台慶劇《法證先鋒III》推出，近期再度活躍電視圈的張可頤，同有十億身家的金融界男友曾安邦拍拖三年，外界以為她就快嫁人做少奶奶，但兩個月前，突然分手。據知，分手原因是曾安邦要求張可頤婚後全面退出娛樂圈，立即生仔，但女方事業心強，不願為愛情完全放棄事業，最終回歸剩女行列。回復單身的張可頤亦不愁寂寞，上星期三（十月十九日），她與一名年約四十多歲的外籍男，在中環high tea，四十二歲張可頤，轉口味湊鬼。
分手兩個月
○八年張可頤因為主持資訊節目《更上一層樓》，邂逅了做金融界的曾安邦，兩人火速過電，其間更傳出過婚訊；大家都以為張可頤可以隨時唔做嫁人，殊不知已經分手兩個月。早在今年三月，張可頤拍攝《法證先鋒III》時，與男友已經開始有問題，據悉，曾有一名同劇幕後工作人員無意間問她與男友感情，張可頤即時面有難色，暗示與男友在冷戰中，可能要在愛情同事業兩者做出抉擇。「近呢幾個月都冇見Maggie（張可頤）同Eric（曾安邦）一齊出現，最初以為佢哋各有各忙，問番先知原來分咗手。其實Eric一直都唔係好想Maggie拍戲，覺得太辛苦又冇時間陪佢，加上Eric都四十幾，想結婚同生小朋友，Maggie都四十二歲，要生仔就得番呢幾年，所以佢好心急要同Maggie結婚，佢知道女友同TVB份約到出年初就滿，於是叫Maggie唔好再續約，退出唔好做，但Maggie鍾意演戲，事業心又咁重，唔肯完全放棄工作，最後都講唔掂數要分手！」張可頤身邊人說。近期，張可頤每次回應記者問到有關結婚問題，亦開始轉口風，由以前春風滿面說隨時準備好，到近日已改為一臉無奈表示隨緣等天安排。
男友唔肯等
分手導火線一方面是張可頤抵受唔住男友催婚逼生仔的壓力，再加上生活模式分別太大，亦造成雙方分歧。張可頤經常掛住工作唔夠時間陪男友，而從事金融行業的曾安邦，處事認真，黑白分明，張可頤曾透露男友唔懂得欣賞她的幽默感，「其實我哋嚟自兩個星球，有時我講咗半日笑話，佢都唔識笑，搞到我都幾沮喪。」此外，要事業心強的張可頤放棄演藝工作，更加是天方夜譚。最近電視圈挖角潮，她也是王維基的城市電訊及Now頭號挖角目標人物，加上《法證III》收視理想，無綫為了盡快留人氹她續約，接二連三安排多套重頭大劇讓她孭飛，例如已經開拍，李添勝監製的《天梯》，對手是福將陳豪，之後又安排她與視帝黎耀祥再合作拍《大太監》，飾演慈禧，明年還有李添勝監製的《呂后傳》，部部大嘢！「Maggie見到有咁多機會擺喺面前，真係唔想嘥咗，好想喺事業上再有另一個高峰，其實佢有提議過叫Eric俾多兩年時間佢，但男方唔肯再等。」張可頤身邊人說。
同老外投契
重投剩女行列，張可頤依然有市場。上星期三（十月十九日）下午，本刊記者在中環發現她單拖睇古董傢俬，之後再到agnes b. cafe與朋友high tea，當中，張可頤與一位年約四十多歲、身形健碩的老外傾得特別投契。現場所見，大部分時間，都是鬼佬主動撩張可頤傾偈；離開時，兩人還在門口傾了一輪。據知，自從張可頤甩拖，身邊朋友都為她着急，不時安排約會介紹異性，希望她盡快搵到新男友。
選擇事業
對於分手一事，週一（二十四日）記者到將軍澳電視城，向正在拍新劇《天梯》的張可頤求證。張：張可頤 壹：記者壹：你同曾安邦已經分手？張：我一向都唔鍾意講感情事，你問到，我亦唔想講大話。我哋係分開咗！壹：因為佢要你退出生仔？張：我諗可能係我同時兼顧唔到事業同愛情，但係唔係講到逼我結婚生仔咁誇張，佢（曾安邦）係個好男人，我唔想阻住人哋。壹：你唔想結婚生仔？張：講真我真係未ready做人妻同生小朋友，我個心仲响事業上。壹：四十二歲先分手，怕唔怕好難嫁得出？張：我唔怕喎！依家乜嘢年代？我有信心我仲有得揀，無論愛情同事業都係。壹：你哋之間有冇第三者？張：絕對冇，我同佢都冇。壹：但我哋見到你同個鬼佬一齊。張：嗰個普通朋友嚟咋，見過面兩次，係朋友啲朋友。壹：你接唔接受到外國人？張：唔會抗拒，以前讀書嗰陣，都試過俾外國人追求啦！
