現年28歲的阮經天，近年拍劇拍到上晒位，依家連電影都撈埋，難怪佢成為「台灣最強」，個個叫佢做一哥。早前佢嗰套收成3億台幣（約港幣7千5百萬）票房嘅《艋舺》，仲殺到嚟香港上映，週二，佢就同導演鈕承澤、演員趙又廷同鳳小岳一齊出席首映禮。
活動上，佢不但吸引好多少女Fans捧場，估唔到中女，甚至熟女都敵唔過佢嘅魔力，因為好姨薛家燕為咗見佢一面，特登嚟捧場。本來她一直在台下觀賞整個儀式，但有記者慫恿佢上台握手，心郁郁嘅佢決定豁出去。
一上到台，鈕導演同鳳小岳禮貌地同佢握手，不過家燕姐點只想握手咁簡單，佢轉過頭即刻同小天Say Hi，小天都好似知道佢嘅目的，即時出動迷人眼神，然後就搭住佢膊頭影相，鳳小岳見狀，都即時加入戰團。
左右逢源的家燕姐見兩位靚仔咁熱情，即時開心到O晒嘴，仲有少少面紅紅添！
落台時仲同記者講：「我有啲想暈！（係咪好女婿人選？）我以為你哋問男朋友添，都OK嘅，佢好可愛！」她表示早前小天已送過生日抱抱俾佢，令佢失眠咗兩晚。而事後小天話其實一早同佢約好，今次純粹係有義氣嘅表現，知道家燕姐被攬後見暈，他笑言：「可以常攬沒問題，習慣了便不會暈。」咁識做，唔怪得老、中、青、熟女都咁鍾意佢啦！ 
家燕姐俾阮經天同鳳小岳攬實影相，即開心到暈，仲話想搵番個好似小天咁嘅男朋友添！ 
家燕姐上台後，禮貌上都要同導演鈕承澤握吓手打個招呼先，然後再同阮經天攬攬。 
鈕導演指《艋舺》在台灣的成功，演員阮經天（右一）和趙又廷（左二）功不可沒。 
導演鈕承澤帶領一眾演員等進行破冰儀式，望票房創出佳績，所以演員們都起勢咁打。 
原來除了老、中、青嘅女Fans外，當晚徐小明同太太都有到場支持，?破冰嗰陣徐太仲中咗頭獎添。徐太！記得買番張電腦飛呀！ 
雖然導演鈕承澤對香港票房唔敢太奢望，但他對自己部戲卻是非常有信心的。 
當晚，《艋舺》的首映禮，吸引了幾百人圍觀，都係多得一班男演員的魅力。
留言列表
