呢頭迪士尼開完個反斗奇兵大本營，勾起你十六年前睇第一集時嘅親切感，估唔到呢邊箱海洋公園仲勁，新開園區造型十足當年《回魂夜》星爺日玩夜玩嘅荔園遊樂場。
主打新開嘅雙腳凌空過山車，夠刺激之外，仲以鮮紅、黃色打造，入口處個巨型小丑，復古味濃，仲有地上啲碰碰車、攤位遊戲設施，重現數十年前港產遊樂場神韻。
《FACE》Gadget版監修人903 DJ Donald
我好鍾意玩機動遊戲，等咁耐，終於有呢款雙腳懸空過山車。我好期待快啲有人收埋部攝影機，將玩嘅過程偷拍落嚟分享。順手喺度提大家，經我多次親身經歷驗證，玩過山車前，千祈咪飲可樂，一定嘔！
雙腳離地 倒插落海過山車
迪士尼樂園要合家平安，想撞鬼同玩刺激度高玩意，海洋公園係全港唯一選擇，新開園區正係主打刺激度爆棚嘅「動感快車」過山車。呢架動感快車設計好classic，典型360度大迴環，加鮮黃撞紅色設計，以為佢好似唐唐落區咁親民，估唔都真係扮嘢嘅！原來此車seat位係冇腳踏，以全港最極速過山車時速88公里沖上天，雙腳凌空勁吹風，加上依山而建，路軌一兜出海面再180度反轉，唔只冇腳踏，直情地面都冇埋，真係有倒插落海嘅快感，刺激感滿分！
全程跟拍 玩前玩後兩個樣
一早就知「動感快車」夠激，我哋仲安排「特技人」跟車，戴住攝影機上頭邊玩邊拍，從主觀視點睇，斜路盡頭好似要跌落海咁。連佢自己都話緊張到起雞皮毛管戙，條片仲錄晒成班玩家嘅尖叫聲！
Point 1 上半山
見部過山車一路愈爬愈高，兩個model開始覺得唔對路，笑得勉強。
Point 2 準備中
幾乎九十度垂直，唔好話兩位model已經唔識畀反應，連攝影哥哥都驚到要坐正個人，影唔到旁邊啦！
Point 3 衝落海
高速插落海，呼呼北風已將兩把黑髮吹晒向頭頂！
Point 4 海面倒豎葱
最恐怖位實係呢個360度反轉大迴環，喺主觀鏡頭睇，對腳真係可以凌空踢住個天。
玩後感
玩完落番地面，Rika同Jumbo猛話離心力好勁，所以攝影師就叫佢哋影飄浮相交代感受。 Rika：上到頂啲風真係好甘，張開口時連臉皮都吹到脹起！ Jumbo：你哋好殘忍呀！我腳都未企得穩又要人跳住影相！
動感快車Hair Raiser
刺激度：★★★★★ 遊玩時間：55s 總高度：41.7m 座位數目：28 最高車速：88km/hr 身高限制：140cm以上
動感天地 場地資料
位置：高峰樂園海洋公園開放時間： 2011年12月16日前（10am至7pm） 2011年12月17日至23日（10am至8pm） 2011年12月24日至2012年1月2日（10am至9pm）門票：成人$280/ 3-11歲小童$140 查詢：海洋公園（3923 2323）
翻天覆地 反轉再反轉
「動感天地」新開張，想玩多轉過山車可能有排等，不如行多兩步試埋呢架反轉地心吸力嘅「翻天覆地」，除咗圓盤形背靠背排排坐嘅seat位會水平自轉，佢本身仲有支巨型吊臂，會360度垂直不斷fing，用強勁嘅臂彎拋你上九霄雲外。Model話俾部機拋上最高點半空倒吊，真係驚到腳仔軟，驚嚇度滿點，唔怪得呢部機推出已近1年，仍然係樂園入面必玩至激item。
試玩前
