「老竇豬」陳振聰同龔家嘅爭產上訴官司剛打完，佢隻宏霸（0802）一樣動作多多，上個禮拜大折讓批股，買入美國場外交易市場（OTC Bulletin Board）上市嘅金礦公司Spartan Gold Limited（SPAG）百分之六點一股權，作價五千零七十萬。

宏霸明明係搞生物同射頻識別（RFID）技術應用，點解無端端走去學人掘金，兩者大扯唔埋，唔通佢真係種生基種得多，有鋪「掘窿癮」？再睇真啲先知，宏霸係為間金礦公司提供生物同射頻識別技術，將呢種技術應用喺採礦方面。

哨牙通咁做成功與否一言唔知，但小弟望完間金礦公司盤數，真係替宏霸股東閉翳。事關間公司○七年成立，三年內兩度改名，十足本港三、四線變身股。咁都未算，公司到依家仲未有收入，年年蝕錢不特止，○九年底重要係「負資產」，即係資不抵債！

一言愈睇愈覺驚，間公司喺季度業績中聲明，截至去年九月，手上一分錢都無，未來一年會非常缺水，可唔可以繼續營運都未知，更準備隨時做「伸手黨」向股東攞錢，可見將來亦唔會有錢賺。獨立核數師更加唔客氣，對間公司能唔能夠經營落去表示「極之懷疑」（substantial doubt）！

哨牙通旗下嘅宏霸做開高科技，上個禮拜突然走去投資金礦，究竟背後有乜玄機。

宏霸小股東蝕晒章

開金礦公司咁等錢使，又何來有錢幫襯宏霸買啲乜乜科技？真係天才會「Mensa」嘅會員都諗唔到，可能要訴諸風水術數。大家不妨昅實宏霸客仔條未找嘅街數，或者會搵到靈感。

做唔做得成生意仲未知，不過呢單「刁」對宏霸小股東嚟講，就肯定蝕晒章。何解？皆因宏霸今次批嘅新股無禁售期，對方攞咗股票，可以即刻喺市場沽貨套現。相反宏霸買番嚟嗰百分之六金礦公司股份，唔可以自由買賣，分分鐘要長揸。

如果讀者好記性，應該記得宏霸去年「印公仔紙」買志強國際，同前年買 A-1 兩間空殼公司，股份都係無禁售期。其中A-1嘅買家唔夠一個月就大手掟貨「水」，「質」到宏霸股價反艇。今次收購嘅條款咁唔對等，加埋前車可鑑，你估宏霸小股東有乜反應？

宏霸當年透過收購A-1而跟CATV做生意，圖為CATV北京登記地址。

宏霸一年股價走勢圖

新地賣樓借富豪做宣傳

新地（0016）近日連推兩個新盤，除咗洪水橋個泉薈之外，原來有個豪宅盤同期推賣，叫做SHOUSON PEAK，個項目位於壽山村道九至十九號，之前係屬於何善衡家族持有，新地○五年買入重建。依家有三十一座洋房，一喺市場放盤，即時以兩億八賣出一間屋，呎價高達四萬六。

喺本網上售樓書入面，附有一幅壽臣山豪宅鳥瞰圖，除列出地盤位置外，亦特別列出區內幾座名人居所，以顯示買家可以跟超級名人成為鄰居。幅圖入面有財政司位於壽山村道四十五號官邸、以及律政司司長黃仁龍家族持有嘅豪宅，但最特別係圖上同時列出壽臣山徑一至三號的三間大屋位置，但就冇明言係邊個擁有。

一言好奇怪，於是向地產經紀通天打探，原來嗰三間屋係首富李超人同大仔李澤鉅嘅暫時居所。由於李超人位於深水灣道七十九號嘅大宅正在重建，兩父子搬咗去壽臣山暫時居住。

新地SHOUSON PEAK開售，網上樓書標明壽山徑1-3號，但冇講係邊個，查實間屋係李超人居所。

李小加睇港劇 學廣東話

十年河東二十年河西，真係一啲冇錯，廿幾年前港人喺公共場合聽到有人講普通話，可能會有啲唔慣，其至有點看不起別人感覺；但今時今日，香港人爭住學普通話，仲以講得一口流利國語為榮。

一言識唔少喺香港投資銀行工作嘅內地人，佢哋更加唔會學廣東話，情願講英語。好似港交所（0388）行政總裁李小加，以前做投行，嚟咗香港都十幾年，依然唔識講廣東話。但自從任職港交所行政總裁後，都深明要融入香港，於是請咗個私人導師教授，唔單止咁，佢計劃花多啲時間，經常睇港劇，誓要識聽兼識講。

李小加喺香港十幾年，竟然都唔識講廣東話。