Netbook Viliv N5 Premium 3G 399g 誘惑－明星靚相大分享☆

計我話，乜都係假，最緊要靚！纖體廣告都話：「身形好就乜都咁靚」！所以連電腦都要迎合潮流玩「瘦身」。韓系品牌Viliv嫌Netbook都未夠 Fit，推出一部「樣靚身材正」嘅MID N5 Premium 3G，窈窕的身材加上只比大盒裝紙包飲品重些少，唔好話君子，連淑女都一樣好逑！

男又好、女又好，唔係個個都鍾意孭住部Notebook出街，就算改玩Netbook，輕極都要1kg，至於家陣啲智能手機雖然都已經好勁，但芒細上網唔夠爽，有時播片仲要窒窒吓，Viliv N5 Premium 3G就正好滿足晒所有要求。

為遷就細小機身，QWERTY鍵盤按鍵比一毫子還要細，而且大小不一，需時適應。

鍵盤兩角分別有Optical Sensor和兩粒滑鼠左右鍵（紅圈），取代TouchPad。

放大圖片



似NDS機

係人買機都係睇咗個樣先，Viliv N5 Premium 3G嘅圓邊啞黑機面手感非常好，而且不落俗套，很有個性；長身外形有點像NDS遊戲機，體積為172×86×25mm，最突破係重量只有399g，將部機袋落手袋都仲夠位擺多本八卦雜誌。揭開機面，會見到一個4.8吋WSVGA屏幕和嬌小的QWERTY鍵盤，沒有TouchPad，改動在右邊加入細細粒嘅Optical Sensor，配合鍵盤左上角嘅兩個按鍵來取代滑鼠左右鍵，嫌唔夠方便的話，倒不如索性篤芒操作，設計頗具彈性。

內置130萬像鏡頭，可以玩視像通話，或者拍短片直接放上YouTube。

機側保護蓋下藏有USB及microSDHC記憶卡槽。

電池底下有SIM卡位，支援3G無線上網。

睇片順滑

女人有樣有身材固然吸引，但冇修養、冇內涵，再靚都留唔住男人心；電腦產品亦然，買機都要求實用。Viliv N5 Premium 3G 內置Atom Z520處理器（1.33GHz）、32GB SSD硬碟、1GB記憶體，並預載了《Windows 7 Starter》作業系統，Netbook做到嘅功能佢都有齊，而且處理器更支援高清硬解，播放720p高清片游刃有餘，畫面質素亦清晰流暢，而且機身輕細，搭車睇片猶如拎住PMP機咁方便。

機側設有天線，加強GPS接收能力。

電池使用時間長達6小時，睇片則玩到4個鐘。

機身尺寸跟手提遊戲機差不多，極之輕巧。

定位導航

此機功能亦算全面，同時支援Wi-Fi 802.11b/g及3G上網，在電池下方亦設有SIM卡槽，支援HSDPA流動寬頻，毋須佔用機上唯一的USB槽來插3G手指。本身內置GPS導航功能，自行安裝上Garmin、Microsoft Streets and Trips等軟件後，仲可以身兼埋汽車導航裝置，一物幾用。