早排傳出江若琳（Elanne）力追吳卓羲，搞到一向多女埋身嘅阿Ron避之則吉，但Elanne就好少理，每次喺公開場合見到男方，都好似蟻「嬲」蜜糖咁，起勢黐埋去，起初辣妹都以為Elanne真係十月芥菜，點知早幾日辣妹入電視城巡廠，撞正新劇《洪武三十二》開鏡，竟然發現有份開鏡拜神嘅 Elanne，全程黐住吳卓羲—嘅同性密友陳鍵鋒，成個熱情的沙漠咁款，先知道原來佢對個個異性都係咁嘅。
唔好怪辣妹好記性，幾年前卓羲、陳鍵鋒同官恩娜就試過陷入疑似三角戀，陳鍵鋒為咗爭奪卓羲，搞到同官恩娜反晒面，估唔到幾年後今日，竟然可以同卓羲最新嘅緋聞女友Elanne咁老死，到底佢哋私底下交情有幾好，辣妹真係唔知，淨係見到佢哋旁若無人咁扮黐頭芒影相，個樣仲好冧添，唔知Elanne會唔會第一時間擺上微博或者Facebook，等「唱K」呷吓醋呢！ 
繼江若琳同吳卓羲情侶檔演出後，TVB又撮合佢同陳鍵鋒呢Pair，真係要睇下有冇火花喇！ 
江若琳份人一向好熱情，重遇咗學警合作過嘅陳鍵鋒，唔理三七廿一，第一時間影張黐頭相。 
每次拍劇都同對手傳不和嘅徐子珊，呢日忽然同沈卓盈扮好姊妹影相，連Laughing都湊熱鬧影埋一份。 
黐完陳鍵鋒，江若琳又轉移目標向Laughing埋手，合照嗰陣仲愈挨愈埋。 
最鍾意用i Phone影相嘅江若琳，開鏡當日成功集郵，立即向記者展示戰利品。 
估唔到謝天華都陪江若琳癲，影埋一份，不過奉勸佢唔好同啲女仔黐咁埋，自己知自己事喇！ 
新劇女主角有徐子珊搭江若琳、男角則是陳鍵鋒同Laughing，除咗陳鍵鋒，其他點睇都唔似古裝人喎！
全站熱搜
留言列表
