師傅曬冷！國際風水玄學展－明星靚相大分享☆

近年風水玄學家仲多過明星，無論大家信定唔信，都會覺得聽多個意見冇壞。連本身冇咩風水文化的南韓，都想搶飲中國頭啖湯，將風水申報做當地的文化遺產，就知道風水有無限吸引力！
今個禮拜五、六、日，香港仲搞咗首個國際風水玄學展，滙集百多位來自中、港、台及星馬等地的風水玄學大師，齊齊展示各地的特色玄學法器物品，絕對係滿天神佛！其實風水玄學一早已經滲入港人生活之中，係有根有據的學問，而風水玄學五花八門，總
有一門可以滿足你的需要。

「國際風水玄學展」牽頭人之一的司徒法正話，唔想行家成日俾人認為係呃神騙鬼的神棍，於是聯同展覽公司搞咗這次大型展覽，等人認識下咩係風水玄學。「香港其實有好多玄學高手，不過一般人冇咩機會認識到，搞個展覽可以俾市民見識下新進的玄學家。成個展覽都好正氣o架！除咗玄學家，香港道教玄學協會同孔教學院都有幫手，希望大家睇完展覽後可以了解多啲，唔好以為玄學好邪、好神秘啦！」

提提你　早入場免費占卜！
主辦商每日都有近300個免費塔羅占卜、蘆欣符文占卜、靈擺占卜、天使卡占卜、水晶占卜、水晶治療、聲音治療、樹葉占卜、八字批命、投資運程占卜、掌相疾病預測的名額，全部由參展商提供。工作人員會在展場外隨機派出免費占卜券予入場人士，不過冇得揀要咩占卜服務，派到嚟邊種就係邊種，而且先到先得，派完就冇，記得早啲入場啦！

國際風水玄學展2010
日期：12月10-12日
時間：11am-8pm
地點：香港會議展覽中心Hall 3G
入場費：成人$ 30，65歲或以上長者、1.2米高或以下小童$20
查詢：2424 1188 / http://www.fengshuiexpo.com.hk
＊展館只有一個hall，幾乎可以一眼睇晒，如果想知攤位位置，到時可參考館外派發的地圖。

司徒法正3大搞作
1. 免費派「人緣招財符」
聲稱可增加人緣及財運，每道符都係人手以硃砂繪畫，然後放上神壇施法，唔同一般機印符。道符會放在迷你利是封內，你可放喺銀包，到一年後法力已盡，化咗佢（即燒咗佢）就可以。按規矩就每日限派100個，不過司徒師傅話依家連同徒弟們趕工中，希望所有到他們攤位的人都可以收到。
2. 拍賣千手觀音、八仙過海像
這個千手觀音雖然細細個，約30cm高，不過來頭甚勁，全球只有30尊，司徒法正話楊受成、何鴻燊同肥媽Maria Cordero都請咗一尊返屋企。「呢個像係由一位90幾歲的內地玄學大師一路唸經一路燒製的，其實個像本身已經有法力，不過拍賣前都會再開一次光。」
他表示，千手觀音人人啱擺，因為千手各持有日、月、塵拂（圖）、寶劍、缽等聖物，寓意好事就接收，壞事就擋開。至於八仙過海（圖）都係由同一位大師燒製，特別啱投資界人士，「呢個像可以好似八仙過海咁，令擁有者安然渡過重重風浪，拎到好成績。投資市場風高浪急，最需要呢個像啦！」呢兩尊像每個底價$180,000，司徒法正強調收益會用作行善。
3. 賣玄學潮Tee
Tee共有三款，頭兩款係正正經經以《易經》卦象及八卦做圖案，中國風十足。最後一款最搞鬼，有司徒師傅的金句「出事o架嘛！」後面仲有一道人緣符。（價錢待定）

必睇！古董風水珍品
髮繡《清明上河圖》
動畫版《清明上河圖》大家可能已睇過，不過用頭髮織成的版本又見過未？這幅《清明上河圖》係用不同顏色的頭髮代替絲線，在絲綢上用人手一針一針織出來，成個卷軸有5.29米長，由十多名繡工用了4,388日才織成。最難得是使用的頭髮全部都係天然顏色頭髮，而且繡工極細緻，唔講根本睇唔出係刺繡，仲以為係畫上去的。

左右旋西藏法螺
法螺係西藏藏傳佛教常用的一種樂器，亦是佛家八吉祥物之一。它是在巨型響螺殼上包裹銀及寶石，再插入吹嘴而成，可吹出雄厚聲音。呢對螺有成呎咁長，單是size已經令佢成為寶物，最難得係其中一隻係罕見的右旋螺（一般螺殼都係左旋，即螺紋逆時針生長），故被視為佛門至寶。

