奶奶錫晒下令飛英安胎李嘉欣懷亨亨 B 發圍忽然1周 786期 @ 明星靚相大分享☆

李嘉欣自08年嫁許晉亨後，多次傳出佗B喜訊，但皆中空寶。眼見43歲家姐李嘉明再嫁兼下月就生得，嘉欣再度燃起生仔希望。除了搵生仔聖手何永超打救外，更叫老公許晉亨狂食中藥補身。多番努力之下，三個月前，40歲嘉欣終如願以償，成功為老公亨亨佗B。
據知，嘉欣首次佗B，許家上下大為緊張，老爺奶奶除吩咐傭人為新抱炮製一份全新營養飲食餐單，又下令嘉欣佗穩B後，即飛英國安胎，以免被傳媒騷擾。
這邊廂嘉欣有喜，過氣情人大劉原來在上周五（13日）已再度榮升老竇，女友呂麗君為她誕下慈姑椗。
嘉欣、大劉關係一直千絲萬縷，估唔到連生仔都要夾啱時間互相贈興。

李嘉欣自兩年前嫁入許家後，一直盛傳得不到老爺、奶奶歡心，為了能夠在許家發圍，嘉欣出盡法寶希望為許家開枝散葉。年多以來，多番嘗試各種生仔方法，除了求救不育聖手何永超醫生外，更試過人工受孕，依然未見夢熊之兆。
「嘉欣最初嫁俾Julian（許晉亨洋名），其實冇諗過生仔，不過佢老爺、奶奶得一粒仔，之前個新抱何超瓊咁多年蛋都冇隻，梗係想呢個新抱幫佢哋許家開枝散葉。不過嘉欣向來受軟唔受硬，早排仲講到明『結婚唔包生仔』，激到兩個老人家紥紥跳。呢排佢哋關係冇咁緊張，講到尾嘉欣一嚟想同老爺、奶奶關係修好，二嚟又想威俾佢兩老睇，加上自己又鍾意細路仔，所以嘉欣咪試晒所有辦法囉！」知情人士透露。

大劉慈姑椗8月13日
搶出閘贈興

李嘉欣生仔機會大
據知李嘉欣預產期為出年3月，玄學家吳佩孚說：「李嘉欣係火合貴人，火旺，得子機會大，佢條命係有兩個仔。出年係兔仔年，三月又係兔仔月，BB桃花極重，有機會再帶多個細佬，小朋友同阿媽嘅緣份特別好。」
另外，呂麗君於本月13日誕下男嬰，當日出生的小孩多數非富則貴。吳續說：「呢日出世嘅小朋友係『財氣通門戶』，係富貴命，但好細個就會離開父母去外國讀書，而且母親宮位重複，註定有好多契媽錫，同兄弟姊妹關係差啲。」

李母湯水速遞
李嘉欣有咗三個月，李母則不時到超市買大量水果。上周六（14日），她更先在家煲定靚湯水，再由司機載她到李嘉欣所住的曉廬寓所，果然廿四孝阿媽（右圖）。

老公狂啃中藥
雖然試勻所有生仔方法，肚皮依然未見動靜，今年踏入40歲高齡的嘉欣，開始為生仔着急，眼見43歲姐姐李嘉明年初成功懷孕，嘉欣再度燃起生仔希望。以往一直着重西醫療法的她，數月前得一位密友介紹，開始轉睇中醫，嘉欣本身除以中醫食療調理身體外，她又按照一份專供男性服用的中藥秘方，每日依時煲給老公亨亨食。結果三個月前，嘉欣成功懷孕。「嘉欣今次直情豁出去，以往我哋嗌到，佢間中都會出嚟玩吓，不過自從佢食咗中醫俾佢嗰份餐單後，仲跟足醫師吩咐戒夜蒲，晚晚十點鐘上牀瞓。佢老公同佢一樣，日日依時食中藥。之後嘉欣同我哋講，話佢兩公婆知道有BB嗰陣，開心到攬住喊！」知情人士透露。

老爺吩咐轉膳食
嘉欣成功懷孕，最開心莫過於老爺許世勳，自從得知新抱懷孕，許老爺即為她張羅日後在家中的飲食餐單，更吩咐家中傭人，所有餸菜一律以健康為主。「許老爺同許老太平時喺啲傭人面前叫佢（李嘉欣）做馬拉雞，早排許老爺走嚟同佢哋講話新抱有咗，仲吩咐傭人嚟緊要轉晒啲餸菜。佢兩老恨呢粒內孫恨咗咁耐，依家終於得咗，我諗佢兩位老人家今次應該好開心，如果個胎係仔，嘉欣喺許家更加企得穩啦！」
至於奶奶簡劍勳，對嘉欣態度更是180度轉變，由以往互不相干到現時經常要嘉欣回大宅食飯，又叫兒子要對新抱加倍愛錫，吩咐下人每天準備安胎補藥，務求新抱為許家誕下肥肥白白的愛孫。
除了緊張新抱飲食外，許老爺和許老太更要嘉欣佗穩BB後，要求她到英國的大宅安胎，以防狗仔隊騷擾，影響腹中胎兒。

李母攜湯水探女
自佗了亨亨B後，李嘉欣只間中出席活動，月初出席完舊愛大劉旗下商場「The One」內一間日本食肆的剪綵嘉賓後，自此一直留在家中深居簡出。活動當日李嘉欣更罕有地以鬆身衫上陣，上落台時更要經理人陳善之扶實，以防萬一。

李母避談用遮擋
本周一（16日），李嘉欣媽咪從睦誠徑寓所外出到銅鑼灣，對於記者提問，她十分口密，不發一言。之後更以遮擋住鏡頭，看來女兒未公開有喜前，她亦不敢對外表態。

