壹週刊 1046期金屋藏Lynn　熊黛林換大屋　郭富城俾錢 @ 明星靚相大分享☆

早上九時許，戴着黑超的阿 Lynn步出新居大堂門口，準備出外工作，保安體貼地幫她開門。"
娛頭
金屋藏 Lynn　熊黛林換大屋　郭富城俾錢
2010年03月25日
郭富城與熊黛林（ Lynn）拍拖四年一直無風無浪，就算去年發生偷芒事件（ Mango王秀琳），阿 Lynn淡定沉着應戰加晒分，城城亦相當識做，在今個農曆年，除自爆情人節前夕買花，又同阿 Lynn拍拖打邊爐，地下情浮晒上面。
戀情升溫，就連天王嫂寢宮都要升呢。據知，近日城城幫阿 Lynn另覓新居，最後落實租住大坑過千呎豪宅，租金由城城負責。細屋搬大屋，城嫂身價，今時唔同往日！
城城搵樓
城嫂地位已經半公開的阿 Lynn，拍拖四年，天王對女友有求必應。
今年一月，阿 Lynn表示羨慕同公司的 Model姚予睛買樓做業主，自爆有意置業，平日有時間便四出睇樓，至於物業理想地區，阿 Lynn開到口要繼續同城城做街坊，打算在大坑附近買樓，預算大約六百萬。
記者問阿 Lynn，何不搬近城城寢宮，她即撒嬌說：「佢（指城城）住街頭（大坑），嗰度好貴，我節衣縮食都買唔起，只住得起街尾。」
女友隔空詐嬌，城城馬上行動，秘密為阿 Lynn搵樓，目標單位要在他位於大坑道嘉園寓所附近。但睇樓多時卻未遇上心水樓盤，加上近期樓價持續炒上，最後阿 Lynn暫時擱置買樓計劃，繼續做租客。

城城親自出馬為阿 Lynn搵樓租樓，二人暗交四年，戀情愈見公開。（《忽然 1周》圖片）

被記者問及剛入伙的千呎亳宅，租金是否由城城支付？阿 Lynn碌大眼連聲否認。

買了大袋日用品，阿 Lynn與母親借用超市的手推車把物品運上坐駕，再駕車由渣甸山返回大坑新居，之後再到舊居執手尾。

17/3
披着披肩的阿 Lynn與母親分頭在超市掃貨，買完疏果，阿 Lynn又買洗衣用品。

自由行來港的熊媽媽，與阿 Lynn在街頭大啖啜乳酸飲品，津津有味。

阿 Lynn母女在寵物店大量搜購，買完狗糧又掃狗狗沖涼液。

買完狗糧，阿 Lynn駕駛當年傳聞由城城送給她，換了碳纖呔鈴的 Mini Cooper坐駕，返回大坑新居。

享受靚景
阿 Lynn新屋位於大坑道一號，樓齡雖近廿年，但位於半山位置，居高臨下，景觀及空氣一流。新居面積有 1085呎，實用面積達八成多，三房兩廳連套廁地方非常闊落，一個人住，夠晒寬敞。

阿 Lynn新居的客廳非常巨型，廚房（下圖）間格多夠實用，請城城同埋大班朋友返屋企打邊爐都夠晒位。

新居戶戶窗口對正中央圖書館及維園，非常開揚。

城城唔想女友失望，於是提議「住好啲」租過另一間屋，最後睇中大坑道一號，市值近千萬的千多呎三房豪宅，城城還大破慳囊，孭起每月三萬二千元租金，阿 Lynn可以細屋搬大屋，升格住豪宅，新居與城城寓所亦只需四分鐘車程，非常方便。
城城金屋藏 Lynn，阿 Lynn的母親上星期更特別從南京飛來香港，幫女兒打點搬屋事宜。上星期三（十七日）下午，已搬到新居的阿 Lynn，駕着黑色 Mini Cooper與母親外出，為新居添置家品。她們先到渣甸山的 Market Place買餸，阿 Lynn選購了大量蔬果，其母則主攻購買日用品。之後兩母女返回新居放低物品抖一抖，再駕車到騰黃閣舊居執拾善後。個多小時後，二人身水身汗離開，阿 Lynn更要即場到樓下的便利店，買了兩支乳酪飲品一人一支狂啜，非常口渴。

