點解養鬼仔？ @ 明星靚相大分享☆

我自小喺泰國長大，八歲開始跟和尚學法，先後有三個師父話我大個會賣佛牌，做佛門生意，結果師父無講錯，我十六歲跟父母來港做生意，本來幫屋企賣泰國雜貨，到三十歲忽然想弘揚佛法，結果去咗旺角鼓油街開鋪賣佛牌，賣咗十二年，生意越做越好，而家喺旺角有三間分店。

信不信由你，香港其實好多人養鬼仔，養鬼仔又叫養古曼童（古曼童係泰國譯音，運財童子咁解），其實用乾屍做古曼童，係最惡毒嘅一種，法力強到可以令你仇家慘死，但自己都會有好大報應，隨時被古曼童反控制，所以極少人掂呢味嘢。香港見到嘅古曼童，主要係用嬰孩骨灰同墳場泥土做成。泰國師父會將泥土同骨灰搓成泥公仔，再唸經將嬰魂召喚入公仔。我鋪頭入面一隻最平賣五百八十蚊，最貴可以賣到八萬蚊一隻！至於點養？首先要幫佢哋改個名，然後每個禮拜要買新零食，每年買新玩具，食飯前最好同佢哋講聲「開飯喇！」咁佢哋就會開心，幫你帶嚟財運。

全靠互聯網發達，網上好多人討論養鬼仔，我每個月起碼「送」出六十隻古曼童。幫襯我的，好多都係生意人，佢哋當古曼童係運財童子，希望生意興隆。最誇張係有個客，做紅酒古董生意，初頭都唔係好信，但養咗一隻之後就賺大錢，而家前後用二百萬買咗三百幾隻，再响大陸用三百萬買咗間屋俾班「仔」住，仲請埋工人照顧佢哋。另外有幾個客，得十五、六歲，錢都未識搵就話要養，佢哋話想接觸吓靈界。養鬼仔其實响香港都幾普遍，我而家每個月生意額有十幾萬。都係，信不信由你。 ####

劉永傑　43歲　香港佛店老闆香港不少佛店有「鬼仔」出售，劉永傑的佛店每日便擠滿客人，希望透過養鬼仔轉運。