梁思浩避鬼招數　五色花水洗車 @ 明星靚相大分享☆

唔嚇唔安樂嘅香港人，哈囉喂鬼屋越得人驚，啲飛就越難撲。見大家咁鍾意驚到騰騰震，即刻搵講怪談講到深入民心嘅梁思浩出嚟，同大家分享有關車嘅鬼故事，聽完唔敢夜晚揸車望倒後鏡嘅話，就要記住思浩醒你嘅避邪三招幫車開運，咁就人車喜事精神爽啦！記者：許維雅攝影：林栢鈞Model： Fion、 Tiffany、 Crystal

其他副刊影片明星撞完鬼即紅爆

有一排無講怪談嘅梁思浩本來想洗底，但班粉絲就好似厲鬼咁成日纏住佢，問佢幾時講鬼古？所以佢今次順勢同大家分享鬼古應應節，身為娛樂圈人，當然要佢講啲圍繞明星嘅鬼古，滿足我哋嘅八卦慾。原來明星撞鬼都未必係壞事，因為分分鐘撞完即紅，只要隻鬼唔係對住你笑就得！

二手車　先開運

其實揸車撞鬼，一向都聽唔少，但想架車靈靈性性唔好招惹到污糟嘢，思浩一樣有計，「我家夜晚揸車都會避忌去某啲地方，好似摩星嶺就一定唔會去。不過有時拍戲逼住入墳場，我就會喺車度放個平安符。行內有師傅教過用碌柚葉浸水，然後放落水壺，離開墳場時就喺車身裏裏外外噴一噴，圈內好多人都咁做。」唔止去墳場，若然你架車成日無端端刮花碰撞，總之諸事不順，原來都可用呢個方法趕走衰氣，唔小心撞死貓狗都一樣得。

放大圖片
■揸車去墳場開工，思浩一定會放平安符喺架車。

■揸車去墳場開工，思浩一定會放平安符喺架車。

放大圖片
■用碌柚葉浸水放落水壺，可隨時隨地幫架車辟邪。

■用碌柚葉浸水放落水壺，可隨時隨地幫架車辟邪。

放大圖片
■原來用五色花水洗車可以幫車開運，但其中一款一定要係火百合。

■原來用五色花水洗車可以幫車開運，但其中一款一定要係火百合。

思浩還有個開車運秘技，「其實車都有車運，如果你想架車好運，好似成日遇到錶位咁，師傅就教用五種唔同顏色嘅花浸水洗車，幫架車開運，記住一定要有火百合。尤其是買二手車，唔知上一手發生過咩事，用五色花水開運就包無衰。」各位車主，信不信由你喇！

故事一：阿婆搭順風車

有個男藝人拍緊套法庭電視劇，有日拍完劇收工，由清水灣片場經清水灣道出九龍，去到壁屋監獄附近，突然感到有人上咗車，望望倒後鏡，見到有個阿婆坐喺度，嚇到呆晒！佢立刻踩腳掣再望多次，阿婆依然無表情咁坐喺度，佢惟有繼續開車諗住等人多嘅地方先發難。點知去到坪石附近嘅油站，突然聽到有人同佢講：「唔該晒！」佢感到有人落車，先夠膽再望倒後鏡，發現唔見咗阿婆！之後喺拍劇嗰段時間，每次經過都遇上阿婆。之後個藝人問師傅，先知原來油站旁邊是義莊，師傅仲話：「唔緊要，佢只係搭順風車，無對住你笑就得 o架嘞，有人撞完會紅 o架！」那位男藝人果然喺套劇出街之後就紅咗呀！

放大圖片

故事二：迷幻路障

當年有位台灣女星來港拍戲，住在西貢邵氏宿舍，有晚有位香港女星揸車入去搵佢齊入西貢食消夜，一路去到清水灣尾嘅迴旋處前見到警察路障，停低後，有個木無表情嘅警察問：「你哋去邊呀？」佢哋答：「我哋遊車河，咩事呀？」警察話：「無事，睇吓你哋啫！」跟住警察望住台灣女星話：「你好靚呀！」佢哋駛離路障之後就喺前面迴旋處掉頭，點知一掉頭，就發現路障唔見咗，兩個女仔立刻嚇呆！其實個台灣女星當時拍緊套鬼戲，套戲一上映，台灣女星即刻大紅大紫，你哋估吓佢係邊個？

放大圖片