神祕！泰國佛牌大解構
睇江湖片，成日都會見到黑道大哥戴住一塊鑲以金框，有埋玻璃罩的泰國佛像墜，江湖味勁重，仲帶三分邪氣。今次展覽都會有參展商賣泰國佛牌，但就強調同養鬼仔冇關，係屬於正氣咁話！

華金泰佛飾老闆Alex：「大家唔好一見泰國法器就諗起養鬼仔，其實佛牌係泰國高僧為了一些慶典、紀念日、寺廟修葺等等正經事而造出來的，全部都係為善同基於慈悲心，唔係法術。點解咁多江湖大佬戴？因為佛牌都有『避險』作用，甚至有人戴了之後，子彈竟然打唔到入肉，所以好受成日容易遇險的人歡迎。」

古董珍藏佛牌曬冷

佛牌知多啲
1. 點解賣咁貴？
一般的佛牌由幾百蚊開始已經有交易，高價的佛牌主要是因為製作的大師是高僧，加上佛牌歷史悠久，以及曾有靈驗神蹟有關。
2. 佛牌點解會有效？
佛牌是由高僧以香灰、花、花油、經水、貝殼粉、袈裟布、經繩等多種與佛有關的材料製成，有時甚至會加入僧人的骨灰或者舍利子粉。
3. 戴了佛牌使唔使還神？會唔會惹鬼上身？
唔需要回廟還神，但建議做善事積福。而正式由高僧製造的佛牌是不會惹來鬼魂的。
4. 係唔係做偏門工作的人先啱用？
唔係，因為好多佛牌都可以增加人緣，包括增加桃花，因此對獨身女性都好有用o架！Alex本身都有戴增加人緣的佛牌，佢話：「有啲人以為戴咗旺桃花的佛牌（如：蝴蝶牌）可以溝到好多女仔，或者令喜歡的人迷上自己，其實正宗的佛牌唔會咁邪，最多係增加你的人氣，無論對感情或者對做生意都有好處。」
5. 戴佛牌有冇嘢要避忌？
冇特別嘢需要避忌，總之唔好戴住佛牌做衰嘢就得。至於咩為之「衰嘢」，Alex就話由佩戴者問心喎！
6. 點解佛牌嘅圖案咁怪，好似骷髏骨頭咁嘅？
圖案其實係泰國不同佛像的簡化版，有部分係負責製造的高僧的肖像。

必搶！麥玲玲免費睇相
今次風水玄學展的參加者多數都係冇咁出名的玄學家，蘇民峰、楊天命等等大家見慣見熟的風水明星都唔會出現，好彩麥玲玲師傅有參加，仲會幫女士免費睇相，及大賣旺桃花水晶法器。
免費現場算命
搵玲玲師傅算命最低消費$3,300，仲要排大隊。今次展覽就會賣大包，開幕當天（10/12）下午佢會即場為女士免費推算姻緣運，名額15位，現場登記，先到先得。確實時間請查看麥玲玲網站的最新公布。（http://www.maklingling.com）
必摸極上桃花陣
唔買法器，都可以摸下玲玲師傅特製的「巨型粉晶手鏈」，由17顆如網球般大的巨型粉晶（下圖）組成。粉晶有增加人緣同桃花的能力，摸下都有助增強運勢o架！

水晶法器3折
平時的風水法器個樣都幾老套，玲玲師傅就將佢哋美化，用水晶做材料，靚到好似擺設一樣，老套神怪味盡除，而且3折或以下折扣發售，超抵！每日限量30個，要買趁手。另外每日頭10位顧客，不限消費金額都即送「化煞開運吊飾」，可按個人生肖而配對，有助化煞保平安。

法器勁減名單
10/12（周五）：招財黃晶貔，貅主財運，$333（原價$1,680）
11/12（周六）：東陵如意，主事業，$353（原價$1,180）
12/12（周日）：七星愛情陣，主愛情，$188（原價$630）

風水就在你身邊！
1 元寶中庭
成個商場的大天井位彎彎哋的，從頂層往下望，仔細留意會發現係金元寶形，寓意招財進寶。
2 左青龍右白虎
好風水除了要有靠山和面向水外，更要左青龍，右白虎。於是加建了通往港鐵站的短天橋（白虎）和通往裕民坊的長天橋（青龍），加強人流。另外又有兩條往下的電梯通往的士站及巴士站，連同兩條天橋成為「天市垣」的格局，四面都有流水（即人流），催旺商場。
3 倒騎龍格
一般「好風水」的定義都是背山面水，但apm卻是面山背海（觀塘避風塘）。一般商場是商場在前面，寫字樓在後面，apm也將之調轉，寫字樓在前面。蔣匡文說，這個格局和曾經作為多朝首都的西安是一樣的。
4 吸水天梯
整個商場有12層，水（即金錢、人流）一次過上不了這麼高，於是在第三層起一條天梯，引水上流至第五層；亦令各層商戶都有水到。

