唔啱使

 

去年，吳彥祖同內地女星李冰冰，雙雙成為Adidas香港區和國內代言人，合作一年，品牌決定換人。同人氣形象無關，純粹是二人分別榮升做電影、唱片公司老闆，公開活動吓吓老西、晚裝，難有機會運動look為品牌做人肉宣傳，加上檔期排得密麻麻，即使品牌商肯加碼請二人添食做宣傳活動，亦難以度到期配合。最終益晒錢平一截，聽話又合作的周柏豪和微博女王姚晨。

做老闆累事
娛樂圈缺人，吳彥祖片酬六百萬，依然長拍長有。廣告價一樣硬，無論本地抑或國際品牌，一律四百萬起跳。外形sporty，形象夠正氣的吳彥祖，去年被Adidas重金禮聘夥拍阿Sa（蔡卓妍）做香港區代言人，至於大中華地區就有金馬影帝、影后阮經天和李冰冰。一年過去，不論公開場合抑或平時出街，都配合品牌上身，幫手做人肉宣傳的阿Sa同阮經天，明年將有得留低，但吳彥祖同李冰冰就要出局。
「佢哋（吳彥祖、李冰冰）開公司，run entertainment business（娛樂事業）同個brand（品牌）無牴觸，不成問題，弊在兩個人做咗老細之後出function唔係著西裝就晚裝，就算平日出街，亦好少俾記者影到佢哋著個brand啲衫，所以公司決定換人。」一名Adidas的員工透露。
除此之外，由於吳彥祖、李冰冰的電影一部接一部，根本無期配合品牌的宣傳活動，令品牌商好頭痛，有等於無，促使作出換人決定。

向新人埋手
一雞死一雞鳴，品牌轉向新紮，檔期較易度的藝人埋手。吳彥祖的代言空缺，明年開始，將由現時與Angelababy為品牌旗下的Neo Label任代言的周柏豪取代，酬勞平吳彥祖一大截，八十萬有找；至於李冰冰，就換上在內地有微博女王之稱的姚晨。Angelababy則夥拍彭于晏，繼續留任做Neo Label代言人，而一向超級合作的陳奕迅，Adidas Originals地位維持不變。「如果個個好似Eason咁，又紅又合作當然皆大歡喜，不過適合品牌商嘅人選真係唔多，啱嘅大部分已經有其他同類型合約喺身，所以唯有向啲up coming嘅埋手，周柏豪雖然未夠紅，但勝在似Eason，去街都著住品牌啲衫，至於姚晨，就貪佢喺微博有影響力，好有宣傳效果。」Adidas的工作人員說。

稱職代言人
藝人擔任品牌代言，通常都獲廣告商贊助，大部分藝人都識做，常在公開場合將品牌掛在口邊。

 
郭富城城城做百事代言人八年，每出席公開活動，都識做穿著百事指定藍色衣服，又試過在演唱會說：「我流緊百事嘅血！」因而被指為「藍血人」。


楊思琦 02年，楊思琦擔任米奇老鼠、芝麻街卡通服裝系列代言人，獲廣告商贊助服裝一年，自此，無論私底下或出席公開活動，她都著住品牌贊助的卡通衫，因此被網民取笑「娘look」。


許志安去年接拍牙刷廣告，廣告歌「尖尖尖」唱到街知巷聞，安仔相當hard sell，在個唱與Big Four一人拎住支牙刷，唱「尖尖尖」。另外，他客串新戲《戀夏戀夏戀戀下》時，亦全程拎住支牙刷，大玩「尖尖尖」廣告gag。 ####


你忙嘛，咪幫輕吓你囉！（設計對白）
已是品牌副線代言人的周柏豪，經常做人肉生招牌，交足功課，最終取代吳彥祖成為主線代言人。


大多數以西裝、晚裝見人的吳彥祖和李冰冰因未能全面配合品牌商，明年將被叮走。


仔， 爭飯食？（設計對白）（《蘋果日報》圖片）


曾與葛優演出《非誠勿擾II》的姚晨，長期穩佔微博人氣榜第一位，成為品牌羅致做代言人的主要原因。



陳奕迅開演唱會，例必有代言服裝上陣環節，夠晒幫手。（《台灣蘋果日報》圖片）


經執位後，彭于晏會補替周柏豪，與Angelababy做另一條生產線代言。（《台灣蘋果日報》圖片）


阮經天和蔡卓妍將獲留任代言，穩賺一筆。（《蘋果日報》圖片）





arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