三段情
入行17年，張可頤是非新聞不斷，但卻甚少傳緋聞，經她公開承認的男友有曾安邦、董波及陳容森，咁大把！
金融才俊 曾安邦
張可頤主持節目《更上一層樓》認識了其中一間豪宅屋主、從事金融的曾安邦，拍拖不足一年，男方已向張可頤求婚，但被拒絕，拖拉三年，最終分手。
上市公司主席 董波
未入行前，張可頤在上海策略置地公司任職，並與老闆董波拍拖，入行後，二人聚少離多以致分手。05年，張可頤生日，被拍得與董波在中環蒲吧後，當街激烈互嘴，被指舊情復熾。
經理人 陳容森
98年，張可頤與董波分手後，火速搭上經理人陳容森，00年，二人被踢爆同居，更拍拖睇傢俬，拍拖7年，04年分手。
逼得太緊
結婚可以係一時衝動，亦可從長計議，重要在於雙方同一睇法，如果只是單方強求自行性幻想，十居其九，一講結婚就散。
楊思琦、李泳豪
拍拖九年的楊思琦、李泳豪今年宣布分手，有傳男方一廂情願想結婚，更於今年生日對外宣布婚訊，公開向女方逼婚，令楊思琦非常反感。數月後，楊思琦自爆分手消息，新歡吳帥同時登場。
陳淑蘭、利承武
07年，陳淑蘭與希慎家族後人利承武拍拖，不夠一年，傳蘭子因逼婚不遂，與男友發生爭執後服藥和割脈自殺。09年，二人再次因吵架而驚動警方，不久，利承武便對外宣布分手。
宣萱、獸醫男友Ruan
一直恨嫁的宣萱，09年搭上鬼佬獸醫Ruan，拍拖兩年，視男友為結婚對象的她不惜貼埋大屋、大床催婚，結果嚇走獸醫。
許志安、余德琳（Michelle）
07年，許志安與Michelle撻着，拍拖期間，女方曾先後三次向男友逼婚，但安仔早已鋪排翻撻Sammi，去年五月，安仔正式對外宣布分手，不夠半年，同Sammi太平館撐枱腳大曝光。
女星湊鬼熱
香港剩女唔吼陀地剩男，揀無可揀，實行跨國界。圈中過三張女星亦然，如梁詠琪、莫文蔚、張曼玉、楊紫瓊等，同「港男」拍拖冇結果，轉口味試鬼佬，反而有機會。
梁詠琪
96年入行已公開有初戀男友Kenny，分手後，GiGi與鄭伊健因合作舞台劇撻着，因而成為第三者。同伊健拍拖七年分手，GiGi的起心肝吼鬼佬，先後戀上法籍設計師Sly及任職美國駐港領事館發言人Matthew，今年再搭上在國際食品公司任高層的西班牙籍男友，拍拖半年，今個月初閃婚。
莫文蔚
41歲的莫文蔚，94年與周星馳撻着，之後又與馮德倫發展「姊弟戀」，拍拖七年分手，莫文蔚重遇德國籍初戀男友Johannes，今年在意大利佛羅倫斯完婚。
張曼玉
80年代，張曼玉曾與導演爾冬陞拍拖三年，之後圈外圈內男友不計其數，但全部得個吉，直至轉食「外菜」，搭上法籍導演阿薩耶斯，更閃電下嫁對方，與法導離婚後，繼續採取外展政策，現時的男友是拍拖已四年的德國建築師Ole Scheeven。 ####
19/10 42歲的張可頤雖然失戀，目前全心寄情工作，但她聲言唔怕嫁唔出。
拍拖初期，一身闊太打扮的張可頤經常被發現與男友出雙入對。（《忽然1周》圖片）
鬼佬被張可頤吸引住，臨走前兩人在餐廳外雞啄唔斷，傾得十分投契。
張可頤經朋友介紹，與一名做生意的鬼佬飲茶聯誼。
拍戲經常著婚紗的張可頤，現實中原本都有機會著，但她選擇了事業。
睇傢俬搬離男友淺水灣寓所，張可頤到中環古董傢具店睇傢俬。
獨逛便利店沒有拍拖的張可頤，獨自逛便利店買食物返屋企。
由張可頤同黎耀祥孭飛的《法證III》，首日收視破了今年紀錄，成為全年最高開劇集。
近期忙於拍劇的張可頤，無論等埋位同食飯期間，都一副悶悶不樂樣子。
親證分手問到張可頤有關與男友分手一事，她表示唔想講大話，大方承認情已逝。
今年初張可頤在電影《猛男滾死隊》中，以性感睡裙現身與曾志偉做對手，42歲的她樣貌同身材都未走樣。
無綫為了留住張可頤，連續安排幾套大劇給她，除了現在與陳豪陳茵媺合作的《天梯》外，明年更會開拍《呂后傳》做呂雉一角。
留言列表
