一手捧起味之天使嘅金牌監製錢國偉，早排與陳志雲齊齊被廉署拘捕，佢哋有冇做犯法嘅事，現時仍是未知之數，真相等廉署查清查楚，但佢哋現時已經被停晒職，手頭工作亦有人接任，不過亦因為咁，隨即惹來連串炒人疑雲，重傳出話「迷雲黨」嘅一眾餘黨，將會被大清洗，全部冇得留底。
正所謂大難臨頭各自飛，與錢國偉關係匪淺嘅味之天使，連隨與錢國偉劃清界線，重話冇見佢好耐。唔知係咪因為佢哋同錢國偉割蓆割得快，所以佢哋嘅工作竟然冇受影響，更獲得接手錢國偉工作嘅另一監製衛世輝力撑，重話味之天使係TVB嘅，所以會保留原有班底，公司大派定心丸，味之天使梗係定過抬油，冇咗錢國偉呢個大靠山，佢哋一樣搵到食，以後重唔使陪出飯局添。
`
既然事不關己，幾位味之天使繼續風騷行街，日前好姨喺荃灣大壩街，遇見香蕉王淑玲、藍莓劉俐、柑桔陳蕊蕊、蜜瓜關婉珊，同埋Sing之天使嘅咖啡林婉霞，TVB嘅風風雨雨，似乎完全影響唔到佢哋，成班天使重柴娃娃行街，後尾好姨見佢哋拉大隊入咗一間寵物店，原來佢哋都係愛狗之人，平時Cool Cool哋嘅劉俐，對住得意嘅狗仔，即時一反常態，不斷手舞足蹈，同啲狗仔玩，又紛紛攞出手機拍低狗仔嘅得意樣，佢哋玩咗一輪，最後都係冇幫襯，其實佢哋咁鍾意狗仔，第時可以做埋寵物天使，分分鐘重多一條財路。 
味之天使嘅香蕉王淑玲、藍莓劉俐、柑桔陳蕊蕊、蜜瓜關婉珊，同埋Sing之天使嘅咖啡林婉霞，日前成班少女約埋行街，懶理惹上官非嘅錢國偉。 
柑桔同咖啡似乎好鍾意狗仔，玩狗時重露出嚟燦爛嘅笑容。 
見到幾隻可愛狗BB，蜜瓜同香蕉即時忍唔住手指指，小心嚇親狗仔喎。 
藍莓矇起雙眼，作狀向狗仔獻吻，恨死唔少男士。 
藍莓手舞足蹈逗弄面前嘅狗仔，興奮得滯，搞到冇晒儀態。 
藍莓同成班味之天使邊個最好感情？睇佢同柑桔戴埋同款姊妹煲呔頸鍊就知啦。 
睇完狗仔，佢哋又拉大隊到另一間寵物用品店，唔知想幫愛犬添置啲乜呢？ 
一班天使見到好姨，第一時間唔係走人，而係喺街頭補妝，明星仔梗要增加曝光率。
留言列表
