四年部署　玩死簡炳墀 @ 明星靚相大分享☆

五屆冠軍練馬師簡炳墀在上水鄉事委員會執委選舉中，以十三萬元賄選，上週五被判罪名成立，等待下月判刑，本週四將在荔枝角收押所度過七十四歲生日。本刊記者週一探監，見到昔日牙擦擦的「食力簡」，頭髮蓬鬆，霸氣無存。但拉他下馬的上水王、上水鄉事委員會主席侯志強，卻意氣風發，在上水街頭見人就力數昔日恩師：「我都叫佢唔好做犯法嘢啦！又唔聽我講！終於俾奸人所害！。」侯志強除了向本刊細數師徒恩怨，亦講他四年來如何一面在上水多條村裝閉路電視，一面請私家偵探跟蹤簡炳墀黨羽，分頭搜集他們賄選證據，今年一鋪打殘簡炳墀。

本週一早上八時，記者以朋友身份，在荔枝角收押所申請探望簡炳墀，經過三重關卡後，記者放下手機、相機、銀包等物品，只能拿着身份證，穿過金屬探測器，進入昏暗的面見室。這裡約六、七百呎，沒有窗，每邊有十格，每格如銀行櫃位，訪客和囚犯各一邊，中間隔着大塊透明玻璃，彼此看得清楚，但對話得用牆上的電話。

頭髮蓬鬆　霸氣無存
「想嚟探你嘅，就係呢位小姐。」獄警指一指站在面談室內的記者，坐在2號格就是羈押了兩天的簡炳墀。當時還未有其他探訪者，偌大的會面室，只有記者、簡炳墀及獄警三人。穿着淺棕色囚衣的食力簡，頭髮蓬鬆，架在鼻樑上的茶色黑超，不見了；面容憔悴，昔日霸氣蕩然無存，朝記者微微點頭，揮揮右手，嘴角牽動，但隔着玻璃，聽不到半點聲音。獄警說簡炳墀想與記者打聲招呼：「犯人嘅兒子喺門口，每日只一個探訪名額。你同犯人直接對話，就算傾一句，都會計你探咗，佢個仔就唔可以再探，犯人話希望你明，佢想見個仔先。」就在這時，本刊另一記者看見簡的幼子簡永輝剛到收押所閘口，簡永輝發現有人已登記，大表驚愕，即時致電家人咆哮：「我都叫老豆唔好見其他人，點解會咁？」他又向職員強調自己是簡炳墀兒子，力阻父親和外人會面。記者於是讓出名額，心急如焚的簡永輝，甫見記者便呻：「你知我老豆性格，咩都敢講，我明白你哋工作，想要訪問佢，但佢依家真係唔可以接受訪問！」也難怪簡永輝憂心，簡家連日與律師會面，商量對策，視乎下月十二日判刑輕重，才考慮上訴。身為大律師的簡永輝，深知父親口沒遮攔，判刑前嚴禁簡炳墀、家人及律師向外人發言，以免節外生枝。「媽媽及妹妹，都好擔心。」簡永輝無奈地說：「我哋幾兄弟姊妹，一直都好團結，大家輪流嚟探，帶啲食物、日用品俾佢（簡炳墀），希望佢過得舒適一啲，老豆本來想要部收音機，但呢度有好多規定，唔係樣樣都帶得。」原來一直低調的簡炳墀太太和女兒，週日早上探望簡炳墀，甫見到他面容憔悴，即時流淚，擔心歎慣的簡炳墀，不適應獄中生活；好似獄中無大雪茄，食力簡唯有食住香煙頂癮。

意氣風發　黑超上水王
簡家驚惶，但人稱上水王的上水鄉事委員會主席侯志強，卻因自己四年部署，終找到證據將簡炳墀拉下馬，意氣風發。他上週五一聞判後，在鄉委會辦公室接受本刊訪問，室內戴上黑超，還以為他有眼疾，怎料他解釋：「我唔鍾意俾人見到我眼神，靈魂之窗嘛，咁易俾人見咪好唔得了？」侯一瞥記者拍照，忙說：「等等，我俾番個慘樣你影先。」收起笑臉，除下黑超，擺出慘樣，還說：「我對於事件深感難過同埋遺憾……我都叫佢唔好做犯法嘢啦！又唔聽我講！終於俾奸人所害！」記者週日再找侯志強，只見他戴着黑超，在石湖墟一帶開懷大笑同街坊講：「阿簡成日話自己無事無事，我話你今次實踎監啦！」又揶揄簡：「俾人十三萬蚊買票，人格原來只係值十三萬？你咁即係睇唔起人啫？我一向都叫人，茶照飲，錢照袋，票唔投！嘿嘿嘿！」一派氣焰，渾忘了簡當年帶他出身。

