Honda CR-Z自動波搭 Hybrid，難得保持廠方熱血跑格。我貪心啲，情有獨鍾棍波啪嚟啪去嘅快感，面對新返棍波版，毋須 Hard Sell車價平幾多、油錢慳幾多，淨係見到都熱血沸騰嘅 6速波棍，已有衝動喺馬路上狠狠打番支全壘打。記者：徐影龍攝影：陳盛臣Model： Ketterick@Pure Models
Honda CR-Zβ 放大圖片 
■ Sport Mode搭棍波，反應快到唔覺揸緊混能車。
放大圖片 
■雖非 Racing用嘅快波棍，但衝程好短，轉波動作一樣快靚正。
放大圖片 
■普通模式：錶板全藍燈，輕鬆代步遊車河揸法。
放大圖片 
■運動模式：中間轉為紅圈，由引擎、點火等均偏向 Sporty。
唔易死火棍波無難度
由於自動波 CR-Z已配搭+/-波箱，一樣可飛可爆，但鍾情棍波揸法嘅車迷，揸起上嚟始終嫌 CVT版文靜得滯。相反棍波車買少見少，今時今日仲捨得拎錢「買棍」嘅，一定明白傳統波棍無可取代嘅轉波樂趣。 CR-Z本身已勁有跑味，根本係一架偽裝成混能車嘅飛車仔，今日試棍波版，簡直要學星爺講番句：「大師兄返嚟喇！」事關 CVT無段波箱，點 Hold+/-波都好，電腦為保護引擎，都會自行升波降波，揸棍波就唔同， 123波全部踩入紅區先轉波，一路 Keep住 4,800轉攞最大扭力，嗰種原始力量爆炸力，真係有種久違嘅感動。唔知係咪多咗嚿電幫拖，扭力又大咗， Clutch磨擦點個 Range寬容度好高，就算我個棍波牌生晒銹，整段試車路程都未試過死火，而且左手動作多咗密咗，令人更專注於揸車，駕馭感同互動感重得多，相信呢啲就係駕駛樂趣。
放大圖片 
■最鍾意軚盤左側嘅小控制台，又型又就手。
放大圖片 
■後排空間狹窄，尾廂卻出奇的闊落好用。
抽走花巧慳 3萬
棍波版 CR-Z好揸好玩，車價卻足足平成 3萬蚊以上！事關之前到港嘅係較為齊料嘅α版，今日呢架就係入門級β版。坦白講，入門版的確抽走好多嘢，如 Keyless、定速系統、雨點感應、側鏡發熱線、霧燈、 Xenon燈等，但諗深一層，花巧 Function未必個個用得着，慳番個三皮嘢足夠你攞嚟改裝加補品換胎軨，而且肯定更實際更啱自己心水。若你仍然心大心細，我就加多兩錢肉緊，話你知性能上兩者亦稍有分野，包括β版車重輕 40kg、馬力多 1匹、扭力大 1Nm……我知呢堆數字唔算好巴閉，但加加埋埋咁多個「慳」，足以說服你大腦扑槌揀棍波版啩？
放大圖片 
■入門β版跟高級α版比較，內櫳近乎一樣。
放大圖片 
■ 2+2座椅設計，特色係前排一定超闊落。
放大圖片 
■石橋 R16胎已算不俗，只略嫌軨冚唔夠霸氣。
放大圖片 
■嬌小女士坐後排尚算 OK，大男人就要屈就一下。
規格 放大圖片 
■後望最煞食，車尾線條美感出晒嚟。
引擎： 1,496cc直四 i-VTEC馬力： 114PS/6,000rpm扭力： 145Nm/4,800rpm摩打： 14PS、 78Nm傳動： 6速手波，前驅售價：約$300,000查詢：富利堡（ 2877 6700） 
■ CR-Z本身極具跑味，棍波版更有種人車合一嘅感覺。
留言列表
