忽然1周 750 期雯女戀火暗燒　柴九為妻拒愛 @ 明星靚相大分享☆

我係好欣賞祥仔。（真實對白）
我只當佢係好拍檔！（真實對白）

上周五（ 4日）晚舉行的《萬千星輝頒獎典禮 2009》，好拍檔柴九黎耀祥和四奶奶鄧萃雯雙雙獲封視帝視后，成就一個完美結局。
可惜現實並不完美，頒獎禮後隨即爆出雯女愛上祥仔，更被指與柴九嫂 Julia搶老公。本刊訪問雯女，她亦答得曖昧：「我好欣賞祥仔，但欣賞一個人唔係一定要擁有！」
43歲嘅雯女戀火暗燒，但早有妻兒的祥仔為了大好家庭，惟有拒愛。而身為柴九嫂的 Julia亦一早出招，發動親友及 fans自製相簿箍老公。難怪本周一（ 7日）晚祥仔回應與雯女緋聞時，決絕明言：「我只當佢係好柏檔！」

啜爆老婆
祥仔奪得三料視帝後，除了在台上表示會將喜悅跟太太一齊分享外，在後台亦跟太太 Julia來個情深擁吻，一切盡在不言中。

上周五（ 4日）晚舉行的《萬千星輝頒獎典禮 2009》賽果令人滿意，就連收視成績亦是歷年之冠，平均收視 40點。祥仔黎耀祥贏得「我最喜愛的電視男角色」一幕，更錄得最高 44點收視。柴九贏得觀眾歡心，也令雯女（鄧萃雯）暗暗傾慕。
由頒獎禮提名開始，雯女已不只一次公開表示希望祥仔得獎多過自己，每次見到祥仔也擺出一款冧爆樣，欣賞之情表露無遺。上月 26日，雯女拍攝眼睛養潤水廣告時，她亦無端端大讚祥仔：「佢對眼真係識做戲，《巾幗》講佢去上海醫病嗰場戲，就算佢帶住個口罩，淨係靠對眼，一樣交到戲俾我。」

問柴九嫂會否呷醋

對祥仔讚不絕口的雯女，頒獎典禮當晚，表現更加瘋狂。當晚雯女見到祥仔率先奪得「 tvb.com人氣大獎」及「我最喜愛的電視男角色」兩獎時，即表現 high爆，不但大聲歡呼替對方打氣，忘我鼓掌時又搞到手鏈飛脫，要祥仔親自為她執番。祥仔的細心更令她心花怒放，笑個不停。
雯女奪得「最佳女主角」後到後台接受傳媒訪問，未完成已雞咁腳走返台前。記者問她為何咁急鬆人，她大大聲話：「我要睇柴九攞獎呀！」柴九果然無令四奶奶失望，奪得「最佳男主角」。祥仔上台領獎經過雯女身邊時，雯女即飛撲上前擁抱祥仔，比自己得獎更加興奮。
頒獎禮完結後，雯女和祥仔在無綫電視城門口接受 fans祝賀時，雯女亦主動踩場加入祥仔 fans陣營，更在祥仔妻兒面前，傍若無人親暱地靠向祥仔合照。據知，雯女曾私下問過柴九嫂 Julia：「我同祥仔咁 close，你會唔會呷醋？」當時 Julia就大方表示唔介意，還跟她說：「我覺得你同祥仔喺熒幕上好襯。」自此，雯女更經常致電祥仔，又問他頒獎着咩衫，希望當日襯絕出場。

