Motorola Quench XT5 借殼上市－明星靚相大分享☆

廠商出新手機，大多數會換換外形，等用家有多啲新鮮感；但話分兩頭說，即使個款冇變，亦唔代表產品冇改進，好似iPhone 3GS就係一個好例子。今次Motorola推出的Quench XT3後繼機XT5，兩部機外形似足孖生兄弟，不過內在機能就大升級，雖然話舊瓶新酒，但感覺煥然一新！要數XT5最大嘅變動，一定係由上一代嘅Android 1.6平台升級至2.1版，手機速度、反應都大幅提升，鏡頭亦由320萬像素升呢至500萬像素，但售價只是$2,580，絕對實用又抵玩。

升級2.1 操作流暢

Android手機愈嚟愈普及，而且各間大廠同時發力，做到高中低階都有大把選擇，擴闊用家群。不過先前大部分入門級Android手機都係採用Android 1.6平台，操作未算流暢。雖然今次Quench XT5都係走入門路線，不過就將平台升級到2.1版，加上512MB ROM、256MB RAM，即使只係內置咗600MHz處理器，操作都勁流暢，抵讚！另外，XT5支援「Pinch and Zoom」功能，簡單啲講就係多點觸控，配合3.2吋HVGA電容式屏幕，睇相換頁夠爽快！

支援最高32GB microSD記憶卡，而且可作熱插拔，方便！

機底備有喇叭，聲量夠大！

驟眼睇以為係Quench XT3，不過XT3用炭灰色機面，而XT5則改用黑色為主色，十足十孖生兄弟。

5MP鏡頭影相夠照

上一代Quench XT3鏡頭只得320萬像素，今時今日實在唔夠用。XT5就順應潮流，將鏡頭像素大幅提升至500萬，足夠用嚟沖曬8R靚相，可惜Motorola未有為拍攝介面作出優化，只有白平衡、曝光補償等簡單的拍攝功能，好在機身設有拍攝鍵，方便用家一按即影。小記於室內試拍，發現對焦準確，不過雜訊頗多，幸好XT5備有LED閃燈，即使在昏暗環境下仍可以影餐飽。

備有500萬像素鏡頭加LED閃光燈，而且機背加入不少坑紋以防跣手。

隨機附送兩款mi adidas機背，畀你幫部Quench XT5換衫！

支援最多7個頁面，夠晒位擺Widgets。

mi adidas 換殼冧女生

Quench XT5外形勝在夠薄，只有12.4mm，女仔攞上手都唔覺太大部，但係黑黑實實女生又點會鍾意，所以今次Motorola就好有心思咁搵黎adidas合作，推出兩款mi adidas機殼，隨機附送粉紅同白色機背，換咗上去成部機即刻Lady晒！不過男士們亦都唔使失望，因為原裝的黑色機背亦有所改良，加入更多坑紋防跣手，手感不俗。另外，XT5保留XT3嘅Trackball，就算男仔手指頭較粗都可以控制自如，啱晒唔鍾意在屏幕左Drag右Drag嘅朋友。