「人在風暴中 無奈的打算 如像風砂 倦也須兜轉」1996年一場電影風暴，將鄭伊健和陳小春這兩粒微不足道小碎沙吹上半空。當年為了生活，拿起鐵通牛肉刀做蠱惑仔，兜轉14年後今日，為了兄弟情誼兩脇插刀再上戰場。
鄭伊健與陳小春兩兄弟老友鬼鬼，雖然不是常見面，但不會影響友情。
伊健：伊 小春：春 記者：記
來自《430穿梭機》的青少年大使鄭伊健，遇上《晚九朝五》爛滾蒲精陳小春，96年兩人為了生存盡地一煲，接拍首部改篇漫畫的蠱惑仔，命運從此改寫。
青少年大使Vs爛滾蒲精
春：當年伊健拍第一集《古惑仔》，佢每拍完一場劈友戲，導演大叫cut佢就同我講：「唉，我嘅星途就此玩完！」
伊：喂，我係青少年大使，形象好正面架！當年普羅大眾思想比較保守，拍戲劈友打交好損形象，當時只係拍緊第一集，真係好擔心上畫嗰陣外界點樣批評我，好驚。好彩首映禮嗰日盛況空前，叫好叫座，仲即刻開拍續集，一年上畫三集，蠱惑仔片成為潮流，好勁！
春：部戲咁收，當時我由蒲精變成為蠱惑仔代表人物，我哋雖然冇殺人放火做壞事，但被某大電子傳媒封殺，話我哋演呢啲角色教壞細路，臨時抽起我哋嘅工作。我梗係嬲啦，拍殺人戲真係殺過人咩？呢啲人真係白癡愚昧！
記：咁點解仲要接拍？
伊：唔拍就冇飯開，當時對自己前途好迷失，有人搵我拍戲梗係接啦，點知部戲咁收得，但無端端畀電台封殺，所以話世事無絕對，令我學識「隨遇而安」。
春：當時雖然好嬲，但我哋做細冇權話事，硬食！好彩部戲不停開續集，蠱惑仔片令我哋名利雙收。
伊：其實我有同小春傾過，不如「改邪歸正」原裝班底拍警匪片齊齊做警察，可惜各有各忙冇「的」起心肝實行。
春：雖然無緣一齊拍部警匪片洗底，但今年初終於齊集「洪興」所有兄弟聚埋食咗餐飯，十幾年第一次齊人，連隱居嘅阿棠（朱永棠）都蒲頭，好感動，我開心到喊咗出嚟！
兩個十足大細路。
「蠱惑仔」變「蠱惑佬」
伊健和小春由蠱惑仔變蠱惑佬在《飛砂風中轉》重逢，監製麥兆輝特別為製造驚喜，故意不讓他們知道另一主角是誰，開鏡前安排劇組和演員吃飯聯誼，當伊健看見小春時，那個老友重逢的表情抵上千言萬語。
春：依家叫我哋拍蠱惑仔題材電影，感覺就係清朝咁耐嘅事，曾經想過唔拍，但當我見到伊健，拍，唔使諗！
伊：都係因為小春有份我先肯接，我哋唔係成日見面，但好了解。加上部戲唔係傳統江湖片，打生打死為咗推莊唔做龍頭大佬，而且絕對港產片。
春：近年拍嘅戲，好耐冇試過咁大班人一齊開工，所以日日都好期待開工。每個角色都好有驚喜，好似藍亦邦外表係書生，點知劈友咁狠。另一個係安安姐（余安安），03年佢復出我同佢合拍電影《絕種鐵金剛》，當時佢已經好索，今次合作，佢咁索爆我真係「O」晒嘴。
記：你同葉璇戲中好火辣喎，又攬又錫仲揸下體添，婚前最後一擊？
春：因為要大特寫艇姐（葉璇）揸落嚟，道具手足事先準備「缽仔糕」畀我保護小小春，但係黐立立我改攝布碎。係咪好威武呢？
伊：你話係真身都冇人質疑啦！
春：咁又唔可以講大話，墊咗真係勁啲。
鄭伊健：我一早做定人情啦！ （設計對白）
陳小春：我擺酒實預你！（設計對白）
「老婆女友」硬撼「好兄弟」
剛於情人節告別「王老五」生涯的小春，伊健自誇早知這個happy ending，他亦唯一帶過邵美琪給小春「過目」，因為她是小春的超級粉絲。
伊：小春咁多年嚟，惟獨一次煞有介事向我介紹身邊嗰位女朋友，所以我好肯定呢位一定係真命天「女」，畀佢爬頭又有乜所謂。
記：咁幾時到你結婚？
伊：唔知喎，隨緣啦。
記：女友重要還是兄弟重要？
伊：我哋比任何一個女朋友識得耐，感情亦深厚得多，冇女仔可以取代我哋之間嘅感情和關係。但係小春，點解你一早通知我美國結婚，仲叫我搞簽證，搞好晒突然叫我唔好去呢？
春：真係一言難盡。今次去美國，好多女家嘅親戚我都係第一次見，我好擔心到時照顧唔到班兄弟同你。謝天華要去美國做騷順道出席。放心，香港擺酒預咗你！
採訪：李慧盈
攝影：黎志輝
化妝：Vincci Wu（小春） Hetty Kwong（伊健）
髮型：Beijing Hair Culture（小春） Alex Wu（伊健）
場地：Eutopos Cafe
留言列表
