邊個唔知大陸山寨機多分唇！連 Windows Mobile、 Android汁都撈埋；雙卡雙待？可能用嚟看門口啫！但有機場人士話，人人搶購山寨機，就為咗呢個簡單設計， Nokia終於抵唔住頸，出番部 C1抗衡！機價平到$498，你班山寨王睇怕要失寵喇！記者：陳國輝攝影：伍慶泉Model： Paris@Pure Models
雙卡單待區域限制多 放大圖片 
■為免搞錯，你仲可以幫張 SIM起名！
查實可切換兩張 SIM卡嘅手機，又豈止 Nokia一間，例如 LG以及 Samsung等早已推出，但講到價位，當然以 C1賣到$498最平！至於點玩？相信唔使多介紹，由 SIM 1轉做 SIM 2的話，㩒「*」掣就搞掂；但要留意，佢僅支援雙卡單待，即係話當你開啟 SIM 1的話， SIM 2就會進入關閉狀態，接收唔到來電。你問雙卡手機適合邊類人士？唔使解釋啩！中港兩地經常穿梭往返嘅朋友，當然係用一張香港 SIM，再加一張大陸 SIM啦！話時話，坊間推出咗咁多一卡兩號服務，雙卡手機會唔會過時呢？另外，假如你唔係返內地，而係經常去美加或日韓等地公幹，就要留意 C1僅支援 GSM雙頻制式，即係話佢有地區限制，買機前要睇清楚，你去嘅國家係咪適用 GSM900/1800喇！
C1 vs山寨王鬥功能 放大圖片 
C1屬入門機，分唇無乜，相反山寨機有觸屏有藍芽。
鬥耐用 放大圖片 
C1卡槽設計簡單，相反山寨王插 SIM又插卡，唔易壞先奇。
鬥安全 放大圖片 
山寨電池無保障，爆炸都唔奇， C1鋰電有保養兼傾足 13粒鐘。
配手電筒 FM交足貨 放大圖片 
$498
想知仲有乜手機分唇？幾百蚊貨仔，當然以「基本功」為主。你想佢好似山寨王咁，支援開放式平台或者配置 Wi-Fi及 3.5G速度上網？完全唔使諗！約 2"闊 65K彩色屏幕，搭埋單調嘅和弦鈴聲，可預料無手寫、多點觸控等 Hi Tech功能，但無諗過連記憶卡位及相機都無；講娛樂， C1得 FM收音機以及經典嘅簡單遊戲，另外，機頂位置上有盞強力手電筒，㩒 Shortcut就用到，行山照明好啱使。
放大圖片 
■閒時想聽吓 FM，當然要接駁耳筒先啦！
放大圖片 
■常用功能可放入「捷徑」內。
機身大發現
放大圖片 
■無鏡頭但有閃燈？原來係電筒！
放大圖片 
■按鍵設計平實，但亦可話佢 Classic。
放大圖片 
■呢粒電竟可備用一個月或通話 13小時。
放大圖片 
■喇叭外觀兇悍，但力水就略嫌細聲！
Profile
制式： GSM雙頻體積： 107.1× 45× 15mm重量： 72.9g屏幕： 6萬 5千色通話時間： 780分鐘備用時間：約 30日主要功能：雙卡單待、換 SIM快捷鍵、 FM收音機、手電筒顏色：藍、紅查詢： Nokia（ 2136 6338） 
留言列表
