被爆運毒碌假卡
Santino：唔知點回應

【盛女大追捕之越揭越臭】節目《盛女愛作戰》成為全城焦點，兩性關係導師Santino繼被指做過男公關後，前晚上電台做嘉賓再被狙擊，前拍檔Norris再爆料指他曾涉及運毒及用假信用卡，愈爆愈多，今次Santino都唔知點收科！

 
前晚Santino到灣仔接受網上電台訪問，曾跟他合作開班教媾女的拍檔Norris，繼爆Santino曾做男公關後，又即場致電爆料：「佢仲喺澳洲用假信用卡同運過毒，如果佢記唔起，我有聲帶提佢。」Santino聞言即黑面兼表現不安。Norris再爆Santino曾「穿櫃桶底」偷2,000元，已進入法律程序，不便多談。
對於Norris指他收12,000元陪女過澳門，Santino反駁：「知我出身嘅人都知我唔會用12,000蚊賣身，我只係同家嘅女友去過澳門，冇收錢。」

有40性伴
被踢爆06年結婚，09年離婚，又指前妻大他20年，Santino澄清前妻只大他兩年，最大的女友也只大他九年。談到性經驗時，他說：「少於40至50個，大概40個啦，但每個都要識兩至三個星期先可以有關係，我唔鍾意一夜情，家都仲有同嗰啲人聯絡，但已冇做（愛）。」 Santino前年在一電台節目中自爆同時間最多有四個半女友，半個女友的意思是對方都有男朋友。而因同車而與Santino傳緋聞的趙碩之亦踩多腳致電電台，指當日只當Santino是司機，但Santino反寸她說不知誰是趙碩之。

傷心哭泣
事後Santino對被指他做男公關及運毒、用假卡，回應似有點心虛：「我唔知點回應，總之我冇講過，唔知有乜聲帶，如果有，唔知佢點整出嚟。」昨日亦有人向報章兜售相關的錄音帶，Santino昨日在電話中說：「我唔怕，我自己冇講過乜嘢，唔排除Norris斷章取義，佢講啲嘢全部係唱我，假嘅！去年我哋拆夥，可能撬走佢啲學生。」會否控告Norris？他嗚咽表示不懂法律，不想做傷害對方的事。採訪：黃曉妍、李志明
攝影：黃文偉

若讀者知道五位盛女的底細，歡迎電郵至mailto:adent@appledaily.com報料。

Santino前晚接受網上電台訪問，被舊拍檔Norris狙擊，即時黑面又表現不安。

另一把妹達人Norris致電電台，大爆Santino以前的臭史。資料圖片

Santino與拍拖九年的女友最終分手，他承認同時間有四個半女友。

Mandy爆粗鬧無綫

 
《盛女愛作戰》中的盛女Mandy，曾否認因與節目編導岑應是多年好友而做媒，但日前Mandy與友人晚飯時傾偈自爆內幕，還以流利粗口鬧無綫及節目構思人陳志雲，跟她的斯文形象不符，《春嬌與志明》系列大可考慮找她參演一角。

為唐家打工
有指Mandy直言「好X嬲無綫放料」，及鬧陳志雲「好X無聊」，安排她們做電台訪問，又爆人生教練Winnie最乞人憎，就連岑應亦被她寸人工低。Mandy昨入電視城接受《東張西望》訪問，強烈否認嬲爆無綫，指雙方一直合作愉快，而她對陳志雲亦很尊重，她稱沒想過入娛樂圈，今次澄清是不想報道影響家人，她亦只望做普通人。至於被指做媒，Mandy謂岑應開節目時她正單身，遂參加望結識男仔，沒收過錢。本報昨收到讀者爆料，指Mandy本身已有男友，而她在唐英年家族的半島針織任採購部管理高層，因無禮貌兼愛出風頭而在公司犯眾憎。採訪：楊潔雯

Mandy被指與友人談話時操流利粗口，很適合演出《春嬌與志明》。

Mandy在《東張西望》談到新聞影響到家人及工作，愧對父母，忍不住落淚。電視圖片

曾繁光寸A貨人生導師

 
組織「反《盛女愛作戰》」的精神科專科醫生曾繁光，前晚應邀上商台《光明頂》，當眾人預料他會一如以往鬧爆節目及參賽者時，他卻笠了個大頭盔，聲稱自己只是被人擺上枱，又讚《盛女》節目做得成功，引起大眾討論是好事云云。
不過曾繁光亦有暗諷所謂的人生導師：「我所認識嘅life coach係啲幫助精神病康復者嘅個案經理，佢哋會同康復者建立長時間關係，令康復者好番。仲有兩性關係導師，又係新嘢喎，我都可以做喎，不過check過原來唔得！」採訪：葉雪

