一朝天子一朝臣，曾經是太子黨（鄭中基）直系人馬的方力申（Alex）同鄧麗欣（Stephy），自從金牌大風有新老細上場，地位即時十級跌，兩個經常無工開等運到。為事業、為荷包，方力申焗住親自出馬四圍"R"撈，最後成功斟掂返大陸拍劇賺人仔，更帶挈女友Stephy有份演出，唔使再坐冷板！
捉錯用神
由黃栢高（Paco）一手捧紅的方力申同鄧麗欣，一向好識睇時勢做人，當日眼見Paco失勢，兩人即時轉軚歸順太子基，成功踢走眼中釘傅穎（Theresa）之餘，還被公司點名力捧。
要風得風，可惜得戚唔夠一年，隨着太平洋資本投資亞洲有限公司入股金牌大風，成為策略性股東後，Alex同Stephy的風光日子亦宣告結束。「新老細一上場就簽咗堆新artist返嚟，做新人出名花時間，公司仲邊度有人手得閒理佢兩個！」一名金牌員工透露。
空降金牌，新老細龐維仁曾個別相約金牌舊人飯局，Alex同Stephy卻捉錯用神，以為飲茶灌水可以埋堆有偈傾，點知老細只為穩定軍心別無他意，食過幾次飯，只有Stephy成功氹掂公司提早為佢推出跳舞專輯，截擊死敵Theresa，可惜宣傳功夫唔夠強，創下Stephy入行以來賣碟最低銷量。
落足嘴頭
公司只集中資源捧新人，Alex同Stephy工作量大不如前，陪老細食飯亦無補於事，曾經跟太子基返國內拍劇的Alex，於是親自聯絡班製作人，嘗試鋪路返國內拍劇。親自出馬又落足嘴頭，Alex成功接拍新劇《風雨桃花鎮》。終於有工開，當他知道有女角空缺，乘機力sell對方起用女友Stephy，實行有錢齊齊搵。「Stephy唔似小方（方力申），喺國內真係無人識，不過小方話可以用佢同Stephy嘅關係（情侶）做宣傳賣點，加上Stephy片酬近乎半賣半送，劇組先肯用佢。」一名幕後工作人員透露。
要自己"R"撈搵食，但又要俾金牌抽佣，Alex同Stephy唯有日日微博，透露拍劇最新消息，連宣傳工作都要一腳踢。
唉，收咁少！（設計對白）
有得你拍仲想點！（設計對白）
拍劇無人理，方力申同Stephy唯有日日微博，為新劇宣傳。
《風雨桃花鎮》卡士只屬一般，除方力申同Stephy，仲有好耐無喺香港搵食嘅于榮光（中）。
Paco失勢，方力申、Stephy成功泊埋太子基碼頭，獲公司力捧，圖為三人今年三月出席《越光寶盒》首映。（《蘋果日報》圖片）
入主金牌大風後，龐維仁（箭嘴示）除出席春茗外，私底下還相約個別舊合約藝人食飯見面，穩定軍心。（《蘋果日報》圖片）
Stephy孖實方力申頻頻同新老細食飯，只換來提早出跳舞碟截擊死敵Theresa。
留言列表
