老公身家 80億葉玉卿嚴教子女防變二世祖忽然1周 786期 @ 明星靚相大分享☆

43歲的葉玉卿96年下嫁美籍商人胡兆明（Jeffrey）後，便移居紐約專心相夫教子。二人育有三名子女，分別是11歲的胡芷欣（Victoria）、9歲的胡可聰（暱稱JJ）及7歲的胡以聰（Jeffreson）。退出娛圈14年的卿卿，上周四（12日）和坐擁80億身家的丈夫及三名子女乘坐私人飛機來港公幹兼度假，衣錦還鄉。
本周日（15日）卿卿接受本刊專訪時大談子女經，她直言現時身家夠食幾代，為了防止子女做二世祖，她會嚴管子女物質享受，「我想佢哋學懂珍惜同感恩。」

上周四（12日），卿卿抵港度假，老公是名副其實的億萬富豪，但卿卿坦言不會給予子女過分物質享受，她說：「我覺得我嘅仔女好幸福，好似啱啱出iPhone 4，佢哋就可以一人一部，因為我想佢哋盡快認識呢啲新科技，又想佢哋返學同我多聯繫，所以我會買。但係平時，如果要扭我買嘢，佢哋要俾原因，或者大時大節先准買，我想佢哋明白don't get thing for nothing。」卿卿說她要嚴管子女物質享受，是因為兩年前曾受教訓。當時子女要乜買乜，結果子女去到全美第2大的玩具店時亦毫不興奮，「當時我好心痛，因為已經冇玩具可以刺激佢哋，少咗好多快樂。記得自己細個，如果阿哥俾100蚊零用錢我，我已經好似得到全世界，會滿足、會感恩。所以之後我改變策略，唔再隨便買嘢俾佢哋。」

孻仔超嗲
當日記者於早上11時到訪，卿卿的大女預備起床，但7歲的孻仔Jeffreson卻賴床，卿卿即扮小昆蟲o氹佢：「毛毛蟲嚟捉你嘞！」匿喺被窩的Jeffreson發出卡卡笑聲！

15分鐘後，肯起床的Jeffreson第一時間撲向媽咪，要媽咪抱抱。望住呢位大BB，卿卿說：「雖然佢已經7歲，不過仲係好嗲，所以我都要扮小朋友語氣同佢傾偈。」說罷卿卿即用BB聲跟孻仔說：「我哋鬥快洗面面！」

大仔嫁得過
9歲的JJ當然未拍過拖，不過已被媽咪預言係一個專一男。「佢對每件玩具都好長情，又鍾意幫工人、園丁做家務，係專一嘅family man，嫁得過！」雖然當日記者無緣睇到JJ做家務，但見佢識得沖咖啡，又主動開門迎接記者，食早餐時又陪細佬玩玩具飛機（右圖），非常乖巧。

長女有主見
雖然大女只得11歲，但她極有主見，卿卿說：「佢3歲已經要自己襯衫，好有主見，有次跟爸爸出席商務午宴，佢堅持着鞋唔着襪，我成日為咗呢啲事同佢嗌交。」有主見的Victoria，當日更發揮大家姐本色，幫兩個細佬預備外出的東西，連卿卿都忍不住讚她：「真係幫得手！」

大女生日齊學烹飪
大女今年11歲生日，卿卿沒有送名牌禮物，只和她上親子烹飪班，但已逗得女兒超開心，「阿女話我從來唔下廚，咁呢啲有工人做，我寧願將煮飯嘅時間用嚟陪佢哋。所以我諗到同佢一齊參加烹飪班，一齊煲湯、整沙律同做pizza，唔使好多錢已經令佢過咗一個好難忘嘅生日。」
卿卿這次回港，並沒有保鑣或保母隨行，但她一個人湊三名子女亦不覺辛苦，「平日我哋都冇用保鑣，覺得唔需要，亦唔想仔女覺得自己與別不同。我成日同佢哋講，媽咪一定早走過你哋，如果冇咗我嘅照顧，你哋會點？一定係靠自己，我依家送俾佢哋最好嘅禮物，就係教佢哋做個開心嘅人。」
卿卿說從來不會迫子女讀書，但三位子女的讀書成績均不俗，「我每日生活就係安排佢哋參加不同活動同興趣班，好似大女同大仔話要買小提琴，有興趣我會俾佢哋學，但我唔准佢哋輕言放棄，隨時話唔想學就唔學。」
卿卿沒有期望子女將來承繼生意或成為專業人士，只希望他們快快樂樂，好像Victoria近日被邀參加兒童選美活動她亦不阻止，Victoria最後殺入決賽，但因全家來港度假而被迫退出，卿卿說：「選美令佢可以面對自己，當係接受挑戰。如果佢大咗要選美，我都會陪佢返香港選。」

胡兆明發達之路
葉玉卿夫婿胡兆明94年於美國成立「香港超市」，之後分店愈開愈多，現時全美共有12間。00年胡注資西雅圖生產電腦軟件的Detto公司，成最大股東，03年出任美國一家於納斯達克上市公司主席。
胡亦沾手地產，00年斥資5,400萬港元買入紐約長島佔地十二畝的百年古堡莊園築愛巢。04年又斥資5億5千萬在紐約興建兩幢相連的19層商住大夏，並以長女Victoria的名字命名，樓盤售出後，為胡帶來10億進賬。
06年胡投資逾億於紐約開設國際銀行，讓卿卿成為銀行股東之一。07年胡與朋友合資買賣私人飛機，估計胡現時身家暴漲至80億。

諗計o氹出鏡
葉玉卿三名子女非常怕醜，在逾3,000呎的君悅酒店總統套房內刻意避開鏡頭，為着攝影師能順利拍得與子女溫馨合照，卿卿趁子女對住電視熒光幕玩遊戲機時從後攝位，長女與大仔即黐實媽咪，惟獨孻仔攞住遙控器唔肯離開坐位，顯得離行離列。