藝人經常周圍飛四出掘金，真係要學多幾國語言江湖救急，否則好易出洋相。之前鄧麗欣講咗句以廣東話照譯嘅英文「 I am very thanks them」，俾人狂踩英文水準連小學生都不如之後，近日黃曉明都被網友翻舊賬，摷番一條上載於舊年 2月嘅短片，片中黃曉明大晒歪音英文，聽落去佢就好似講緊自己係蛋糕，家人就係豬肉，令人笑爆嘴。
老外一頭霧水
當日一身帥哥打扮嘅黃曉明，應該係出席汽車活動，佢喺台上接受一名外籍人士頒發紀念品，黃曉明一開聲就話：「 When I was a cake, may family was pork.」其實佢係想講 kid，但就噏咗 cake；想講 poor，就講咗 pork；即係細路變蛋糕，貧窮變豬肉，仲將 my讀咗 may。佢講 birthday，又因為發音不清，聽落好似讀 pussy（俚語解作女性陰部），難怪同台嘅外籍人士似乎唔知佢講乜嘢，聽到冇晒表情。後來黃曉明以普通話重複內容，佢話自己細個時，屋企好窮，但爸爸想要一部好車，於是黃曉明曾經興起偷嘅念頭，但家有贊助商送車畀佢，佢就唔使偷啦。其間黃曉明唔知係咪因為太緊張，唔小心整跌紀念品，搞到頗為狼狽。
放大圖片 
黃曉明（中）喺片段將 kid講成 cake，聽到企喺佢隔籬嘅老外冇晒表情。互聯網圖片
放大圖片 
網友仲好抵死話終於明白黃曉明點解被 Angelababy稱呼為海綿蛋糕喎！資料圖片
感人變得啖笑
馮仁昭覺得來自內地嘅黃曉明雖然英文發音唔標準，文法又錯晒，本來佢想講出一個感人故事，點知變咗得啖笑，但佢算勇氣可嘉，夠膽喺公開場合講英文，當然佢都有必要惡補。而啲網友就好抵死，話黃曉明點解被 Angelababy稱呼海綿蛋糕，原來係源自於此。「黃曉明 show英文」http://www.youtube.com/watch?v=UUQFC_cMvaA&feature=player_embedded#! 
黃曉明被網友狂踩英文差，相信佢要惡補吓啦。資料圖片
留言列表
