蔣怡結婚生仔－明星靚相大分享☆

模特兒出身的蔣怡（CoCo）近期回流返港，主力拍戲及做主持，她揚言不會走回頭路再當模特兒，對她來說，模特兒已經是過去式，展望將來，除了希望事業有所突破外，亦期待愛情終可修成正果。

7年之癢變成熟

跟設計師男友翁狄森（Dickson）已拍拖10年，CoCo笑言二人經歷過「七年之癢」，可幸當時CoCo決定到台灣發展才避過一劫：「諗番如果嗰時我冇去台灣，依家一定分咗手，因為拍到第7年佢事業上有好多變化，壓力大嘅話我哋一定會鬧交，我反而覺得後來分開係件好事，畀個機會大家一齊長大！」她認為這種離離合合的相處方式最適合他們，因為朝夕相對很快便沒有新鮮感。回想起在台灣的日子，CoCo與男友聚少離多，但彼此都珍惜每次相聚的機會：「我哋成日飛，有時會約喺機場見面，見嗰陣真係好開心，不過一陣就要分開，我試過喺機場度勁喊！」

從台灣回來後，CoCo自覺成熟不少，與男友關係更勝從前：「以前佢每次飛親我都好唔開心，因為除咗做嘢之外，我成個世界都只有佢！依家獨立咗，就算佢唔喺屋企，我都會識自己搵嘢做！」其實CoCo認為拍拖久了，結婚與否都沒有所謂，最麻煩的是身邊每個人都問她何時會拉埋天窗：「其實我都會諗，結咗婚會覺得自己地位唔同咗，不過淨係得我諗冇用，睇吓幾時得閒啦！」她表示結婚後最想生仔，全因男友愛小朋友：「我冇話特別鍾意小朋友，不過知道佢鍾意，同埋自己生嘅應該會鍾意多啲！」

蔣怡自爆曾學周秀娜及Baby的寫真擺甫士。

棄天橋轉攻拍劇

江蘇出生的CoCo，大學畢業後隻身來港闖天下，後來因與周星馳拍啤酒廣告而成名，近年更以「過江龍」姿態轉戰台灣。離港後，CoCo在台灣拍戲及做主持，已甚少接觸模特兒工作，既然已放棄這麼久，CoCo亦沒有打算「吃回頭草」：「當初因為身高，成日有人搵我做Model而我又諗唔到做咩咪做住先，我都做咗Model四年，夠晒啦！」對於模壇後起之輩，令她印象最深的是周秀娜及Angelababy，偶爾更向她們偷師學擺Pose：「我有睇過周秀娜本寫真，有張刷牙相，我有時都會喺屋企扮佢然後自拍！」對於「o靚模現象」，她認為絕非壞事，因為她們的身形貼近普羅大眾：「唔一定要高先可以做Model，只要着得靚就得，同埋影相就算係普通身材都可以影到個效果，而且佢哋Cute啲同親民啲！」

愛旅行做「教煮」

世界盃臨近，CoCo將會為有線主持世界盃特備節目，在開賽前與現場觀眾玩遊戲「熱身」，對於世界盃，CoCo可以說是「零知識」：「足球員我淨係識碧咸同C朗，開頭搵我做主持我都覺得好奇怪，後尾先知原來唔係要我講波！」她笑言經理人最愛為她接充滿挑戰性的工作。在眾多節目中，CoCo最愛主持旅遊及飲食節目，她閒時都愛在家中煮食，在有線更有「CoCo教煮」之稱，原來她曾考慮到法國學廚：「我出嚟做嘢之後先學煮嘢，最鍾意整甜品，其實好多嘢喺外國煮同喺香港煮好唔一樣，喺香港始終煮唔到外國嘅味道。」而主持飲食節目更是她的拿手好戲，她即將到台灣為亞視主持飲食節目，早前她已多次介紹台灣美食，吸引了不少香港捧場客：「有次我喺香港搭的士嘅時候，個司機同我講佢有睇過我主持嘅飲食節目，仲話之前係因為睇完我個節目先去台灣！」

後記：夢想非洲行禮

曬得一身黝黑肌膚的CoCo深信前世是非洲人，雖然好友Lisa S.已先她一步於非洲舉行婚禮，但若她結婚亦會選擇於非洲，因為每次到非洲都有新體驗，有次她坐車到草原觀光時，更試過有大象伸鼻在她面前搖晃，而非洲人的熱情好客更是她始料不及。