呢個位仲未到最恐怖戲肉，兩個model仲可以對住我地支長炮笑騎騎畀戲。
全程拆局
玩後感
又自轉又公轉，喺樓下睇都覺暈，我哋專登準備咗紅膠紙畀model行直線測試頭暈度，Rika真係腳步浮浮行一行就走出紅線範圍，Jumbo稍帶醉步都都叫冇出界，玩玩吓Rika仲話有啲想嘔玩多次頂唔順咁話，記得喺食飯前至玩呀！
翻天覆地The Flash
刺激度：★★★★★ 總高度：22.8m 座位數目：24 身高限制：137cm以上、195cm以下
雷霆節拍 Pat Pat撞埋一堆
過完山、翻完天，都係時候輕鬆一下，搵個簡單小玩意定吓驚，呢個「雷霆節拍」一幅懷舊小丑背景加上七彩繽粉嘅車卡，仲有音樂配襯，甚有合家歡味道。不過其實入面暗藏玄機，車卡隨節拍沿住起伏不定嘅路軌前後高速轉動，強大離心力令乘客好似坐緊吐露港公路啲亡命小巴咁，就算旁邊三唔識七都會fing埋一齊相親相愛，所以一定要約心目中嘅女神/男神一齊玩，拉近彼此距離。
玩後感：「坐外面撞得勁啲！」
Jumbo：比較輕鬆嘅一個遊戲，最過癮係轉到兩個人fing埋一邊，真係掹都掹唔住。 Rika：坐埋邊嗰個會撞埋外邊，坐外邊會幾痛，男士記得讓女士坐埋邊個位。
雷霆節拍Rev Booster
刺激度：★★★ 直徑：15.6米座位數目：60 身高限制：130cm以上
佔地寬敞 攤位遊戲應有盡有
「動感天地」喺山上自成一國，面積頗大，設備齊全，除咗有餐廳，仲有攤位遊戲同精品店，喺度可以玩足1-2個鐘都冇問題。攤位遊戲大致上同山下嗰堆差唔多，有20蚊同50蚊兩種收費，貴啲獎品大份啲，不妨挑戰一下。
超速旋風 上高空睇靚景
嚟到第4站「超速旋風」，外形繼續玩復古，似足舊時遊樂場嘅滑翔飛機。最正係坐落喺山緣，坐上去起飛除咗睇晒成個動感天地景觀，仲能夠睇到山下深灣區海景。推介你喺5點左右，有少少夕陽嘅時分同情人一齊玩，風景靚得來又唔怕天黑大風，一面高速轉動一面欣賞日落美景，Romantic！
靚景影畀你睇
「動感地帶」坐落喺海洋列車高峰站旁邊，地勢可以話處於海洋公園最高點，仲要背山面海，望出去可以睇到晒成個香港仔、深灣海景。正式玩嘅時候就唔畀遊人拎住相機嘅，係傳媒預覽先至影得，就睇吓坐咗上去睇到咩景色喇，唔使下下乜都 要影低嘅。
小貼士 座位旁有控制桿
座位中間原來有支控制桿，官方資料就話呢個操控桿可以自由調控滑翔機嘅高低，拉一拉佢亦真係會見到機翼左右擺改變食風方向。不過用落發覺用途唔大，觀賞作用多於實際。
玩後感：「景色靚似坐飛機」
Rika：高速旋風轉動速度算一般，不過高度夠，加上佢轉動時架飛機會稍為傾斜，真係幾有飛行嘅感覺。 Jumbo：個景真係好靚，不過支操作桿用落變化唔大，用完都唔有升高降低。「超速旋風」唔算轉得好快，但佢全高32米，比翻天覆地更高，加上旋轉時機身會向外傾斜，成個人側住嚟飛好有喺天空上面翱翔嘅感覺。試玩完之後，model當然冇過山車同翻天覆地咁驚，不過都話好高，同轉落有少少暈，雖然佢係sell浪漫靚景都唔好睇小佢呀。
超速旋風Whirly Bird
刺激度：★★★ 總高度：32米座位數目：32 身高限制：122cm以上
橫衝直撞 安全駕駛碰碰車
