楊證樺宮崎隊長：養狗都係為演戲！－明星靚相大分享☆

宮崎隊長，即係《義海豪情》拍一場戲練三日日文，練到流利非常，嚇到李添勝開名大讚的男演員。他的名字，叫楊證樺（阿Man）。
做咗十幾年布景板，慣演古惑仔跟班、強姦犯；現實中，原來是甜品鋪老闆。演戲，是夢想，也是興趣。為演戲，阿Man付出甚多。五年前拍《火舞黃沙》，雖然不過是小角色，一樣要跟大隊往銀川逗留個多月。怕女友悶，專登買了隻西施犬在港陪女友，展開養寵物之路。年多前，於尖沙咀開甜品鋪，搵埋小狗睇鋪做生招牌。今日，被李添勝當着300萬觀眾前大讚演技，帶埋至愛小狗，享受難得的一剎那被注目。

西施犬陪女友
阿Man入行超過十年，由舞蹈員出身到今日成為綠葉王，永不言棄，都只不過因為愛演戲。養小動物反而只得短短五年光景，也要靠拍戲造就。「五年前，得到一個參與大製作《火舞黃沙》的機會，要留在銀川個多月，於是決定買隻西施犬在港陪女友。慢慢，便養埋貓。
「我很喜歡甜品，我覺得甜品能夠帶給人歡樂，便索性叫牠做蛋糕。這五個年頭，蛋糕帶給我和女友很多歡樂，每日放工返屋企，搞掂牠的大小二便，我們便全情與蛋糕玩，工作帶來的壓力，很快便消失得一乾二淨。」

變甜品鋪生招牌
做綠葉演員，戲份少，空閒時間多。阿Man年多前於尖沙咀開設甜品店，一嘗做老闆滋味。每逢週日，他會帶蛋糕來看鋪，鋪頭內更掛滿蛋糕玉照，蛋糕漸漸地變了鋪頭的生招牌。拍攝當日所見，蛋糕相當乖巧，眼睛一直追蹤着主人的一舉一動，無戴狗帶亦無離開鋪頭的意圖。阿Man說：「蛋糕真係好受歡迎，好多客來到第一句就問佢喺邊？我聽到都有啲呷醋呀。講真，佢真係幫唔到咩手，但客人見佢咁精靈都會逗佢玩，而佢就最叻注意有無任何偷食機會，因為佢鍾意食水果，睇鋪其實係為食。」主人苦等十年，終於初嘗被重視滋味，相信蛋糕最近也會得到更多fans留意。

酒店搵靈犬做親善大使
搵靚女做親善大使見得多，狗狗成為酒店生招牌就第一次聽。
國際性酒店集團Fairmont今年推出一項名為「靈犬大使」的特別服務，由長駐酒店的狗隻陪伴旅客散步，為掛念愛犬的旅客慰藉相思之苦，讓他們即使身處海外，仍能感受與動物的親密感覺。Marcus是集團最新的靈犬大使，這頭拉布拉多犬是加拿大洛磯山脈Fairmont Chateau Lake Louise的寵物關係主管，牠的嗜好包括遠足和跟客人玩耍。現時效力Fairmont酒店作靈犬大使的犬隻共12隻，欲知各位大使的工作情況，可瀏覽 http://www.facebook.com/fairmonthotels。

5歲多的蛋糕睇慣鋪見慣大場面，採訪當日全程無吠過，又唔怕陌生人，不愧為生招牌。