雯女見到祥仔得獎一刻，比自己得獎表現得更興奮，飛身撲埋去攬住祥仔一刻，相信連祥仔都始料不及。

雯女興奮到連贊助商贊助的 2千萬鑽石手鏈都飛脫。祥仔細心為她在執番，令雯女相當感動，一副冧樣對住祥仔冧笑。

老婆自製相簿箍老公

上周六（ 5日）祥仔奪獎翌日，下午趁空檔跟來自上海、台灣及美加的 fans午餐聚會。柴九嫂 Julia突然送上親自構思及製作的紀念特刊《心隨祥動》給老公，令祥仔非常感動， Julia箍老公果然有計。
Julia 花了個多月時間製作這本《心隨祥動》，除了請祥仔的親友撰寫感想之外，也搵 fans幫手找來祥仔多年來拍過的電視電影圖片（左圖），製作成書。 Julia更在序言（下圖）狂冧老公，言詞相當骨痹，其中一句：「我亦相信您和正橋會為我這個幸福的人生好好地努力。」似暗勸老公要全心全意對她和兒子，果然用心良苦。

祥仔圖輯

搵阿仔幫拖
祥仔獨子黎正橋也在特刊內寫上感想，但不及媽咪 Julia情感豐富。

冧爆序言

雯女專訪：愛到為對方死都甘心

上月 26日，雯女拍眼藥水廣告時，有意冇意亦提起祥仔對眼識做戲，言談間對祥仔有讚冇彈。
得獎當晚，《巾幗梟雄》演員拉大隊到尖沙嘴正冬火鍋店消夜慶祝，雯女接受本刊訪問時，答得相當曖昧。

（記：記者，雯：鄧萃雯）
記：今次能夠得獎嘅關鍵喺邊呀？
雯：我諗係民意好厲害，加上傳媒嘅吹捧，反而我自己就好輕鬆。四奶奶個角色好正面，佢做咩都唔係為自己，一個咁有情有義嘅人好難得。
Q記：我知你曾經問過 Julia，你同祥仔咁 close佢會唔會呷醋， Julia就答你唔會。點解你會咁問 Julia？
雯：其實同祥仔拍緊劇時唔係好熟，到後尾套劇出街，成日一齊宣傳，發覺大家好一條心，友情係喺嗰陣時建立。做咗咁多年戲，我好珍惜有心有火嘅對手。我睇佢啲訪問，對佢多咗了解，真實嘅祥仔係個好有毅力同天分嘅人，好難得我同佢咁有默契，大家嘅演出有咁大火花。我哋亦建立咗一種互助嘅關係，我亦都好欣賞佢。但係欣賞一個人唔需要擁有，可以係冇私心嘅。咁樣嘅關係可能仲長久，就好似柴九對四奶奶嘅愛咁，愛到為對方死都甘心。
記：咁講法會唔會好期待三月再同祥仔合作？
雯：當然會啦！但係唔會有壓力，因為最經典嘅都完成咗，所以今次只係盡力用心去做。