師徒決裂
五十五歲的侯志強，生於上水河上鄉，侯家為新界大族，他吹噓祖屋全村最靚。河上鄉侯家比簡炳墀的根據地松栢塱村顯赫得多，但兩人一樣讀書不成，早早被家人送去外國打工。侯志強十二歲在聯合船塢做輪機工程學徒，十七歲到美國餐館打工。侯志強七十年代尾返港，跟其他鄉民買賣土地建丁屋，仗着家勢，地產生意搞得風生水起。這時他開始對政治有野心，於是靠攏當時在上水叱咤風雲的簡炳墀。「佢哋（簡、侯）嗰陣好似師徒咁，一齊出入，開會都坐埋一齊。」有老鄉民對本刊說。據上水圍鄉民爆料，簡炳墀於八十年代，每逢選舉時，會請鄉紳到尖東大富豪夜總會跳舞，席間他大派賽馬貼士。冠軍練馬師的貼士果然大派用場，簡亦四度當選上水鄉事委員會主席。侯多年來跟着簡，對師傅一舉一動瞭如指掌，為日後反簡的部署埋下伏線。師徒決裂始於○三年鄉議局推行雙村長制，簡大力反對，公然同鄉議局主席、人稱新界王的劉皇發唱反調。結果，簡因缺乏新界王支持，無法連任上水鄉事委員會主席，簡怒罵：「嗰啲吳三桂，食碗面，反碗底……我信隻狗好過信人！」殊不知他信任的徒弟侯志強，見師傅失勢，另起爐灶。有鄉民說：「侯好識得巴結其他村，好似河上鄉一帶有乜發展，佢會約埋其他村長商量，城規會會議又叫埋一齊去聽，愈來愈多村長企喺佢度。」○七年，侯終於當上上水鄉事委員會主席，一面他對人仍然說：「喺街度見到佢（簡）會叫佢墀哥！墀哥永遠都係我大佬！」但另一方面他又怕簡捲土重來挑戰他的主席寶座，於是悄悄部署，蒐集簡的賄選證據。

簡炳墀行賄圖

裝電視　聘偵探
侯及親信四年來不停在上水各村裝置許多閉路電視，對準多人出入的十字路口、士多。有村長說：「侯志強搵人睇實對手的一舉一動，簡陣營啲人做咩都走唔甩。」侯志強亦向本刊承認閉路電視是他有份安裝的，單是河上鄉便已有數十部，其他村的數目亦差不多。他說：「簡炳墀一向以為財可通神，使啲錢就可以得到個主席位，我預咗佢會做嘢，梗係一早裝定閉路電視啦，果然俾我哋影到！啲片俾晒ICAC啦……我一向都叫佢唔好做犯法嘢，又唔聽我講！」不只廣布鏡頭，侯更派人聘請私家偵探，跟蹤簡陣營的人，並且進行拍攝。本刊獲得其中一批片段，顯示在三月六日至十一日期間，簡親信、區議員侯金林與多名村長接觸，部分是村長逕自到他的區議員辦事處會面，部分是侯金林在上水的茶餐廳及會所見面。侯志強形容：「侯金林係簡隻馬，四圍幫佢搵人，點會無使錢？」侯志強還大打小報告，向中聯辦新界工作部副部長張肖鷹，投訴簡炳墀賄選。終於，簡炳墀今年二月上釣。簡見上水莆上村村長廖富壽平日村內夾錢搞盆菜、修葺祠堂的錢都由他收賬，深得村民敬重，希望他幫忙拉票。據庭上作供，簡新春期間獨自到廖經營的利苑士多，簡對廖說：「我依家夠票啦，但你都支持吓我啦。」廖不置可否。二人閒聊了數分鐘，簡離開前拋了一句：「我擺咗啲嘢喺房，錢嚟㗎，十三萬。」廖隨即叫道：「有無搞錯，快啲攞番走！」簡無理會，廖折返麻將房，在桌面茶葉鐵箱與藍色麻將箱中間位置，果然發現整齊一疊的一千元銀紙。廖拿着錢追出去，已不見簡蹤影。廖在庭上作供，指他心裡忐忑，三天後跟侯志強商量，侯建議他不報警便報廉署，廖於是向廉署舉報。簡不僅在三月主席選舉中無法成功挑戰侯志強，兩日後亦被廉署拘捕。師傅兩日內，兩次栽在徒弟手中。

簡炳墀簡歷

左右土地利益
簡、侯打生打死爭鄉事主席，原來當中涉及龐大土地利益。「原居民男丁有丁權，如果有地有錢就可以起丁屋，原居民身份，就靠村長去確認，好多時村長都會收到利是，一般十萬至廿萬元，所以做村長都好和味㗎。」一名村長解釋。收丁屋利是外，更重要是地區有地產項目發展，村長往往第一個知道，油水更多。該名村長續道：「大地產商儲埋好多農地，如果想在你條村一帶發展，要去城規會改變用途，所以一定會先接觸村長，爭取村民在城規會唔好反對，當中梗係會有利益輸送，名義上可能使幾百萬話俾阿公，改善吓條村環境，實際上條數都查唔到，村長可能從中取利都無人知。」據村民表示，近年古洞一帶，每逢有鄉村節日，地產商均有贊助，請居民飲飲食食，可見地產商籠絡村民不遺餘力。事實上，上水、古洞一帶，新地、恒基均持有大量未發展農地；政府亦於○七年宣布在古洞發展一個人口六萬五千人的新市鎮。這些發展對原居民來說是一大塊肥豬肉。誰掌鄉事話事權，誰就能左右土地發展。侯志強掌權這幾年，他的根據地河上鄉附近就有新地的天巒和信和的Goodwood Park等豪宅盤，而古洞新市鎮的計劃，涉及土地就在他根據地河上鄉，作為上水鄉委會主席，在地產商眼中，「角色」更為吃重。侯志強在河上鄉擁有三幢丁屋外，更至少持有約五十萬呎農地，早年曾做過出租燒烤場，現已荒廢。他帶記者參觀時，自豪地說：「依家未得閒搞之嘛，第日呢度起番幾排丁屋，閒閒哋賺幾億啦！」

簡語錄
####

上週四法庭裁定簡炳墀（左）賄選罪表證成立，翌日等候法庭最終裁決時他已知道大勢已去，憂心忡忡。