隨住陳志雲遭廉記調查，《志雲飯局》亦被迫執笠，由Big Four四件大男人頂上，搞咗個《Big 4大四喜》，雖然對比嘉賓級數，陳總又高官、又大老闆，Big Four明顯輸截，但好彩勝在夠疊馬。
繼首集請咗草蜢，七條男人一個墟後，今次仲堅，搵咗容祖兒、何韻詩搭劉浩龍，三個過氣及現任緋聞情侶上嚟大爆情史。到底阿詩係咪鍾意祖兒？浩龍之前同阿詩拍拖係咪真？辣妹就費事喺度踢爆，等大家到時睇節目搵答案。
嘉賓上嚟固然要爆料，但估唔到身為揸Fit人嘅張衛健都爆埋一份，不單聲稱自己初戀係從One night stand開始，仲全程High爆，一時同蘇永康跳舞談情，一時又興奮到舉手大嗌，論入戲程度，陳總都要彈開，張總嚟喇！ 
祖兒同阿詩呢Pair緋聞情侶聚頭，唔止冇尷尬，仲好親密影合照。 
故勿論《Big 4大四喜》夠唔夠《志雲飯局》咁多料爆，但論嘉賓量，肯定贏晒。 
未真正開始錄節目，成班人經已玩到癲，可想而知《Big 4大四喜》有幾搞笑。 
咁多年冇返TVB娘家，今次難得返嚟，健仔表現極High。 
被人問到有冇試過玩One night stand，健仔好大方話有，小心老婆算帳。 
見健仔同康仔跳得咁老土，喺後面嘅安仔都忍唔住笑埋一份。 
為加強娛樂性，每位嘉賓都可以寫條問題叫Big Four答。
全站熱搜
留言列表
