Angelababy去年成功攻日，簽約Avex做濱崎步師妹，在model界闖出名堂，最近更雙線發展做埋歌手，係威係勢。
可惜賣樣多於賣歌藝嘅Baby，縱有千萬宣傳費力谷，但在本月4日，由她孭飛推出的跳舞雜錦大碟，頭輪只賣出千多張，反應麻麻，所以連帶上周二（10日）推出的個人處女Single亦要臨時變陣，由唱片舖轉到網上售賣，避免落舖銷情慘淡。
自簽約Avex後，Angelababy即變成社長松浦勝人寵將，在對方力捧之下，Baby一口氣接下Lee牛仔褲、Evian礦泉水、Lumine百貨公司等廣告，又搶走Avex師姐安室奈美惠手上的廣告大客Vidal Sasson（沙宣），成為亞太區代言人，人氣一時無兩。
為了乘勝追擊，松浦更力捧Baby做歌手，於本月4日替她推出跳舞雜錦碟《House Nation》，其處女歌〈Beauty Survivor〉更得沙宣力撐，成為品牌廣告歌，除在電視狂播外，又在地鐵和在戶外幫Baby大賣廣告，總宣傳費達一千萬港幣。豈料大碟出街後，首兩個星期只賣得千多張，成績強差人意，令她一直無力登上在日本具代表性，等同香港IFPI的oricon每日大碟銷量榜五十位內，跟其強勁宣傳攻勢完全不成正比。
雜錦碟唔掂
八月初，Baby的新歌先放在Avex向來賣得的跳舞雜錦系列《House Nation》內推出。Avex為求保險，更以雙CD單碟價三千日圓發售。可惜，就算該碟比以往系列抵賣，但銷量竟然大跌。在8月16日大碟榜一周總計中，該碟五十位不入。而該周第五十位的銷量，亦只賣2734（紅圈）張，不入50大的Baby銷情更低。
處女single網上賣
雜錦碟銷量麻麻，Avex即時變陣，原定10號在唱片舖推出的Single〈Beauty Survivor〉，改為只在Avex的官方網發售，唔賣得都冇人知。
專注做model
對Baby寄以厚望的松浦，孤注一擲在Avex皇牌跳舞系列雜錦碟《House Nation》以其他人氣歌手襯托Baby，又棄用曾攞大碟銷量冠軍的歌手May J做大碟封面，由新丁Baby孭飛做生招牌，但銷情卻令松浦和沙宣大跌眼鏡。知情者說：「呢張跳舞雜錦系列，向來賣到成萬張，頭輪至少賣到三千張，Baby用咁多錢宣傳，頭輪先賣得千幾張，真係好少！其實日本fans唔係好接受model做歌手，Avex之前都有幾個model轉做歌手後都唔掂，好似上個月出碟嘅model紗羅Mary咪衰咗囉，銷量又係賣得差，連帶影響埋佢嘅廣告市場。」
據知Avex見跳舞雜錦碟銷情麻麻，即把Baby本月10日推出的Single細碟放在網上賣，避免落舖銷情慘淡，更打算暫時唔再幫Baby出碟。知情者說：「Baby內地嘅經理人仍然係阿Kim，唔係簽俾Avex，咁Avex覺得Baby嘅大中華市場唔俾佢哋揸手，所以呢張試金石唱片唔得，都費事再捧佢做歌手，等佢專注做model算喇。」
經理人Kim力撐
記者致電求證Baby經理人Kim，她起初不知Baby的Single碟已出，及後她再覆記者時就強撐Baby：「佢隻Single淨係喺網上有得訂購，聽講幾好賣。（賣幾多？）依家邊講到俾你聽。（佢孭飛嘅雜錦碟聽講銷量唔係幾好？）賣咗一陣邊有咁快知。其實Baby主力唔係做歌手，只係為廣告先唱歌啫。」
闖日兩女撐Baby
同樣跟Baby先做model後出碟的諸葛梓岐，即將錄歌。對於戰友Baby大碟銷量不佳，諸葛梓岐說：「我唔知賣千幾張係咪叫唔ok，不過無論佢成績係點我都支持佢。（有無影響你進軍日本樂壇信心？）無，我信唱片公司嘅策略。」
Baby張碟唔賣得，其新歌連在日本指定下載網站Reco Choku嘅下載排行榜100位都唔入；反之官恩娜去年跟日本HipHop歌手日華合唱的歌〈DareToBe〉則入到該榜97位。準備年底以個人歌手闖日的官恩娜，對Baby賣千多張碟，有點愕然：「係咩！可能佢首歌喺網上有得下載，先影響銷量啫。」
闖瀛新不如舊
日本市場大，多年來中、港、台多位女星都嘗試攻日，但真正可以站得住腳的是上個世紀闖日的「四大天后」翁倩玉、歐陽菲菲、陳美齡及鄧麗君。
90年代很多後輩被選中接拍日本廣告，當中包括王祖賢、李嘉欣、周海媚、莫文蔚及陳慧琳等，當中最具名氣首推陳慧琳，因她除接廣告，更主演過電視劇《鬼之棲家》，01年更推出過專輯《Grace》，賣過幾萬張，以過江龍而言，成績極佳。
至於徐若瑄（左）可說是繼「四大天后」之後，攻日最有成績的華裔女藝人，她早於95年就以英文譯名Vivian跟南南見狂也、天山及丁愷蒂組成「黑色餅乾」出單曲及演出電視節目《火焰挑戰者》，98年更可上《紅白》，多年來在日本効力過多間唱片公司。今年是徐若王宣出道20周年，她於3月宣布推出單曲《Beautiful Day》重返日本藝能界。
Angelababy踢走安室奈美惠，以近百萬酬勞拍沙宣洗頭水廣告。上月廿七日，沙宣為Baby舉行新代言人發布會，Baby更即席跳住唱廣告新歌〈Beauty Survivor〉。據講初試啼聲唱日文歌嘅佢，被行內取笑唱歌一嚿嚿。
Baby大碟銷情不佳，但無損她每次的落力演出。出場前她便跟一班dancer齊齊打氣。
廣告牌力谷
沙宣為配合Baby新碟推出，一擲千萬谷她拍的洗頭水廣告，不單在電視狂煲，在涉谷街頭及地鐵亦放上她的大型廣告牌，非常搶眼。
電視狂播
雖有Avex社長松浦勝人錫住，不過唱片唔掂，在商言商，聽講社長有意安排Baby專注做model。
唱歌事業唔多順，愛情亦有是非，早前有傳Baby俾「海綿蛋糕」黃曉明在內地當街鬧，不過兩位當事人例牌否認。
留言列表