曾繁光前晚現身《光明頂》，大讚《盛女》做得成功。互聯網圖片

蝦頭嘲騎呢導師嚇親人

 
詹瑞文徒弟楊思敏（蝦頭）及翟凱泰（泰臣）昨日到新城宣傳舞台劇《求戀期Q娃》及《麻甩俠》，蝦頭透露劇中會有關於剩女的話題，而她近日亦有追看《盛女愛作戰》。

45度角好攰
蝦頭覺得整個節目最古怪的是一班導師：「首先Santino所講嘅方法根本係嚇親人同溝通唔到，Winnie人生教練個名太勁，一個人嘅人生教練應該係自己。其實我好想知呢啲導師喺邊度訓練出嚟。」泰臣覺得Santino的打扮及溝通技巧很古怪：「佢嘅45度角理論，每隔幾秒就要望一望對方，隔幾秒又唔望，傾偈係咁擰嚟擰去好攰喎。」採訪、攝影：李珮洳

蝦頭（右）扮Winnie的表情，泰臣在旁睇到呆。

Santino教學員召妓 隨時踎監

無綫真人騷《盛女愛作戰》造就了五位本來寂寂無名、樣貌「可觀」的女參賽者及所謂人生導師，連日來有策略地涉嫌自我炒作，大肆吹噓宣傳，出位言行令人反感！「45度」導師Santino更被爆教學員召妓，他竟間接承認說：「有帶個處男去體驗吓！」若屬實，Santino可能已觸犯刑事罪，分分鐘要踎監！

Santino前晚指舊拍檔Norris沒被無綫邀請，「因妒成恨」才數臭他。

節目播出後話題不斷，五名女參賽者及人生導師逐一被揭情史及是非！當中被指最具人氣的「45度」兩性關係導師Santino遭網友惡搞，更引來爆料者狂數，但爆料者竟要求傳媒必須刊登其戀愛顧問公司名字作為交易條件，跟相關人士一樣想博宣傳！

解釋多犯駁

Santino前晚接受網上電台訪問繼續自吹自擂，他透露最近因「成名」後在街上常被指指點點，但沒有後悔參加，更樂意為無綫再做《盛男》節目。期間舊拍檔Norris來電數臭Santino為無綫做媒講大話、雙方在合資公司時曾穿櫃桶底、做男公關等，令Santino標晒汗，回應時亦勁多犯駁位。

《盛女愛作戰》參賽者及人生導師突然爆紅，成為傳媒追訪對象。

Santino接受完網上電台訪問，在一女子陪同下離開。

Santino起初稱可能因開班教溝女時角色扮演的劇情對白，但其後又反口表示沒教過，擺明自打嘴巴！至於做男公關，他說：「你想讚我靚仔就OK，知我背景嘅人就知我唔會為萬二蚊賣身。（佢話有聲帶指證你。）我唔知佢點做出嚟！」問到會否告Norris誹謗？他突然眼濕濕表示不想傷害對方，表現非常造作。

再問有否教學員召妓？他竟間接承認：「有次同Norris有聚會，其中一個係處男，佢要溝女都要識呢啲嘢，每人夾幾十蚊畀佢搵性工作者，體驗吓。（教朋友食軟飯？）係個女仔身家同學歷高過男學員，教個男仔點相處。」

逾40位性伴

提到情史，Santino表示現時有女友，而前妻只比他大2年，並非20多年，但承認結婚時曾腳踏幾船，更自爆有40至50個性伴侶。他說：「個個都相處兩、三星期先初夜，都係女朋友，好多都仲有聯絡，但冇親密關係。」提到2010年參加速配節目《10分試愛》時，只填寫拍拖及被飛兩次，講大話的Santino即發晦氣地說：「咪寫我虛報資料囉！」

Santino於節目中理論多多，問到有否專業支持？他竟表示沒有大學有類似課程，只靠自學研究。問到怕不怕形象太負面？他即囂張地說：「有好多人咁講，但有幾多對我郁手（打我）呢？」

煽動不道德行為 屬刑事罪

黃國桐律師表示Santino與Norris教人召妓，此舉觸犯「煽動他人做不道德行為」刑事罪。他說：「特別對方係處男，佢唔會無端端有召妓嘅諗法，呢班人咁做等於灌輸呢個概念畀佢，就算最後冇做到，都有試圖成分，呢個係刑事罪，最高判監五年。」

