去年憑《証人》成六料影帝的張家輝，導演林超賢今年再以原班人馬拍《綫人》，張家輝心想再下一城繼續攞彩；可惜事與願違，林導演講到明，新作要力谷謝霆鋒上位做影帝，將戲份集中在他一人身上，搞到張家輝愈拍愈冇心機，忍唔住在微博狂呻自己是「強大的花瓶」。
最憎做阿二
出道二十年的張家輝，捱到四十四歲始榮升影帝。過往在電影做慣配角的他，原來極介意做「阿二」。「自從攞咗影帝之後，佢更加緊張自己嘅擺位，接《綫人》之前，要求合約寫到明，一定要係領銜主演，宣傳海報張相有幾大，都要寫清楚，總之好憎俾人當係阿二（男配角）。」知情人說。
其實去年三月，已榮升影帝的張家輝，英皇大鑼大鼓為他和杜汶澤舉行大型簽約儀式，當時張影帝已經當正自己係天王巨星，開出辛辣條件要求公司全面配合，否則咪使旨意落筆簽約，「當時要老闆應承會特別為佢開戲，戲份要集中喺佢身上，全部度身訂做先肯落筆繼續做英皇人。」知情人說。
豈料，當《綫人》正式開拍，飾演警察的他，無論戲份和角色發揮，均遜謝霆鋒一籌，終於發現俾人「賣豬仔」。
微博狂呻
上月底（七月二十八日），謝霆鋒、張家輝專程返港為《綫人》埋尾，拍足兩日戲，張家輝晚上終於忍不住在微博狂呻：「……以為得獎後會改運！原來……！在沒有解決的情況下，唯有裝儍詐不知情，再細心研究對策，我是強大的花瓶……」還透露自己心情壞透，連寫微博的氣力也沒有。
上次拍《証人》，張家輝其實只是男配角，但因為角色有得發揮，令他榮升影帝，反而由頭到尾擔正做男主角的謝霆鋒連提名都冇份，所以導演林超賢今次講到明，要撐謝霆鋒攞獎，「霆鋒喺戲裡面會俾人毒打，又要變到瘋瘋癲癲，相反家輝就做個斯文差佬，根本無位可以搶戲！家輝拍咁耐都冇出聲，去到埋尾先頂住道氣，咪喺微博呻囉。」
自以為懷才不遇的張家輝，拍完《綫》片後，即帶同太太關詠荷和女兒出外散心，紓解煩躁心情。
情緒化
憑《証人》奪六料影帝的張家輝，事業攀上新高峰，演技好惜脾氣古怪，喜怒無常。
忽然失蹤
95年張家輝與關詠荷發生爭執，突然一聲不響出走南非，於當地親戚餐館做侍應，直至八個月後，因姐姐患病才回港。
入戲抑鬱
07年張家輝於內地拍攝電影《紅河》期間，因無法抽離角色而患上抑鬱症，情緒低落、多疑及失眠，老婆關詠荷也指他間中脾氣暴躁，最終在親友鼓勵下接受心理治療。
把口唔收
出席英皇地產活動，記者問會唔會乘機入市，張家輝即場倒米：「借咗唔使還呀！俾咗折扣我都冇睇！」兜大個圈暗示樓盤開價過高！
你班人都唔識貨。（設計對白）
睇開啲！（設計對白）
上週三（八月十一日）下午，張家輝載住女兒由貝沙灣屋企出發，到跑馬地車房整車，跟整車師傅發完一輪牢騷後，步行到附近街市買生果，不過全程嬲爆爆，冇笑容。
今年一月，張家輝做老闆請《綫人》台前幕後一班工作人員煞科宴，當時仍合作愉快。
憑《十月圍城》攞完「最佳男配角」，謝霆鋒在《綫人》更加唔顧靚樣，在觀眾面前當眾剃頭。
憑《証人》攞到影帝，老闆楊受成特登為張家輝舉行慶祝派對。
留言列表
