戰爭與炒股，最相似之處，在於信息氾濫，局面變化極快。每日新聞、評論，一如漫天炮火，叫人暈頭轉向。持倉與大市氣氛（market tone）暗合時，氣勢如虹，遇熊殺熊，大注做好，自然順風順水，技術含量極低，純乎「牛市狂抽勇者勝」。但氣氛忽然急轉，遭受伏擊，是戰是逃、對沖與否，一念之間，回報雲泥，此乃功力所在，基金經理身價分別之源。

向海軍陸戰隊學習

遇伏接戰關鍵，不妨向美國海軍陸戰隊步兵班學習。一班十二人，班長帶隊，行進途中，忽然槍聲一響，如何應對？訓練有素的班長，絕少有理無理、即刻搵定匿，因為如草木皆兵，好快壓力爆燈，精神崩潰。但亦不會對周遭環境，視而不見，完全麻木：「無嘢嘅，可能前邊有喜事，燒炮仗啫！」

大部分投資者，用兵之道，剛好相反：或以義和團式操作，「恒指實見三萬，衝啊！」「中國好，內銀好！Go！」懶理組合中的兄弟，早已身中數槍，渾身浴血，價值大幅縮水，戰力急墮；或係唔係都搵掩護（take cover），雀仔飛過都諗三日：「會唔會有伏兵呢？」兩個極端，各有各傷。兵法有云：「將有五危：必死可殺、必生可虜……」得個勇字，買完又買，大環境不相就，好快彈盡糧絕，覆軍殺將；遇事慌張，組合跌5%，就急急較腳，賴低成班「兄弟」，自然不論好股衰股，統統為敵所俘。

近年環球投資格局大變，宏觀大勢（global macro trends）對全球市場的影響，益加重要。要提升回報，分析宏觀大勢能力，頓成重心。散戶每日留意的，多為微觀因素，如公司業績、個股走勢強弱、本地好淡分布（如牛熊證盤路），都在此列。九成日子，此法甚妙，但每隔幾個月，環球政府多有重大政策改動，令宏觀因素，主導市況。例如一念之差，不救雷曼兄弟，觸發金融海嘯，恒指一個月內，唔見一半；又如歐債危機，以為末日終臨，但歐洲印鈔買債、美國二度寬鬆，不論男女老幼，都衝出嚟幫手挾埋一份，反變熊軍浩劫。此等環境，指數波幅動輒以兩成計，仍執着細微細眼處，實在兇險。

長強股短弱股

微觀服從宏觀，大勢重於細節，一旦大環境出現劇變，匯率、商品價格、美國國債息率，出現大幅變化時，打法須及時改變。計策有二：一是放棄預測走勢，改用長短倉策略。簡單做法，是平日諗定：市升邊隻挾得最勁、市跌邊隻跌得最甘，凡大勢不明，就買強沽弱。以上月市況為例，恒指飛上飛落，實是原地踏步，大環境看不透，但相信市升港交所（388）有着數、市跌比亞廸（1211）呢類虛嘢死得最快，長港交所短比亞廸，一個月可以賺番4至5%。在牛熊通殺的whip-saw market，已屬極品。

次選是揸實持股，「leave no man behind」，但買遠put伺候。等同着咗避彈衣，即使形勢急轉直下，期權價升，可減輕傷亡，有利死守至轉勢。