許志安為了翻兜Sammi，甘願狠飛拍拖三年的Michelle（余德琳）。正當外界以為安仔對Sammi癡心一片，卻又忽然殺出前助手細佬（潘恆章）自爆與安仔相戀兩年的秘密關係。
紙包唔住火，秘密情人陸續引爆，原來大話安與前助手細佬拍拖之前，03年已經瞞住Sammi，秘嗒電影《性感都市》的對手張栢芝，大玩一腳踏兩船。雖然安芝戀由秘密速食到分手，只短短3個月貨仔，但激情之時，安仔甘為栢芝首度公開單身宣言，與Sammi劃清界線。
7年來頻頻撇女的安仔，與Sammi復合不成，反被踢爆花心情史，認真始料不及！
當年一直有傳安仔與前助手細佬拍拖，但他對緋聞堅決否認，回應時還說：「得啖笑。」直至近日細佬自爆戀情，直指兩人曾秘密拍拖兩年，至07年因Michelle介入才分手，大話安才即時現形。原來，在細佬之前，安仔曾與栢芝有過一段短暫的地下情，至今終於被揭。
拍《性感都市》撻 着
安仔與栢芝秘密撻着之作，是03年底合演以《Sex & the City》為藍本的《性感都市》。片中索女如雲，有朱茵、劉嘉玲、張文慈及蒙嘉慧等，但安仔只對當時屬娛圈神女的栢芝起痰。
為栢芝宣布單身
有人因喺Michelle同細佬兩宗嘢入面不值安仔假惺惺嘅行為，向記者爆料：「細佬自爆戀情，又話安仔係好人，講到安仔有情有義，我哋班friend好唔忿氣，其實安仔好花心。03年安仔同Sammi離離合合，直至年底仲藕斷絲連。就喺呢段時間，安仔接拍王晶電影《性感都市》，同栢芝飾演情侶。其實電影一開拍，安仔已經喉住栢芝，當時霆鋒飛咗栢芝翻兜王菲，令栢芝情緒好低落。安仔近水樓台，藉拍戲朝夕相對成日安慰佢，結果合作個零月安仔就將栢芝溝到手。兩個撻着無耐，栢芝就要求安仔同Sammi斬纜，結束拖拖拉拉關係，無幾耐安仔就高調宣布單身，同Sammi劃清界線。之後Sammi因為情緒病，開始收埋自己，所以由始至終，Sammi都唔知栢芝嘅存在，但一直暗戀安仔嘅助手細佬就知情。」
記者翻查新聞發現，安仔於04年2月情人節前，在一個活動上主動公告天下：「我依家係單身！」單方面宣布和Sammi分手，跟早前飛Michelle宣布單身做法同出一轍。
為了栢芝，安仔決跟13年情的Sammi斬纜，但他與栢芝的地下情亦只維持三個月。據悉分手導火線是安仔在棄文投芝後，發現要他二揀一的栢芝，竟同時暗交陳冠希。
安仔怒撇栢芝
知情者說：「栢芝同安仔拍拖，一來為咗激霆鋒，二來當佢係水泡，而且佢同一時間又翻兜四年前撻着過嘅Edison，搞到啲關係好混亂，當時霆鋒都知情。不過安仔好識o氹栢芝，栢芝講過鍾意啲乜，安仔第二日就送俾佢，搞到栢芝最後動真情。本來安仔諗住同栢芝玩認真，點知有個朋友有日同安仔講，話喺Edison屋企玩時，見到栢芝同Edison成晚黐實好曖昧。安仔聽到嬲到爆，即刻審問栢芝，栢芝亦無否認，安仔好要面，點會同人分享女友，於是佢即刻同栢芝講分手，好撇脫。」
安芝戀由拍拖到分手都冚到實一實。栢芝被安仔狠飛後，情緒再受刺激，經常在夜店買醉，佢飲多兩杯就同朋友哭訴被安仔飛，所以佢哋嘅戀情先喺朋友圈中傳開。知情人士說：「栢芝同蘇永康最啱傾，所以佢經常同向蘇康訴苦，求佢幫口游說安仔復合。雖然安仔一走唔回頭，但蘇康見栢芝失戀後癲癲喪喪，所以都逢call必到，搞到被傳媒話佢想追栢芝，真係啞子食黃連！」
安仔飛栢芝後，一度嬲爆拒與她聯絡，直到半年後才與栢芝恢復交往。栢芝同安仔散咗初期，關係好差，但經過蘇康調停，半年後兩個主動聯絡做番朋友，好似無事發生咁，閒時都有sms聯絡。05年安仔開演唱會，栢芝都有去捧場。之後栢芝同霆鋒拍《無極》，當時兩個都仲好有feel，所以06年就喺番埋一齊。
安仔拒回應
本周二（17日）霆鋒出席主演電影《綫人》首映時，記者問他知否老婆栢芝曾是安仔的秘密情人，他聽罷即力撐老婆：「呢啲娛樂系列嘅嘢，我同太太都好明白。至於你問我知唔知呢件事，我答你：我諗唔係囉！」
霆鋒力撐老婆，不過當日有份拍《性感都市》的張文慈，被記者問到當日知否安芝暗撻時，她即驚青說：「我唔識睇喎，但又唔敢話無，因為我份人好後知後覺。你都係唔好問我，我真係唔清楚。」本周三（18日），記者致電東亞發言人梁小姐，她說：「關於安仔嘅嘢冇回應！」
興用承諾冧女
