08年樂壇新人方珈悠，挾周杰倫、王力宏師妹之名出道，sell青春同活力，一首〈最緊要快〉勁hit，令她奪得商台叱咤生力軍銅獎及新城新登場女歌手獎，更因形象健康被港台委任為太陽少女。
可惜頒獎禮過後，無以為繼，成年冇新歌，如同在樂壇消失，難怪方珈悠對前途徬徨，情緒低落，日日自閉家中。眼見o靚模剝衫拋胸，多露多見報，話題沒完沒了。方珈悠於是把心一橫來個大解放，解放32C身材，着三點式、褻衣拍寫真，誓要殺出新血路！
出道以來，玉女歌手方珈悠一直走純情路線，記得拍攝首張唱片封套時，方珈悠曾以太性感為由，拒穿低胸裙拍攝，最後要公司多番游說，她才勉為其難答應。
不過，最近方珈悠突然一百八十度激變，主動出擊，與電訊公司合作，拍攝三點式電子寫真集。
雖說拍寫真是潮流，但她坦言拍攝前是需要極大勇氣，衝破心理關口。她坦言在樂壇坐足一年冷板櫈，令她不得不選擇這條路。「兩年前做新人出碟時，個個注意力都放喺自己身上，喺台上好享受攞獎嘅一刻，點知之後幾乎成年冇嘢做，又冇新歌。心知一間公司唔係得我一個歌手，唔會一年365日將宣傳放喺我度，唔搏唔出位，就只有被淘汰。
難忍坐冷板櫈
「舊年頒獎禮我冇份參與，坐喺屋企電視機前睇住人哋攞獎，越諗越唔開心，好擔心自己前途，又不斷反問自己，我嘅歌唱生涯係咪就咁完咗！嗰段日子好迷惘，冇嘢做又唔想出街，惟有匿喺屋企，又唔敢同屋企人呻，心情簡直跌到落谷底。」
方珈悠飽受高潮過後的低潮，明白無論歌手定演員，資歷長或短的，也是等一個機會，所以當公司向她提出拍攝寫真集的計劃，她思前想後，最終都答應。她說：「嗰陣諗如果錯失今次機會，唔知幾時再有？都有擔心過尺度問題，公司都知我心情，所以特別安排兩個女同事陪我，攝影師又係相熟嘅。之前傾好成個拍攝過程，每套衫配邊個場景，所有細節都溝通好晒，等我拍攝時冇咁尷尬。」
浸大E神Carol明言寫真pose抄日本鹹書，方珈悠話參考日韓歌手寫真集，佢話：「喺屋企對住塊鏡練表情、甫士，又自拍睇吓自己邊啲角度o靚啲！」
成性幻想對象
她是首個純情玉女歌手拍性感寫真，問她怕不怕性感影響歌手形象？她說︰「唔諗得咁多，我相信公司安排。（怕唔怕人將你同o靚模比較，成為宅男性幻想對象？）唔介意嘅，人哋都係覺得你身材好啫，況且市面咁多人影，大眾接受程度大咗好多，唔試過又點知成果？女歌星同藝人一樣，得幾年可以搏殺，廿幾歲已經俾人話中女，所以今次做咗先算，我想多啲人識我。」
家人反對拍寫真
方珈悠出身於小康家庭，香港出生，加拿大長大，在York University Toronto大學讀經濟，還差一年便畢業，因為舊同學陳柏宇介紹，不理家人反對，未畢業便獨自返港發展歌唱事業。現在她騎虎難下，惟有勇字行頭，抱着只許成功不許失敗的心態繼續幹下去，她表示：「點都要撐落去，唔係佢哋（父母）一定叫我即刻返去讀書！」
今次拍寫真，她坦言家人初時大力反對，要她費盡唇舌才勉強接受：「我自細好鍾意唱歌跳舞，之前都花咗好多時間說服父母，俾我返嚟香港唱歌。今次拍寫真，佢哋好緊張，所以所有相出街前都要經媽咪過目。」咁搏命，都是為了攞認同！
王力宏師妹：
方珈悠Jaime，現年26歲，香港出生，自小移居加拿大，從細學習彈鋼琴，曾學踢躂舞及Hip Hop舞。經中學同學陳柏宇介紹入行，08年簽約成為Sony歌手，成為周杰倫、王力宏師妹。同年十二月推出EP《J'aime方珈悠》，找來著名音樂人陳奐仁為她寫了主打歌〈最緊要快〉，並專程到日本拍唱片封套及拍攝MV。
她當歌星後，曾拍攝多個廣告，包括跟王力宏接拍《Sony Ericsson W595 Walkman 手機》、《大眾財務》（左）等。
同期新人支持
與方珈悠同期的新人有鄧紫棋G.E.M.、JJ、文恩澄及范萱蔚，現在只有G.E.M.在樂壇站得住腳，其他都銷聲匿跡，而JJ則主力拍戲，一樣要走性感路線。
G.E.M.讚長腿靚
G.E.M.大讚方珈悠有拍寫真的條件，佢話：「見過佢着短裙，雙腿又長又靚。（佢話要趁青春留倩影！）我同意呀！（你身材咁好幾時影？）我年紀咁細又咁細粒，邊有條件影呀？就算留倩影都只供個人欣賞，唔敢同人分享！」
JJ：影得靚就得
JJ（賈曉晨）就話：「影得靚就得啦，我都好想睇吓佢本寫真集喎！依家大家嘅接受程度大咗，唔會因為影過三點式相俾人話肉彈。」
想多啲人識我
方珈悠推出電子寫真集，分別同和記電訊3以及本港最大電子書網「光波24書網」合作，21日正式推出。點解唔同o靚模一樣推寫真集喺書展拼過？方珈悠笑謂：「電子書可以係電腦zoom大嚟睇咪仲好！」
方珈悠08年出道，迅即奪得年尾商台叱咤生力軍銅獎。除了金獎得主G.E.M.喺樂壇有點成績，其餘大多已銷聲匿跡，難怪攞獎當晚着到密密實實的方珈悠，不得不尋求新血路發圍。
寫真集在澳門威尼斯人酒店取景，拍了4天，泳衣、便服、內衣共30多套衫。
方珈悠擁有32C、24、34美好身材，為了影寫真集，「斷食」一星期，只飲蜜糖水充飢，並每日做gym兩小時。
拍攝寫真時，唱片公司更借咗架300萬的法拉利做道具，不過只係出咗個車籠，嘥料！
留言列表
