李治廷同鬼仔喺米倉大戰未埋位先拗柴，兩個原先諗住全程打真軍，點知有一幕講佢俾鬼仔掟落木凳，李治廷話：「真係唔敢試，都係要搵替身上，之後都唔敢扮勁！」
曱甴
設計對白
2010年10月27日
打星 icon李小龍就算死咗 37年仍然係中國人偶像，由甄子丹扮陳真到周杰倫扮青蜂俠都要曲線扮小龍。
上年金像獎「最佳新演員」李治廷就挑戰自我，喺新戲《李小龍》擺明車馬飾演 17歲萬人偶像。原本排骨仔身形，為求孱仔變鋼條，唔只日日狂做 gym，谷肌增肉 10磅的李治廷更苦練詠春兩個月準備，點知第一日開工拍打鬼佬戲就拗柴，李治廷焗住忍痛頂硬上。小龍唔易做， 23歲李治廷今鋪搏埋條命呀！
李治廷上年憑《歲月神偷》大熱勇奪金像獎「最佳新演員」，戲中演患癌少年，文弱書生，自然 fit晒瘦仔李治廷；今年拍《李小龍》論樣貌，李治廷先天有幾分似，不過講副偈，仍然有排操。
狂操兩個月
唔想得個樣似，惟有開工前狂操，先喺詠春師傅溫鑑良學藝兩個月苦練詠春基本功，但原來谷肌先至最攞命。李治廷話：「頭一個月我要不斷增肌，即係不停食嘢，雪糕、漢堡包、可樂，谷肥自己。」
5呎 9吋得 135磅嘅李治廷，谷肥到 148磅後又要減多 3磅練番鋼條身形，李治廷話呢個月先係地獄：「幾乎咩都唔食得，戒糖、鹽、澱粉質，跟住日日做 gym又練功，真係地獄特訓 o架！」
有靚肌又食過兩碗夜粥，李治廷諗住自己超 fit ready，點知開工第一日拍打戲，劇情講佢同鬼仔喺米倉打交，竟然未埋位先拗柴。李治廷話：「嗰場戲講我要連踢八腳落鬼仔度，一路痛一路踢，拍足 6個鐘都幾辛苦，其實我仲有排練，條大髀筋太緊唔夠鬆，要做到一字馬。」據知李治廷就算拍完套戲仍然 keep住小龍上身未搣甩，就算遲啲開續集，李治廷都未驚過呀！
上身表情
李小龍招牌手指指斜向下睥神情，講真個樣真係寸到冇朋友，難怪李治廷話：「要做到有自信，但唔乞人憎，真係幾難。」
145磅純肌
李治廷用咗兩個月時間操肌，由增肥後的 148磅再地獄式操練減走 3磅肥肉變鋼條，線條係有，不過佢自己都嫌肌肉未夠脹，但當時李小龍只得 17歲，肌肉太勁反而唔似。
中婷婷
貢米飾演梁醒波個女（文女），同謝婷婷飾演曹達華個女（曹敏兒）一齊爭李治廷。
龍城四虎
「龍城四虎」李小龍少年時 3位朋友， MC Jin做小麒麟、陳奐仁做奀仔、國內電影新貴張一山做劉連光，全都係小龍少年時代好兄弟。
千萬重造故居
《李小龍》成套戲用咗 3,600萬拍攝，其中 1,400萬喺廣州開平搭建李小龍香港舊居，認真揼本。舊居大小擺設就連龍哥童年玩嘅木馬同玩具，全部由李小龍親姊弟，李秋源和李振輝畀資料照做。咁認真，應該唔會好似 TVB的道具超越時空啩。
留言列表