許志安安仔其貌不揚，卻深受女性歡迎，原來他興用承諾冧女。因此可與鄭秀文拖拉十幾年，與助手「細佬」秘戀兩年仍得對方開腔力撐。至於7月底才被飛的余德琳，至今心情仍未能平伏。
廚房宣言 鄭秀文
90年參加新秀入行的Sammi，加入華星不久即與同門的安仔拍拖。01年有傳Sammi與古天樂拍攝劇集《寵物情緣》撻着而跟安仔分手，但02年初安仔與Sammi同得無綫《十大勁歌金曲》的「最受歡迎男、女歌星」，安仔在台上發表廚房宣言（小圖），令坐在台下拍拖12年的Sammi感動得淚如雨下，甘心同安仔復合，直至04年才分手。不過，多年來安仔與Sammi欲斷難斷，就算今年初已有正印女友余德琳，亦不避嫌常借故與Sammi親近。7月底安仔撇余德琳部署再度翻兜Sammi，Sammi雖然急急撰千字宣言拒復合，但字裏行間不諱言諗過復合。
公認安嫂 潘恆章
曾擔任安仔助手20年的細佬，一直暗戀安仔。05年她和安仔同屬單身，她趁一次與安仔及朋友到泰國旅行時，主動提出既然大家都冇拍拖，不如一齊，得安仔首肯，正式由助手升格女友。拍拖後安仔對女友百分百信任，任對方掌握財政大權，05年安仔獲「十大傑出青年」時，在台上兩度多謝細佬支持。07年安仔喪父，細佬為許父戴孝。據知安仔曾承諾跟她結婚，當時她在許家已是公認的安嫂，後因余德琳介入才與安仔分手，安仔因歉疚而付百萬遣散費。
當眾求婚 余德琳
安仔07年雖與細佬相戀，但經老友王傲山介紹認識余德琳（Michelle），安仔不久便與Michelle拍拖，跟細佬斬纜。08年1月安仔正式承認與余德琳拍拖，二人本來亦發展順利，安仔試過於一個飯局，當住親友面前承諾與跟余結婚，並得到余的父母首肯。但今年開始安仔在工作上有很多跟Sammi接觸機會，令Michelle與安仔起摩擦，安仔更於7月底高調宣布與Michelle分手。
04年初關係7國咁亂
03年尾安仔因拍電影與栢芝秘密搭上，關係持續到04年初。當時兩人都大旺桃花，安仔吊住細佬癮同Sammi藕斷絲連。而栢芝同時間跟陳冠希食散餐，陳冠希又同已經秘密搭上方力申的阿嬌繼續拖拉，關係確係七國咁亂。
霆鋒力撐老婆
謝霆鋒本周二（17日）於會展出席電影《綫人》首映，記者問他知否老婆與安仔的舊情史，雖然問題夠[火羅]，但霆鋒不單沒有動怒，還全程笑笑說：「我諗唔係囉。」
自06年得償所願嫁俾霆鋒，張栢芝已修心養性，結婚四年就為霆鋒誕下兩子，做個賢妻良母，又不時把合家歡照放上facebook，大晒幸福。
老友護安仔
細佬上周六(14日)自揭與安仔秘密拍拖兩年，安仔一直龜縮在家避靜，直至本周一(16日)到天后為《Summer Pop》排舞，他的助手一早已向傳媒表示安仔不作訪問，安仔不發一言上樓，而他的老友蘇康及梁炳則左右護航。
安仔狠飛Michelle後，其前助手細佬又自爆曾與他秘密拍拖兩年，令外界嘩然。其實除了細佬，安仔還曾秘嗒栢芝，兩人拍拖3個月。
連你都爆埋出嚟，復合無望！（設計對白）
好在我上咗岸！（設計對白）
04年2月，安仔忽然單方面向外高調宣布自己單身，被蒙在鼓裏的Sammi，當時完全不知是因張栢芝的介入所致。
你究竟嗒咗幾多件！（設計對白）
刻意離行離列
04年2月，已秘密拍拖的安仔同栢芝，在《性感都市》記者會上刻意企到離行離列，扮零交流，避免讓人察覺二人關係。
挑逗
片中飾演富家女的栢芝，與保鑣許志安日久生情，因而有一幕栢芝挑逗安仔的激吻情節。只見栢芝脫去外衣，其豐滿的34c上圍盡現安仔眼前。
激咀
當時已經狂追栢芝的安仔，在呢幕激吻戲中戲假情真，演來相當投入。
同時間與栢芝搭上的陳冠希（事後因「淫照風暴」揭發二人關係）亦有客串一角，片中他跟朱茵做對手，當時安仔未知Edison是其情敵。
05年2月，與安仔分手亦是朋友的栢芝，在蘇永康陪伴下，同家姐戴碧芝到紅館捧安仔個唱。
03年尾，開始溝緊栢芝嘅安仔，在港台遇上翻兜咗王菲嘅霆鋒，據知當時霆鋒未知安仔準備溝栢芝，故坐埋一齊仲可以有講有笑。
栢芝被安仔怒撇後，跟Edison到05年仍沒斬纜，還不時結伴夜蒲。
張文慈有份拍攝電影《性感都市》，她接受訪問時對兩人是否曾經撻着不置可否。
前助手細佬自爆與安仔分手後曾想過自殺，事後安仔發聲明，認衰話自己做得唔夠好，才令細佬在分手後的兩三年受苦。
留言列表
