明星靚相大分享☆

為個唱愈操愈瘦嘅容祖兒，喺尾場演唱會着上性感大V紅裙，可惜胸冇半両肉，難怪佢自嘲似作品〈空港〉，成個飛機場咁，
如果再唱多幾場就會變「凹港」。
祖兒居然一邊自嘲一邊宣傳自己啲歌，媽咪姐唔寫個「服」字俾佢都唔得啦。

余文樂哥哥早前結婚，令佢都心急埋一份，既想結婚更希望生仔，仲話將來識女仔，
真係要兜口兜面問佢生唔生。
如果個女仔又兜口兜面反問：「我想生啫，咁你『得唔得』先？不如你去家計會驗咗先同我拍拖啦！」咁咪好瘀。

陳冠希為遊戲展任揭幕嘉賓，被問到何時以演員身份跟觀眾見面？佢不禁大嘆，表示自己一直鍾意拍戲，更不介意跟阿嬌同栢芝合作，
做嘢唔使一定好friend先做到嘅。
做嘢唔一定要係friend，但都唔可以係仇人。佢唔介意啫，可能人哋超超超介意呢！

劉嘉玲就快牛一，被問到會唔會叫老公梁朝偉買層樓俾佢做生日禮物？佢就大晒恩愛：
我嘅即係佢嘅，佢嘅即係我嘅。
夫婦不分彼此係好事，不過媽咪姐要更正佢嘅講法：我嘅依然係我嘅，佢嘅全部都係我嘅。

G.E.M.出席活動時，被發現心口有可疑紅印，被迫問係咪「咖喱雞」？佢即場詐儍扮無知：
我由細到大都成日食咖喱雞飯。
遇到呢啲case，一係急才賴皮膚敏感，一係唔回應。阿G.E.M.呢招九唔搭八，咪仲冇私顯見私。

50歲嘅惠英紅早前宣傳新片《功夫．詠春》時，大嘆打女難有姻緣，不過佢自爆朋友幫佢算過命，話佢出年會遇到未來老公，仲信心十足咁話：
我係一個好人，好人應該有一個好老公。
佢咁講即係話其他中女人品唔夠好，所以搵唔到好老公啫。小紅姐，小心成為中女公敵吖！