飲食業競爭激烈，食肆老闆不斷度橋冧客，好似朗豪酒店明閣行政總廚曾超敬師傅，身為米芝蓮二星廚師都走出廚房同客打交道，推出全港首個米芝蓮點心烹飪班，每位學費 800元。小妹噚日拜訪曾師傅取經，成為佢第一個點心班學生。曾師傅話，烹飪班會教四款點心，分別係春卷、蝦角、燒賣同素粉果，一般人喺屋企都做到；至於蝦餃、腸粉就好考功夫，決定剔除唔教住，「遲啲開中級班先教」。曾師傅直言小妹慧根一般，只肯教易學難精嘅春卷，材料包括鮮蝦仁、韭菜、筍、春卷皮等，醃料有雞粉、糖、蒜蓉等，做法將食材放入個碗度用手攪至起膠，「醃之前記得用乾布將蝦肉、筍吸乾水，否則蝦肉起唔到膠，做唔到餡。」
每位收費 800元 放大圖片 
姓名： Shopping精性別：女年齡：年年 24歲興趣：行街買嘢、吃喝玩樂、做高溫瑜伽
佢又話將蝦仁等餡料放喺春卷皮嗰陣要放得均勻，包嗰陣捲兩圈就夠，之後用蛋漿收口，「包春卷唔好有空位，以防炸嗰陣滲入太多油。」炸春卷好講技巧，油溫要保持約攝氏 60至 70度，首先油浸春卷慢炸 3分鐘，最後加猛火勁炸即撈起，「咁樣可以逼走蝦肉啲油。」米芝蓮二星級春卷果然不同凡響，咬入口又脆又唔會滿口油。明閣公關姐姐 Jerri話，烹飪班可以包場，每班 12人學費 1萬元，額外人數每位加 500元，最多 20人；個別散客集齊 12人都會開班，「坊間嘅烹飪每堂每人都要 500元，呢度由米芝蓮星級大廚教，平均每人 800元，仲包埋享用一個 set menu，計落一啲都唔貴。」有興趣可電郵至 mailto:lphkg.info@langhamhotels.com。
米芝蓮級春卷材料
春卷皮（ 1盒）、鮮蝦仁（ 1斤）、韭菜（半湯匙）、筍（ 2両）、炸蒜蓉（半湯匙）、生蒜蓉（ 1湯匙）、鹽（半茶匙）、雞粉（ 1茶匙）、糖（ 1.5茶匙）、生粉（ 2茶匙）註：份量可做 20至 24件春卷資料來源：曾超敬電郵： mailto:shoppingjing@appledaily.com 
曾師傅點心班教人炮製四款米芝蓮星級點心。
留言列表
