掃把迷最愛嘅頂級版 Impreza WRX STi，玩咗咁多年仲係手動波箱，就算你揸棍波有幾人車合一，喺香港都係辛苦多過享受。好彩終於有自動波版 STi，以後唔使再扮葉問耍詠春，雙手郁嚟郁去鬼咁忙，大可「一手一腳」舒舒服服咁嘆勁辣掃把佬喇。記者：徐影龍攝影：陳陶鈞Model： Vanessa@Pure Models
放大圖片 
Subaru Impreza WRX STi A-Line
早排 Subaru新世代 Legacy回歸，摒棄近年斯文成熟車格，舒服以外再玩高性能，搶番唔少掃把迷。同廠另一車系 Impreza WRX STi，咁多年嚟齋得棍波版，發燒友、車神梗係無所謂啦，左手轉波、右手扭軚、左腳踩極力子、右腳畀油，總之越忙越醒神。我都知棍波車有幾好玩，但喺香港當代步車，有時真係幾攞苦嚟辛，燈位多又塞車，未乘風破浪，已經吊極力子吊到出汗，斷唔可能你話腳軟，就夾硬爬頭打尖行先啩，咁唔守規矩，贏咗都盞得啖笑。慶幸 Impreza WRX STi終於加入自動波箱，行車後「一手一腳」搞掂晒，絕對斯文淡定有錢剩，連靚女 Model都敢揸，仲懶叻話掃把佬都唔係咁難操控喎。普通揸法兼有四驅，梗係似房車咁舒服啦，但轉入 SI-Drive「 S#」模式，玩埋軚盤+/-波，將 Turbo獸性引發出嚟，你就知 300匹掃把佬有幾唔講得笑。
放大圖片 
■ Normal模式揸法似房車，女仔一樣舞得掂高性能掃把佬。
放大圖片 
■右腳專責行同停就夠，左腳毋須再受極力子嘅氣。
放大圖片 
■內櫳保持 STi運動風格，視覺上已經係享受。
放大圖片 
■三圓黑底紅錶板唔止有戰意，仲睇得特別清楚。
換皮椅加電控 放大圖片 
■車廂空間不俗，高妹坐後排依然唔頂腳。
Impreza WRX STi A-Line不如新世代 Legacy般，改頭換面咁大變化，基本上外形同舊款相若，但勝在仍然靚仔襟睇，原廠包圍極有戰意，加上頭冚 Turbo生風入口超級巨型，比 Legacy更不失當年掃把佬嘅「街霸」風範。內櫳設計比 Legcay更圓，亦無咁多金屬位，但立體層次感同弧邊風格，依然充滿流線型運動感，加上「血紅」 STi車章及三圓黑底紅錶板，視覺上足以撩起你把火，放心戰吧，前排仿桶椅將你承托得穩如泰山，令你揸得更瀟灑。比手波版優勝處，仲有換上全皮製座椅，襯以白線車邊，觀感不俗。加入 8方向電控座椅調校、車外有超貴嘅 HID頭燈同 LED尾燈、定速巡航系統、 18"霸氣輪圈、四出尾喉等，完全係標準配備毋須加錢， A-Line版唔係齋換自動波咁簡單，可算誠意十足。
放大圖片 
■加入 8方向電動座椅調校，燕瘦環肥一樣 Fit得到。
放大圖片 
■揭背式尾箱，載物空間更多更廣。
規格 放大圖片 
引擎： 2,457cc水平四＋ Turbo馬力： 300ps/6,200rpm扭力： 35.7kgm/2,800-6,000rpm傳動： 5速+/-波箱，四驅售價：$359,000查詢： Subaru灣仔陳列室（ 2511 2727） 
■咪睇 WRX STi個樣咁有霸氣，加入自動波後其實好易揸。
留言列表