建築師：真正風水陣無需法器！
成日都有傳言話某某大廈請某某大師睇過，加入咗風水設計云云，從來未得到考證。但係風水商場就確有其事。蔣匡文就係本港少有識風水的建築師，出過多本有關風水建築的專書，觀塘的apm就是出自他手筆，由設計初期就已經加入風水概念。
「我同人輸賭，如果喺apm搵到風水法器，我就請食飯！一個商場要風水好，係從整體設計加入風水概念，若起好先加法器，等如食藥醫病，點都冇預先打好個底咁理想。」apm開幕以來生意勁好，難怪蔣匡文牙擦，佢透露咗數個apm不為人知的佈局，睇吓你有否留意到？

天梯失敗例子
比apm稍早落成的旺角朗豪坊，位置極佳，也有一條長長的天梯連接food court和上層店舖，但food court樓上的店舖卻總是不旺場，屬於天梯引水失敗。原因是上層商場以螺旋形向上發展，換言之是斜台，水引到上層商場也會因為斜台關係而流回起點，所以朗豪坊最多人的地方總是在food court那層。

揀風水屋及投資攻略
風水既然係人同環境的學問，大家最關心的當然係住屋問題。不過原來住填海區豪宅睇海景唔一定好，隨時有機會妻離子散！

蔣匡文指出：「妻離子散有好多種，唔好的話當然係離婚、仔女唔跟自己；但係如果丈夫成日要做嘢少返屋企，甚至成日要去外國或返大陸工作，都算係『妻離』。仔女去外國讀書，唔喺身邊，亦係一種『子散』。」
佢話，填海樓令人「妻離子散」的原因，主要是「客土無氣」。「客土即是非本地的泥土，填海用的是外地的土，風水學認為『山主人丁，水主財』，填海地原本是水，並非山或土地，因此住在這裏的人丁就會受損。例如嗰區有好多高薪女士一個人住，冇拖拍做中女，其實都係一種人丁受損的現象。不過填海地的樓就唔係完全唔好喎！因為『水主財』，所以住喺度就會好賺錢！」
蔣匡文話呢種情況冇得化解，要避免惟有搬離填海區。不過家家有求，究竟想賺大錢定係想擁有美滿家庭生活，就你諗你啦！

20年八運旺乸型男、天然資源
蔣匡文話，從2004年開始，香港由1984-2003年的「七運」進入2004-2023年的「八運」，代表新時代開始，金融及娛樂事業衰退，而天然資源和美男當道，明年起更是如火如荼。
「古代玄學家將180年分三元，即上元、中元、下元，每元60年。每元再分20年為之一運，現在我們正處於下元八運。」蔣匡文說，20年為之一運，是因為木星（古代認為主宰12生肖）和土星（古代稱為鎮星）隔20年就相會一次，地球就會受到影響，整體的趨勢都會改變。

「七運」是兌卦，「八運」是艮卦，每卦可以引伸不同意思。呢20年內，「七運」興起的事物會愈來out，「八運」興起的就愈來愈hit，睇下面的列表就可明白。除咗可作為潮流預測，亦可參考來買股票！

右旋法螺

左旋法螺

北宋木雕觀音像
平時見觀音都係斯斯文文企喺蓮花上，呢個坐姿豪邁的觀音人性化好多。這個木雕觀音屬北宋年代物品，已經有成千年歷史，原本有七彩彩繪，可惜大部分已剝落。而這個坐姿叫「輪王踟」，相傳係古印度國王召見大臣時的坐姿，以示親切和閒適。

宋代石雕財神
原來財神在宋代時勁樸素，而且好man，似門神多過財神。這尊財神左手托住璽印，右手持有冠爵帽，腳踏鰲魚。最特別之處是鰲魚的腹部與鼻孔相通，可擺放在水池中，水源流轉，寓意獨佔鰲頭，陞官發財。

清代木刻版《通勝》
依家的《通勝》成本字典咁厚，原來古代的《通勝》只是薄薄一本。這本由堪輿曆法專家蔡伯勵先生借出的《通勝》，出版於清朝光緒27年（1901年），以木雕印刷，當年唔係叫《通勝》，係稱為《七政經緯選擇通書》，只有用天干地支排出來的日子，同埋每日宜忌，當中大部分都同耕田、嫁娶等平民生活有關，而且淨係教人擇日子，不似現代版本有教人學英文同算命等等章節。