峰So玄理蘇民峰：有冇旅行運－明星靚相大分享☆

峰 So 玄理

有冇旅行運

我每個月都去一次旅行，呢個係我嗜好。而一般人想知自己有冇旅行運，可以睇自己手上有冇旅遊線！

旅遊線解說

位於掌邊，靠近太陰丘位置。太陰丘代表唔穩定及變動，所以呢個部位線愈多愈長，代表呢個人坐唔定同埋愛變動，唔鍾意死板生活，經常會旅行、流浪或陌生地方生活一段時間，所以呢線就稱為「旅遊線」。

少但深長

代表呢個人唔太熱衷旅遊，唔會主動去遊埠，常處於被動狀態。有就去，冇就算，但如果旅遊線深而長，可以作長久旅遊去睇，咁佢即使去三數個月外地流浪，亦唔覺得係大件事。

冇旅遊線

代表唔想變動，享受極度安穩生活，最想係乜都唔變，自己熟悉環境下生活。唔鍾意旅行，最好一世都唔使搬屋，要搬都要住番同一區，要佢去外地工作或旅行都會係一件苦事。

多而深長

可以一玩完之後，就馬上 plan 定下一個 trip 去乜地方，短周末都鍾意外遊，係一個極端喜愛旅遊人。

又淺又短

喜歡旅遊但唔鍾意長 trip ，短線遊就最佢，而要佢到外地超過兩個星期就好慘，甚至患思鄉病。

So time

讀者妹妹問：我在 197X 年 X 月 21 日上午 6 時 10 分出世。我是一個冇事業心的人，雖然我喜歡我的工作，不過大學畢業之後就不想工作，好想結婚組織一個幸福家庭。本來已有一個好愛我的男朋友，我已認定了他，不過，他突然對我說要分手，我整個人呆了，想過自殺，但再想深一層，剩下供書教學多年的父母親，我從來都沒有照顧他們，所以打消了。
現在我好迷失，沒有心情工作、睡不好、吃不下，請蘇師傅指點，我何時才有真姻緣？如果我一生注定孤獨終老的話，我就專心工作，但如果我可以有最後的姻緣的話請你告訴我。我的真姻緣何時會來？我不想再受傷害了，現在我心很痛，請指點。

蘇師傅答：首先你唔好死住，正面去睇成件事。你屬「金」，要「火」、「木」，本來你重姻緣運係 2006 及 2007 年，但依家已經過，要等到 2010 年，呢年你係重桃花年，好好把握啦，看到合眼緣對象就主動出擊。今年桃花位屋企西北方，放一個上鏈音樂盒加一杯水催旺一下桃花。你命格係行剋夫運，所以一生靠唔到老公，配唔正常姻緣會夾你多，即係話大你 10 年以上或細過你異性，仲有係離過婚都同你有較佳發展機會。事業上，你一生平穩，唔特別行運，所以搵份政府工、打大機構工，或者做專業都會好！奉勸一句，呢個時勢有冇愛情都要專心工作。

■ 讀者想蘇師傅幫你算命，可連同出生日期（新曆）寄至本刊編輯部，註明《峰 So 玄理》收，蘇師傅每期會抽出一位幸運讀者，為佢解答。