快週刊 611期產前一週情緒波動張柏芝夜闖養和驗胎－明星靚相大分享☆

數數手指，仲有約一個禮拜Lucas細佬就出世，臨盆在即，加上之前張柏芝曾經歷兩度小產，謝霆鋒又忙於在內地拍戲，雖然張柏芝家姐已進駐謝家，24小時侍候在側，兼協助照顧Lucas，但大肚婆情緒難免間中波動。

上週本刊發現張柏芝半夜坐的士直奔養和，相信是為避狗仔隊而漏夜往檢驗，但不排除是感覺胎氣動而求診，睇張柏芝隨時有機會提早再做媽咪。

自嫁入謝家以來，張柏芝一直被當做親生女看待，就算之前慘遭慾照劫，霆鋒依然對佢不離不棄，四哥同拉姑更多次發表宣言力撐新抱。

而成功陀第二胎後，張柏芝得寵指數直線上升，最近謝婷婷就踢爆，霆鋒成日送鑽石張柏芝阿嫂，拉姑則豪擲十幾萬買限量Hermes Birkin益新抱。

迴避傳媒

萬千寵愛在一身，令反叛見稱的張柏芝感動「從良」，尤其曾發生小產事件後，張柏芝今胎更顯得小心翼翼，一改以往高調作風，有喜初期，佢更乖乖遵守拉姑下達的「禁足令」，匿屋企足足三個月。

胎兒穩定後，雖然芝偶有出動，但例必以口罩、Cap帽示人，保持低調。而隨愈來愈近下月初的預產期，鋒芝愛巢舂坎角Ocean Bay外亦開始有記者守候，為免因曝光釀成混亂，不單請來家姐戴碧芝負責接送Lucas返放學，連去醫院覆診的時間亦選擇半夜，避開傳媒目光。

「拉姑知道好多傳媒開始做，張柏芝咁大個肚行動唔多方便，拉姑驚發生意外，所以吩咐芝盡量唔好出街，去醫院都要揀半夜、凌晨呢時間。」知情人透露。

半夜赴院

奶奶下聖旨，張柏芝當然唔敢違抗，除了上月為霆鋒得獎破例到荃灣酬謝四面佛，以及本刊曾發現她有一次大清早乘車出街外，近三個月絕少在正常時間外出。

及至上週，張柏芝忽然於半夜四點幾現身，同樣戴上口罩、Cap帽，一身黑衫在工人護送下坐的士夜闖養和，期間工人化身保鑣不時視察四週，發現記者時，的士更試圖擺脫，當抵達醫院，張柏芝便走進VIP通道失去影蹤。

放假陪產

其實懷孕後，張柏芝幾乎每隔一段時間就傳出情緒不穩的消息，連佢自己都話呢胎比陀Lucas時辛苦好多，冇胃口兼成日嘔，最慘係老公唔身邊，情緒自然差。

「呢排芝間唔中就發惡夢，成日驚個BB有事，搞到精神唔係咁好，拉姑都冇辦法，話差唔多生大肚婆係容易亂諗，只係叫芝放鬆。」知情人稱。