有啲合家歡小遊戲襯托吓，先顯得出動感快車夠激，呢架「橫衝直撞」碰碰車設計唔算得意，又只限單向行駛，但勝在似足香港路面：路窄車多，幾乎隔幾秒就俾人狠撞！仲有樣嘢，原來部車一「畀油」都開得幾快，雖然攝影師睇落就唔覺車速去到成14.5公里，但兩位model玩落就猛叫：「太快啦！」大家撞來撞去、不斷追車搵人報仇，所以即使刺激度屬最低級別，但好玩度極高。
玩後感
Rika：睇落車速唔快，其實俾人撞中車尾都會chok到條頸好應，玩時盡量挨後坐！ Jumbo：部車起步時加速力好高，畀人快快追上前報仇，好似玩孖寶賽車！
橫衝直撞Bumper Blasters
刺激度：★★ 遊玩時間：5min 總高度：N/A 座位數目：24 最高車速：14.5km/hr 身高限制：120cm以上
聖誕蜜熊 超sweet必買
海洋公園嘅精品都係以超萌動物做主打，少咗版權費，所以價錢相對迪士尼卡通精品抵玩。開新園區順勢推出新精品之外，仲可以掃埋新嘅聖誕精品做禮物，其中有隻新角色聖誕蜜熊，拍得住廸士尼公仔咁cute，比平時啲海獅海豚公仔更值得買！ ####
睇見model雙腳凌空飛落大斜路，做觀眾都驚埋一份。
1.頭段支起重臂會鐘擺式左右fing，用來增加動能，之後個擺動度就愈來愈勁，最終將玩家180扯上半空，呢段路程係慢慢行，反而令人覺得係暴風雨前夕，個心好不安！
2.最刺激位係拋上去時，不單會凌空倒吊，Jumbo話部機會忽然慢落嚟hold住唔郁，有種叫天不應叫地不聞嘅無助感，佢仲話坐佢左邊個勁淡定嘅大叔，都忍唔住齊聲喪嗌。
3.慢速倒吊完之後，即以1秒60公里時速急墜，呢個時間已warm up完，直接fing番上半天，真係一秒鐘都無得唞，全程轉4圈先可甩難。
Rika：暈過過山車，冇下次！
雖然有扶手，但係入面嗰個都係揸唔實嘅，一定會fing到黐埋一嚿。
雖然唔似其他遊戲會拋上天，但係轉動速度頗快，用1/100快門都影到鬼影，仲會玩玩吓倒後轉。
總共有7個攤位遊戲，唔啱玩機動遊戲亦可以喺度消磨一下時間。
扑青蛙最好玩，要將青蛙扑過去池上面嘅蓮花上面，好講力度控制㗎。
升到最高時，機身會向外傾斜，點點離心力加上高度都有一定刺激感。
一邊望向海，可以睇到山下海景，左手面係深灣，右手面就係香港仔避風塘。
另一面向山，睇到動感樂園全景，另外睇到正在興建嘅係冰極天地企鵝館。
飛上
飛落拉動控桿會睇到機翼左傾或右傾，但係飛咗上去又唔覺又好大高低起伏。
地方細細，令到單向行駛都可以玩到三車串燒，睇吓model玩到幾high就知。
因為車速頗快，場內係禁止逆時針駕駛，免得對頭車炒埋一碟。
你睇，場邊都寫明One Way Only，咪唔守規則呀！
場內冇正式賽道不過中間有個安全島控制行車方向。
動感天地入面有個精品店，以嘉年華做主題，最搶眼係大大隻動物毛公仔坐喺摩天輪上面，好想唱番首〈幸福摩天輪〉。
兩個女仔都好buy呢隻戴住暖耳罩嘅聖誕蜜熊公仔，冧女必選。$139
想實用少少，可以揀聖誕相架吊飾，一物兩用非常抵買。各$45
熊貓公仔一向係海洋公園熱賣貨，聖誕節點會冇佢份出新公仔。大$129，細$89
想買件紀念品證明到此一遊又怕阻地方，動物嘉年華精品磁石貼係不二選。各 $29-$45
留言列表
