峰 So玄理
擺錯牀位發噩夢
2010年06月11日
我每日瞓到中午先至起身，但近排撞正樓上樓下都裝修，搞到我冇覺好瞓，惟有希望佢哋早日完工！喺風水學上，張睡牀擺唔啱位，都會令你瞓得唔好 o架！
擺睡牀大忌
1.牀頭與房門對沖
瞓低時，頭頂向房門，形成煞氣直沖頭部，會不利健康。
2.牀頭喺房門邊
會容易發噩夢，搞到終日情緒不穩。
3.牀頭露空
牀頭唔貼牆身，形成冇「靠山」，容易令人精神緊張，經常會發噩夢。
4.隔壁是爐灶或坐廁
若睡牀和灶頭只是一牆之隔，「火氣猛」，令人精神緊張；睡牀隔壁就是坐廁，則令腎部不佳、冇記性，而女人會易患上婦女病。
安牀要訣︰房門對角作牀頭
想睡得安樂舒服， BB牀、大人牀，一般而言房門對角線位作牀頭，係風水上的永遠吉位，可令人睡得安寧，少發噩夢。大家不妨參考圖 1及圖 2嘅擺法：
圖 1
圖 2
So Time
Fans黃×姿：
我係蘇師傅嘅超級 fans，希望今期幸運兒係我啦！本人出生日期是 1976年 1X月 2X日上午 10:25分，我是一位美容師，在新年前辭了工。現想問師傅：
1.我有冇做老闆運？如有幾時最好？
2.我老公 72年 1X月 13日零時出世，我的婚姻運如何？
3.最後想問我嘅健康運？
蘇師傅答：你嘅命格屬「金」，生於冬天，要「火」嚟照暖，「木」嚟生「火」， 36歲入大運，行到 66歲。但你依家行緊衰運，做乜要辭工呀？ 36歲至 46歲雖然喺大運當中，但運勢上升速度慢，正式要待 46歲之後，個人運先至較理想。好在 2010至 2015年嘅流年運較好，而 2010年係驛馬年，容易感情、住屋或工作環境變化，所以都有望搵番份新工嘅！有冇做老闆運呢，你如果真係想搞生意，都要 36歲之後。想知老公運就要再寫信嚟，因每封信只答一個人嘅問題。不過你嘅婚姻運麻麻，因為你自己條命「夫妻相沖」，唔關老公事，喺 35歲前識邊個都覺得對方唔係你嘅理想對象，經常覺得大家唔夾及有問題。健康運都差，冬天出生，肺寒心血弱，另外你嘅牙齒同腳都易受傷，保重啦！
讀者想蘇師傅幫你算命，可連同出生日期（新曆）寄至本刊編輯部，註明《峰 So玄理》收，蘇師傅每期會抽出一位幸運讀者，為佢解答。
撰文：葉嘉儀
攝影：袁家樂
插圖：辛文傑
資料：蘇民峰師傅（ http://www.masterso.com）
留言列表