微博露玄機
雖然嘉亨身邊人未肯透露半點口風，但李嘉欣近日在微博不時露出懷孕玄機。

8月14日，李嘉欣上載一張亨亨在家玩遙控直升機的照片，還表示：「在警告他要是弄傷我和毀掉家具，他就死定！」弄傷懷孕老婆，當然大件事啦！

本周二（17日），李嘉欣暗指有記者打亂了李媽媽、老爺奶奶奶等人的生活節奏，禁不住在微博留言，大表緊張。事後有網友留言，叫李嘉欣注重身心健康，唔好影響胎兒。

有心贈興
40歲李嘉欣成功陀亨B，而大劉女友呂麗君則誕下慈姑木定贈興。世事邊有咁多巧合，睇番轉頭，嘉欣無論拍拖定結婚，大劉都做好準備出招，認真「有心」。

登全版廣告
06年6月，李嘉欣公開和許晉亨蜜運，與此同時，一位署名叫「The One」的神秘人就在兩份報章刊登全版廣告，慶祝李生日。正當全世界誤以為此神秘人是許晉亨之際，作風低調的大劉就較啱時間向外承認自己就係「The One」！

搞爭寵風波
08年10月，李嘉欣高調宣布同許晉亨結婚，不過風頭始終不及同時期發生的爭寵風波。當時大劉愛將甘比誕下女兒，而呂麗君就發表「正印聲明」，質疑甘比女兒身份，弄得滿城風雨。

失控爆粗
嘉亨08年11月在許家大宅搞婚宴，同日大劉竟然連踩兩場贈興，先帶被他鬧完冇腦的呂麗君和女兒盈盈到福臨門午膳，跟手探埋正在坐月的甘比。嫌唔夠火藥味，大劉還親自上演街頭爆粗鬧記者一幕，冚晒嘉亨氣勢。

命名商場
去年6月，大劉趕及在李嘉欣生日前4天，率先向外宣布旗下商場將會命名為「The One」。大劉多年來對人妻李嘉欣出盡咁多招數，難怪李曾說：「他（大劉）的出現已是我生命中最大的驚喜。」

日前，本刊拍得李嘉欣母親由睦誠徑寓所乘車到曉廬探望嘉欣，其間見她攜了一壺湯水，相信是專誠帶給嘉欣的愛心靚湯。事後當記者上前訪問李母時，她即以手上的雨遮擋面，對記者所有提問都三緘其口。李母更等不及原先所坐的私家車到來，直接截的士離開。
至於嘉欣老公許晉亨、老爺和奶奶，亦同樣對嘉欣懷孕一事保持緘默，相信是為了要保護嘉欣和胎兒。

秘密檢查
今年5月，當時仍未有餡的李嘉欣，陪住已懷孕5個月的家姐李嘉明從養和秘道入內檢查。據知李嘉欣已接受老爺奶奶勸告，打算到英國安胎，離港前亦會在養和做婦檢。

近年減少拍廣告的李嘉欣，月前為內地一浴室用品品牌拍了一輯高貴廣告（圖）。有指許晉亨要她懷孕六個月後便停止所有工作，專心養胎。記者就李嘉欣懷孕一事向其所屬的百事活經理人公司求證，發言人沈小姐說：「關於呢啲嘢，我哋唔會回應。」

呂麗君養和秘密生仔
嘉欣成功懷孕，許家上下心情雀躍，至於嘉欣舊愛大劉，這數天心情亦同樣興奮。本刊收到可靠消息，懷胎九個月的大劉女友呂麗君，已於上周五（13日）秘密到養和醫院開刀分娩，為大劉誕下約6磅的慈姑椗。「呂麗君入院後，大劉每日都有嚟醫院探佢同BB。由於呂麗君比預產期早咗至少三星期生，所以BB唔算重磅。」知情者說。
周三（18日）中午時分大劉秘密到養和探望女友和BB，1時離去時被記者發現，記者上前恭喜他再做老竇和問到李嘉欣佗B時，大劉未有望一眼就快步上車離開。
嘉欣、大劉即使分開多年，好朋友關係依然欲斷難斷，估唔到現在連生仔，都要夾啱時間互相贈興。

女人四十趕生仔
藝人工作時間長又食無定時，競爭大是非多，外有傳媒關注，內有經理人[目及]實，拍拖結婚生仔絕對唔易，造就圈中女藝人多數遲婚，高齡產婦亦特別多，唔係個個都好似梁洛施咁lucky。

吳君如
自稱未婚的吳君如，30歲時經已搵啱對手陳可辛，可惜男要做國際導演，女就要做影后，令君如要40歲先開第一刀生女，近日又盛傳她以45歲高齡懷孕兩個月，簡直挑戰人體極限。

黎姿
黎姿與商人馬廷強秘交多年，奈何要到她宣布退休後，即38歲才捨得公開戀情，宣布結婚。二人發力一年，上月39歲的黎姿就誕下孖女。

郭可盈
郭可盈在34歲和林文龍結婚，惟依然經常返內地"R"銀，婚後多年一直冇所出。直至去年林文龍被指背妻偷食，事過境遷後，郭就懷有龍種。係唔係箍老公都好，40歲先有BB唔係話咁易。

李英愛
「長今」李英愛09年宣布與比她大17年的企業家鄭豪泳結婚，當時長今已經38歲，再唔生冇得生。上月39歲的李英愛宣布有喜四個月，為佗穩個B連劇都唔拍。

8月5日上圍升cup
李嘉欣趁丈夫不在港，高姿態踩入大劉旗下的尖沙嘴The One商場，擔任食肆開幕嘉賓。現場所見，懷孕三個月的她，上圍升cup，經理人陳善之亦全程傍實照顧。