梁靖琪雖然個樣生得精靈醒目，但原來佢份人都幾論盡，早排喺隧道口，唔小心車親個鐵騎士，竟然懵然不知，後尾搞到要俾差人捉住佢喺街頭吹波仔做酒精測試，真係無妄之災。其實佢唔止生活烏龍，早輪佢同羅仲謙喺新劇《團圓》裏面，有一場先喊後咀嘅戲，大家咪以為羅仲謙豔福無邊，由於嗰場戲做得太過逼真，梁靖琪喊到流晒鼻水，跟住錫羅仲謙時，成Pat鼻水飛入對手口中，事後梁靖琪猛講對唔住，雖然羅仲謙就好有風度咁話唔緊要，但由此可以知道梁靖琪有幾論盡。
日前好姨喺跑馬地遇到梁靖琪同郭少芸，佢哋啱啱拍完劇，準備上廠車收工，好姨見梁靖琪眼腫腫，一副未瞓醒嘅樣，唔知係拍劇辛苦得滯，定係早一晚去咗夜蒲，搞到唔夠瞓呢？好姨見梁靖琪臨上車之前，喺後邊褲袋左摸右摸，似乎係唔見咗嘢，重見佢猛問身後嘅工作人員，後尾先知原來又係佢自己擺烏龍，其實冇唔見咗，咁論盡大懵嘅靚女，好姨都係第一次見。 
梁靖琪拍完外景離開，臨上車前先發覺唔見嘢，猛摷後邊褲袋。 
梁靖琪雙眼紅腫，一副唔夠瞓嘅樣，唔通昨晚玩到好夜？ 
梁靖琪問番身後嘅工作人員，先知原來只係自己大懵，並冇唔見嘢 
上咗車嘅郭少芸，冇又落番車，似乎真正漏咗嘢嘅個係佢。
全站熱搜
留言列表
