國美（0493）終極一戰，今個月尾股東特別大會將來個了斷，大股東黃光裕和現任主席陳曉不斷發動傳媒戰，你黃光裕話唔係針對貝恩基金，趕走陳曉後會將私人持有嗰幾百間國美注入上市公司；陳曉就話自己管理國美做到業績幾咁亮麗，又話獲逾半股東支持，好似勝券在握。

陳曉早前就透過國美發言人，向外話獲得持股量達百分之四十二嘅機構投資者支持；言下之意係支持票已遠超過黃光裕嘅百分之三十五權益，若再加上貝恩近一成股權，即係話自己贏硬。

一言就估，若然陳曉咁有信心，唔需要向外大肆公告，高調宣揚，就係希望可以影響游離股東嘅取向；試想想，若你坐定粒六，仲使乜要打口水戰，咪任得你黃光裕做騷囉！

陳曉（左）好似好老定，但黃光裕（右）都唔係善類，一日未投票，都唔知鹿死誰手。

基金經理兩面都是人

據知情人士講，不論陳曉或黃光裕，雙方都冇必勝把握，大家都向啲基金進行游說工作。之但係啲基金點應對呢，今日你黃光裕代表嚟傾，咪話支持你黃大哥；明天陳曉陣營到訪，又話陳曉你管國美管得咁掂，仲使講，梗係投你神聖一票喇。總之就係兩面都是人，永遠唔得失一方，至於最終點投票，就要最後先揭曉。

近期雖然有獨立顧問力撐陳曉，而部分基金一般亦係睇呢啲獨立顧問建議投票；但有一點，機構投資者仲喺度考慮，就係黃光裕一旦輸咗，國美往後會點呢？事實上，黃光裕仲揸三成多股權，對公司有相當影響力，即使今次輸咗，未能重奪控制權，以佢打不死性格，必然會諗唔同方法去搞你國美，往後幾年怕且國美董事會都好煩。

基金好識做人，既話支持陳曉，又答應支持黃光裕。

David Webb講法好吊詭

獨立股評人David Webb早前都公開支持陳曉，佢話各位股東，你想將間公司交畀個監躉，抑或交畀個做到成績嘅管理層？佢就當然係投國美現董事會票。不過，最吊詭係一方面就話反對炒陳曉及黃光裕委任親信議案，但另一方面就唔贊成國美增發百分之二十新股嘅一般授權。

你諗吓，若然支持陳曉，就應該支持通過一般授權，以後國美可以透過增發新股，藉以攤薄黃光裕股權，從而逐漸將黃光裕影響力削弱，以免佢三天兩日唔埋，就諗方法搞吓國美。當然，一言都明白，David Webb一向唔支持增發股份的一般授權，所以縱然有矛盾，都要捍衛自己信念，唔違背原則，之但係其他股東就要諗清楚箇中問題。

David Webb叫人支持陳曉，但就唔贊成增發兩成新股嘅一般授權。

邱德根與胡仙的一段緣

邱德根與胡仙有緣無份？

近日邱德根孻仔邱達根，即遠東控股（0036）董事總經理，喺未得獨立股東批准，就將公司內六千一百萬借畀父親，雖然有支付利息，最後亦悉數清還，但畢竟違規，因而被控訴。事件公布後，大房二仔邱達昌即時劃清界線，辭任遠控非執董一職。

事件引出豪門不和，據報道話當年老邱娶妻子裘錦秋妹妹裘錦蘭時，元配啲仔女好唔開心。一言聽過段傳聞，當年老邱跟胡文虎養女胡仙亦頗投契，曾諗過跟胡小姐有進一步發展；但佢諗，畢竟自己跟裘錦秋有五個仔女，胡小姐是否喜歡很難說。相反，妻子妹妹對自己子女一向相當好，若跟裘錦蘭結婚，肯定會善待元配所出，左思右想下，終決定娶錦蘭為妻。

莎莎郭少明做霍建寧鄰居

自由行喺○三年實行以來，最受惠嘅公司之一肯定係莎莎化妝（0178），老闆郭少明賺到盤滿缽滿，自然捨得使錢；佢最近秘密入市，斥資三億銀購入舂磡角道屋地，並且將舊屋拆卸，計劃興建三層高的孖屋。

呢塊地唔嘢小，原先由菲律賓首富陳永裁間裕景興業持有，○六年由豐泰投資朱惠德以一億三千萬購入，最近透過公司轉讓賣畀郭少明。塊地附近洋房主人非富則貴，和黃（0013）大班霍建寧都係住隔籬，郭少明好快就跟霍大班做鄰居。

朱惠德跟郭少明好有淵源，朱先生喺九十年代投資莎莎，九六年莎莎上市，幕後軍師就係朱惠德。之後老朱專投資地產，今次賣畀郭少明間屋，四年就賺咗一億七千萬元，回報高達一點三倍。朱生最近大作就係收購中央樓，總投資三十八億元。

郭少明愈住愈豪，今次搬去跟霍大班做鄰居。