模範媽咪薛家燕由童星出身，經歷婚姻破碎，獨力撫養三名子女成才。今天，大女石祐珊（Justina）不單止接手媽咪創辦的藝術中心，還擔任媽咪經理人，更開設自家經理人公司，培育及發掘大小朋友才藝及專長，完成不少大小明星夢，更為自己編織事業理想夢！

Justina發現不少家長給予孩子很大壓力，「佢哋成日話仔女唔夠人好，間接令小朋友覺得自己唔夠好，我就會同佢哋傾吓偈談吓心事，慢慢鼓勵佢哋。」

童星夢工場

Justina於美國University of California傳理及日文系畢業，先後在MTV台及全美最大規模經理人公司William Morris Agency任職，經理人工作更是她dream work，但○九年卻放棄理想職業回港，接手「家燕媽媽藝術中心」，訓練小朋友才藝。

Justina說：「那時媽咪身體好差，決定返嚟照顧佢，又到藝術中心幫手；我覺得讀書之餘同時有演藝訓練係好，可以學習待人接物，做起事來更有自信，唔係要培育佢哋做明星，而係要佢哋自信十足，勇於表達自己，發揮個人才能，日後對成長、將來事業都會有幫助。」

因此，不少由藝術中心訓練出來的小朋友，都有份參演電視、電影甚至廣告，好似「一哥」楊真一、《全城熱戀熱辣辣》飾張學友女兒的士多啤梨鄭可琳、無綫兒童節目小主持陳沛妍等等，小朋友均自信滿滿，演出有板有眼，年前更有傳媒粗略估計，藝術中心為影視圈提供近七成小演員呢！

Justina（左二）旗下的王梓軒（左一）為「亞洲版Spice Girls」，擔任亞洲區嘉賓導師及音樂創作人之一，Justina作為比賽統籌者，媽咪家燕姐（右二）也有出席早前舉辦的比賽記招，以示支持，右一為陳奐仁。

經理人夢想

始終，經理人才是Justina心目中的理想工作，她在媽媽身體康復後，機緣下創立「星河娛樂公司」，尋找兼幫助有潛質的亞洲藝人發展海外市場，編織自己夢想，「我曾經在美國MTV台做過一段時間，一次舊同事找我幫手邀請有才能又曉英文的出名藝人亮相佢哋節目，就先後找過媽咪、甄子丹、馮德倫、王梓軒等等，初時係幫手性質，慢慢愈做愈多，更做出癮來，好希望幫到有talent嘅亞洲人，好有passion令世界認識我哋，錢賺得唔多都會繼續做。」

有熱情才有動力向前走，Justina肯走，自然能找到屬於自己的康莊大道。

「舊年聖誕，細佬（右二）大學畢業，撞啱媽咪登台，咁我同細妹（左一）一齊飛過去美國觀禮兼過聖誕。」

Justina和藝術中心的學生十分熟稔，玩起來笑聲處處。

媽咪原動力

不過，人生總有高低潮，眼見媽媽的堅毅，獨力撫養三姐弟成人，Justina對當年孤零零一人在外地升學，在競爭激烈的經理人職場上拼搏，既能一一克服，更成為William Marris Agency首位被派到上海的員工。

Justina表現如此出色，全因有個好榜樣。

「喺嗰邊幾年時間，每當遇到一些挫折，就會諗起媽咪，佢婚姻失敗想自殺，都因為我哋三個細路而打消念頭，回頭重新振作，佢都可以經歷得到，我嗰啲挫折算得係咩，佢係我一個好好榜樣同推動力，我會學佢一樣咬實牙關去面對。」

2007年，兩姊妹放假，齊齊回港與媽咪一起到泰國旅行，三人笑容一致，快樂得很。

「唔記得幾時，媽咪應該拍緊劇集《銀樓金粉》，幾姊弟都唔喺香港但就一齊回來和媽咪過聖誕。」劇集於08年播出，相信應該是2007年末聖誕吧！

（前左起：Justina、家燕姐；後左起：妹妹耀珠、弟弟耀庭）

去年5月，家燕姐大病初癒出席家電廣告宣傳活動，「當日我係以媽咪經理人身份去的。」

2008年，Justina還在LA工作，媽咪和妹妹（左）飛過來探望她，「那時得我一個人，好掛住屋企，工作遇問題時仲好想同媽咪分享，佢喺呢行咁多年，好明白我感受，畀嘅意見亦好幫到我。」

努力創明天

Justina為薛家燕三子女中排行最大，有一弟一妹，18歲負笈美國加州大學修讀傳理及日文，畢業後先後加入MTV台、全美最大規模經理人公司William Morris Agency，星河娛樂公司創辦人，現為家燕媽媽世界有限公司及家燕媽媽藝術中心董事總經理。

1993年，家燕媽媽（左）帶當時六歲及四歲的Justina和耀庭（右及中）到馬來西亞旅行，參觀當地的水族館，「當年妹妹得兩歲，太細了，所以無隨行。」

2000年，家燕姐獲頒榮譽勳章及準備舞台劇演出，Justina（左）就聯同弟弟耀庭（右一）及妹妹耀珠（右二）親手做了一張橫額置於電梯大堂，讓媽咪一出「車立」就看到，開心不已。