壹週刊 985期小豬羅志祥暗交陪酒妹週刊雜誌精彩回顧 ★ @ 明星靚相大分享☆

小豬暗交陪酒妹

早排台灣奀星郭世倫節目《康熙來了》暗示小豬叫雞，女方更因為能夠同明星做一夜夫妻，願意分毫不收，是非一單接一單，小豬呢排真夠黑仔。

小豬羅志祥買榜是非仲未落幕，史前緋聞又無端端俾人擺上。
話說兩年前，小豬經朋友介紹認識日式酒店做陪酒妹「柔柔」。雖然話歡場無真愛，但皮膚白白淨、頭髮長長「柔柔」的確晒小豬杯茶，佢更加唔介意女方平日返工要服侍醉酒佬俾人毛手毛腳，甚至唔理白龍王「要紅，就要戒色」忠告，花半個月時間成功將「柔柔」追到手。

要求保密

有人打去報館報料話，小豬兩年前經朋友介紹認識「柔柔」，為求追到手，小豬採取密集式電話攻勢，每日幾 call 之餘，仲會住個電話彈鋼琴女。呢招雖然老土，但「柔柔」愈聽愈嗒糖，半個月後正式答應同小豬拍拖。
話晒偶像派，拍拖當然係不能說的秘密，小豬亦多次提醒「柔柔」唔好四圍同人講，所以每次拍拖，只能夠選擇半夜三更，就連小豬經理人都唔知有件咁事。

台灣陪酒妹話就話賣酒不賣色，但客人要求到、自己又接受到，就會私底下「交易」。外表望落斯斯文文「柔柔」亦唔例外，所以小豬強調從來無歧視陪酒妹工作，仲大讚「柔柔」為人孝順。

柔柔（圖左）

晒命累事

小豬情史都幾多，包括曾經同 S.H.E Selina 拍拖，最後因為女方情投黃子佼而分手，不過二人再見亦是朋友。

拍拖初期，原本相安無事，但做得隱形女友太耐，「柔柔」開始多多要求，不過唔係要男友送金銀珠寶，而係想小豬帶佢去電視台扮觀眾陪開工。
其實要求唔過分，但小豬怕節外生枝而一口拒絕。而「柔柔」亦漸漸開始唔守承諾，同朋友講自己男朋友係小豬，最後因為衰多口，兩個拍拖一年就分手。
爆陪酒妹戀情之前，小豬曾經講過兩年前同一位圈外女仔拍拖，因對方刻意將戀情公開，因而鬧分手，時間上同「柔柔」非常吻合，但小豬否認話：「之前我說的女友是一位大學生，我的確認識柔柔，但沒有交往。」有冇都好，呢排小豬明顯「犯小人」，爆完戀情又被指曾經帶小姐去酒店尋開心，白龍王提醒小豬戒色，未嘗無道理。