12月 4日　慶功宴黐到實

上周五晚(4日)祥仔在電視城門口接受 fans祝賀時，雯女突然殺出，還跟祥仔黐到實合照。

去到慶功宴現場，祥仔跟雯女接受本刊訪問時，在記者要求下才跟雯女來個祝賀的擁抱，明顯有點避忌。

12月 5日　一連串慶祝活動

祥仔封帝後翌日早上 8時便要為《畢打自己人》開工， Julia只瞓兩小時也親自開車送老公到現場，實行 mark到實。

一千蚊萬歲
封帝後首日開工，祥仔識做地即場拿出一千元「萬歲」，請工作人員食早餐。

舉杯賀視帝
祥仔的 fans由世界各地，包括上海、台灣及美加來港支持他，結果沒有令他們失望。 fans更前往探班，當日大家在現場順道慶祝。

貼身簽名
由於難得跟偶像見面，故 fans們要求祥仔在他們的衣服（圖）及銀包上簽名。

隱世風水師助事業

深井碧堤半島

45歲的祥仔透露兩年前得到隱世風水師苗師傅相助，搵到位於深井碧堤半島的風水屋，令事業更上層樓。祥仔說：「嗰時我喺廣播道間屋有啲舊，咁啱識到苗師傅，佢覺得我間屋未夠好，提議咗幾個地區俾我。我睇中咗深井碧堤半島，師傅覺得座向好啱我，不過要喺睡房西南面擺對獅子。之後我就接拍《巾幗梟雄》，苗師傅仲問我想唔想攞獎，我話唔想，當時佢只係笑，估唔到真係攞到。」
苗師傅非常低調，客人只可以傳真與聯絡。本刊邀他訪問，但遭拒絕。
其實雯女拍劇對對手動情都唔係第一次，最轟動要算是 96年與江華合作《我和春天有個約會》時傳出戲假情真，江華一連 6日到雯女家出現。事件爆出後令雯女背負「狐狸精」之名，形象跌落谷低。前車可鑑，雯女今次明顯對這段情較克制，加上祥仔處理得相當小心，完全沒有俾機會雯女，令這段情未有進一步發展。
祥仔能夠把持得住，皆因本身家庭幸福美滿，太太 Julia兼任他的經理人，在公在私一腳踢為他打點。而眉精眼企嘅 Julia見雯女來勢洶洶，亦早作預備，繼去年賀老公奪得「最佳男配角」送上名錶後，今次又花心思設計了一本集結祥仔廿多年演藝歷程的相簿送贈老公，更在序言寫盡甜言蜜語。有賢內助及愛子正橋，祥仔自然懂得珍惜。

祥仔避雯女
本周三（ 9日）晚，祥仔宴請《巾幗》台前幕後慶祝，祥仔明顯跟雯女保持距離。記者要求他們合照時，祥仔即拉其他人一齊影。

之後祥仔拉着太太 Julia（右一），雯女（左）則隔着珍姐曾勵珍（左二）才肯一齊坐。

祥仔煞有介事

本周一（ 7日）晚，黎耀祥到灣仔會展為海關職員的晚宴任表演嘉賓，對雯女這份情義表現得無福消受：「唔單止雯女，好多人都欣賞我，添哥都好欣賞我，唔通又想同我一齊咩！我都好欣賞雯女嘅專業，佢捱得又好戲，我哋嘅感情係建立喺工作上。大家好有默契，我當佢只係好拍檔！」
當晚陪同祥仔演出的 Julia，亦勝劵在握說：「祥仔一收工就返屋企，我對佢絕對信任。我都好欣賞雯女，你哋唔好再傷害佢，佢未嫁就搞到形象咁。」問到 Julia近期經常陪伴祥仔工作，是否為防第三者埋身？祥仔即醒目搶答：「係因為我太忙，想爭取時間見佢同個囝囝，先叫佢哋陪我開工咋！」祥仔和太太咁恩愛，相信莫講話雯女，如果現實中四奶奶真係出現，都未必撬得甩。

祥仔兩段婚姻

祥仔一收工就返屋企！（真實對白）

45歲柴九黎耀祥與老婆 Julia梁耀蓮及囝囝正橋一家三口最近曝光率奇高，原來幸福背後祥仔曾經歷過一段破碎婚姻。祥仔 93年與拍拖 10年嘅中學同學阿麗結婚，同年拍攝古裝劇《俠女遊龍》期間，與當時身為李麗珍助手嘅 Julia撻着。有傳 Julia明知祥仔有家室仍主動出擊，導致祥仔與阿麗婚姻破裂。 94年祥仔與阿麗正式離婚後， 97年與現任太太 Julia奉子成婚。有傳祥仔母親對 Julia破壞家庭幸福而極之不滿，誕下囝囝正橋後婆媳關係才開始軟化。

本周一（ 7日）晚，祥仔活動後跟太太大方接受訪問，但問到有關雯女戀火暗燒一事，兩公婆異口同聲表示無可能。

雯女苦戀多

43歲嘅雯女今年終憑《巾幗梟雄》四奶奶一角初嚐視后滋味，事業相當得意，可惜感情狀況一直真空。多年來傳緋聞嘅男士唔係已婚，就係失婚，情路可算坎坷。

戀萬子