Hanvon Touchpad BC10C 多點篤贏 iPad @ 明星靚相大分享☆

今期iPad玩晒，唔想買水貨畀人劏，又唔知等到幾時先有香港行貨，不如諗吓新上場嘅Hanvon Touchpad（型號BC10C）。Touchpad係市場第一部對應Multi-Touch嘅平板電腦，一隻手就可以完全控制所有操作，而且用番大家熟悉嘅Windows 7操作系統，上網、娛樂或者工作都冇難度！

Hanvon Touchpad BC10C係市場第一部Multi-Touch Tablet PC。售價：$5,999

規格一如筆記簿

雖然從產品定位去睇，Hanvon Touchpad跟iPad有啲唔同，不過由於同樣係10吋左右多點式觸控（Multi-Touch）屏幕，兼且尺寸差唔多，難免會將兩者拎嚟比較。Touchpad其實係一部具備Multi-Touch功能嘅PC，採用嘅硬件同CULV平台筆記簿電腦差唔多，如內置Intel CULV 743（1.3GHz）處理器、2GB記憶體及250GB硬碟，而且Windows 7已支援Multi-Touch功能，比起iPad實用性更高。

中文手寫輸入強勁

始終係手提Gadget，尺寸大小及操控性非常緊要，在這些方面Touchpad亦不見得有任何不足。採用無鍵盤窄邊框設計，黑色機殼更是鋁合金製造，手感唔錯；而且厚度僅有18.4mm，重量亦得960g，比起尺寸相近嘅Netbook都要輕薄，每日外帶使用相當方便。機身不設鍵盤，要輸入文字可拉出虛擬鍵盤點選；另外，Hanvon中文手寫輸入產品非常有名，今次更將廠方最強嘅手寫識別同埋筆迹輸入放到機上，認字又快又準，抵讚，比起iPad輸入唔到繁體中文當然有優勢。

擴充性能充足，可接駁VGA或HDMI輸出。

可以直接手指指在畫面寫Memo，方便。

周邊功能齊

Touchpad嘅10.1吋Multi-Touch多點式觸控顯示屏用上LED背燈系統，畫面顯示有水準；而且用手指在畫面上將圖像放大、縮細、旋轉或轉下頁，操作都幾暢順。如果唔習慣任何操作都用手指篤的話，顯示屏右下方附設方向鈕，可移游標選取唔同應用程式。周邊功能都算齊全，內置130萬像素視像鏡頭、802.11 b/g無線網絡、藍芽同埋支援VGA及HDMI輸出嘅miniHDMI介面，不過不設3G連線，想上網就一定要用Wi-Fi。作為第一代產品，Touchpad整體操作令人滿意，但如果機身可以自動感應到直度或橫度方向顯示畫面就更好。

內置130萬像素視像鏡頭，自拍定視像會議都用得着。