4/3
阿 Lynn與城城前後腳現身灣仔王子酒店，為避開記者，阿 Lynn在街上放狗，之後再閃入酒店內的火鍋店，與城城及其友人打邊爐（右圖）。

城城當晚駕駛的 GTR戰車，換上「 NN」阿 Lynn英文名縮寫的新車牌。

城城叫埋老友張智霖做電燈膽，同城嫂齊齊打邊爐。

情人節送花
城城錫晒，阿 Lynn能夠在過去四年穩坐天王嫂位置，其實得來不易。
去年城城以戰車接載王秀琳（ Mango）爆出「偷芒」事件，令「黛富戀」一度出現危機。城城為補鑊，趁十月阿 Lynn廿九歲生日，出錢出力請壽星女飛到泰國陪他拍新戲《 B+偵探》兼共慶生辰。明知去到邊都有記者跟出跟入，一反低調常態的城城只為搏紅顏一笑，今次泰國精華遊，證明戀情又再升溫。
由「秘戀」變「明戀」最佳例證，包括剛過去的農曆新年。今個大年初一撞正情人節，城城自爆年三十晚到維園年宵花市買紅玫瑰。問佢係咪買俾阿 Lynn？城城雖然例牌扯開話題，但一副冧樣大家有晒答案。

阿 Lynn去到城城至愛品牌 Prada shopping，專攻男裝部，最後買了一個男裝銀包（左圖），相信是送給城城。

高調歎火鍋
本月初，二人前後腳到灣仔謝斐道打邊爐。當晚城城駕駛阿 Lynn英文名縮寫「 NN」車牌的 GTR戰車，心情勁靚打埋呔現身，在停車場泊好車後，便步行到火鍋店。
十分鐘後，阿 Lynn亦駕車出現，但刻意把車泊在另一停車場，然後拖狗會城城，打邊爐歎足兩個小時才前後腳離開。事後有記者提起今次約會，阿 Lynn笑到見牙唔見眼說：「同佢（城城）歎火鍋一定會食得好飽，其實普通食飯啫！好簡單好簡單咁食。」關係不言而喻。
識做女友

週一阿 Lynn出席《葉問 2》記者會，被甄子丹攞佢同城城的緋聞開玩笑：「熊小姐已經搵到好男人啦，你個好男人喺邊？」

細屋搬大屋的阿 Lynn，本週一（廿二日）早上戴住黑超步出新居，到中環整頭髮，記者問她關於城城安排搬新屋一事，阿 Lynn呆了一呆說：「吓！我自己揀 o架，係公司負責。（城城知唔知你新地址？）我有通知（甜笑），所有朋友都知我搬咗屋。」雖然有城城御准，阿 Lynn始終唔敢太高調，咁識做難怪城城錫到燶。
住屋三級跳
熊黛林自從榮升「城嫂」後，由國產 model變成模界一姐，身價三級跳。有天王照住，「城嫂」由宿舍到今日進駐大坑豪宅，愈住愈豪。
06年，「城嫂」初來香港報到，被公司安排入住上環模特兒宿舍，五百呎單位四五個人住，要 share房間。升格「天王嫂」後，熊黛林身價暴漲， 07年秘密搬離宿舍，搬到大坑益群道獨居，前年更搬到天后半山豪宅騰黃閣，月租二萬元。最近，熊黛林再度「升呢」，進駐月租三萬二千元的大坑道一號豪宅，今非昔比。

公開示愛
熊黛林與郭富城的戀情愈見浮面，近幾個月二人更不時隔空打情罵俏，相當肉麻。

送內衣
上月初熊黛林出席活動時被問到有否收過內衣做禮物，她直認：「有收過男友送嘅內衣做生日禮物。」問到係咪城城送？她即說：「唔講喇，咁多男人聽住。」

想合作
今個月初，熊黛林被問到會否效法樂基兒加盟黎明的經理人公司，夫唱婦隨，她答得夠大方：「做情侶沒問題。公私分明嘛！如果跟城城合作，我一定學到好多嘢。」

讚靚
去年十一月熊黛林打扮性感出席台灣金馬獎成功搶鏡，事後城城開口大讚：「佢係超級名模，無辦法啦！」更說：「愈性感愈好！名模乜都靚。」

戴城上身
一月尾，熊黛林於首飾店開幕禮中，被大會安排戴上一條代表 Aaron Kwok的「 AK」字母頸鏈，阿 Lynn即場甜笑說：「我很喜歡，將來也有很多機會戴上！」

講結婚
一向避談婚事的郭富城，出席新年活動時，自爆做完巡迴演唱會，以及完成音樂劇後隨時可以結婚：「等我有個人成就，再踏入人生另一個階段。」