢：2511 2727（Motor Image）
前排係車內最寬敞嘅位置，爭住坐！
後排空間有限，女仔坐都仲得，男仔就勉強啲。
雖然尾箱唔算細，不過為慳油，最好都係少放雜物。
後排當做行李艙
車廂布局簡簡單單，最緊要實用。
波棍移上中控台，慳番唔少位。
放大圖片
踩油都好肯去
車檔案
我係慳妹，R2至襯我！
留言列表