Mandy否認做媒 冇利益輸送

「盛女」Mandy近期因《盛女愛作戰》成為追訪對象，有報道指她鬧爆無綫及陳志雲。連日內封口的Mandy終打破沉默，昨日接受《東張西望》訪問作出回應。她表示：「同無綫合作關係好好，如果有不滿，拍攝中途已經可以唔拍。」對於被指做媒，Mandy否認說：「我係未參加節目之前已經識得編導岑應，但係我係單身又冇男友又未結婚，就係因為識佢所以就寫到我係做媒、有利益輸送……但係呢啲都係失實。」

節目編導岑應與Mandy為多年好友。（資料圖片）

Mandy坦言覺得愧對父母，怕父母被起底，亦不敢見父母，她哭着說：「屋企人係支持我參加節目，但係依家都唔敢見父母，唔想畀人知父母住邊，唔知佢哋仲想揭咩私隱！都有同老闆道歉驚影響到工作。」她希望完成節目後過正常生活。Mandy亦透過無綫外事部副總監曾醒明，指自己無意加入娛樂圈，希望傳媒給她空間。此外，《盛女》將於星期五播畢，無綫特別製作由呂慧儀、蒙嘉慧及卓韻芝主持的兩輯一小時節目《盛女駕到》，於一連兩個星期日播出進行探討。

麥玲玲寸45度角望人低能

堪輿學家麥玲玲與江欣燕昨日出席節目《玄美人生》的宣傳活動，提到無綫真人騷多位人生教練成為新聞人物，玲玲坦言最欣賞婚姻介紹人Mei Ling：「佢講啲嘢有時都幾啱。（整容影響命格？）呢啲係天生，可能會對外在緣分有啲幫助。」對於兩性關係導師Santino的45度角望人理論，玲玲笑稱：「低能！我呢啲矮人就要45度咁仰望男人！」

麥玲玲（左）、江欣燕（右）

玲玲自爆積極介紹男人給小儀認識：「我睇風水有個大中華客幾鍾意小儀，佢叫小儀返內地睇佢間廠先，不過小儀覺得市儈，所以唔肯見佢，好似《盛女》入面個Florence咁有性格！」

葉翠翠想識婚姻介紹人

前港姐葉翠翠、陳庭欣及朱凱婷等昨日出席宣傳活動，翠翠表示有收看無綫真人騷，她謂：「唔認盛女都唔得啦，我其實都好鍾意童話世界o架！」她認為Santino的理論OK：「佢係教人追男仔而唔係維持個關係，我覺得佢嗰套係可以應用喺二十多歲嘅男仔身上，但穩重嘅男人就唔得囉。」提到婚姻介紹人Mei Ling，翠翠笑問記者：「有冇佢電話號碼？我覺得佢講嘅嘢好到point。」

葉翠翠（右）與陳庭欣覺得《盛女》話題十足。

另外，產後首次亮相無綫宣傳活動的朱凱婷表示已回復產前身形，問到對於同是基督徒的朱茵未婚懷孕，她謂：「我覺得係可以接受到。」

朱凱婷回復產前弗爆身形。

薛芷倫教人嫁入豪門

無綫真人騷節目播得如火如荼，名媛薛芷倫（Fanny）前晚出席活動時透露剛旅遊完畢，有看無綫真人騷。她認為港女若做到以下三點，會大受歡迎：「要有外表，唔係講整容嗰啲，而係打扮得乾淨企理；第二係提升知識水平，咁同男仔先有話題；第三就係心靈，有一顆善良嘅心，就會發揮到女性美！（你可以做導師？）如果TVB開拍豪華版，我願意做星級導師，教佢哋點嫁入豪門，其實都有好多人請教我心得。」單身的Fanny強調自己不是失敗，只是未有意拍長拖和結婚，不想被男人綁實。

若無綫開拍《盛》豪華版，薛芷倫會自薦做導師。

邵氏不排除拍電影版

無綫真人騷《盛女愛作戰》播映以來雖掀起話題，但負面反應亦不絕。無綫早前已表態不會開拍明星版，但昨日查小欣在電台節目爆料，指邵氏有意拍攝《盛》的專題電影。無綫外事部副總監曾醒明昨日接受電話訪問時回應：「始終係城中話題，邵氏亦不排除會考慮拍攝。」