米芝蓮一盅兩件新登場推介－明星靚相大分享☆

12月初，米芝蓮公布《米芝蓮指南香港澳門2011》食肆名單，今年一共有257間店上榜，平民到高級食肆都有，相對上普羅大眾最花得起食的，就是十元八塊的一盅兩件，今次就介紹幾間摘星食肆的新款點心，仲有名咀食神等人推介，為你揀出米芝蓮點心之最。

又一平民點心
一點心
今年除了添好運這平民點心店獲一星之外，新加入的還有一點心。它比添好運早約3年開業，沒有酒店級師傅後台，店內大部分師傅出身自舊式大酒樓如麗宮及好彩，師傅們直認「同出面整嘅方法都冇咩分別」，贏的就憑用料新鮮，如最受歡迎的點心包括牛肉、蝦餃、燒賣及古法馬拉糕，每日只準備70 至100籠不等，即叫即蒸，售罄即止。店內超過40款點心以傳統款式為主，叉燒包日賣過千，日日鮮製，最便宜的$10有交易，難怪深得街坊支持，早在摘星前已常見人龍。摘星後每日多達600人光顧，周末需排隊近一小時才能進內，由於附近是酒吧及球場，宵夜時段也多人，必要時要同酒鬼及打完波一身臭汗的人迫埋食，地方細細，將就下啦！

醒你排隊tips
1 2點前及晚上7至9點期間最多人
2 沒有電話訂座
3 拎了籌可放心逛街，因為叫了飛只要沒有逾時過一小時都可以入。
4 未齊人也可以入，叫老豆開定位先啦。

一點心
太子運動場道15號京華大廈地下1-2號鋪（2789 2280）
營業：星期一至五11am-1am、星期六及日10am-1am

特首都去　添好運
去年獲米芝蓮一星的旺角添好運點心專門店，今年不但再度上榜，就連今年5月開業的深水埗分店，亦獲米芝蓮一星評級。證明了當年老闆兼總廚麥桂培（培哥）從四季酒店除下三粒星的光環，走落凡間的路是沒有錯。旺角的添好運門外無時無刻都見人龍，分店有兩層又大間，估唔到仍然要等位，就連特首煲呔曾上星期也帶同太太一起到此店用餐，更把食相上載面書同微博，風頭一時無兩。
煲呔推介的當然係大家熟悉的酥皮叉燒包，不過培哥最近又再推出了幾款新點心，包你試過直豎拇指！今次出品嘅再唔齋係傳統點心，有用上鵝肝醬、雪蛤膏等酒店級特別材料，食物能媲美四季酒店，功架keep住水準。事先張揚，明年4月添好運會在中環開鋪，望穿秋水的香港區市民，終於唔使過海都可以去添好運嘆茶喇！

醒你排隊tips
1 深水埗分店比總店更多規矩，逾時5個no.要再拎飛輪過
2 要等人齊先可以入
3 周末無時無刻都多人，平日3pm-6pm最少人
4 私房點心要在一星期前訂位，點心每位上
5 四周沒有商場及潮店，iphone請叉足電等位

添好運點心專門店
深水埗福榮街9-11號地下（2788 1226）
營業：8am-9:30pm
＊太子地鐵站（A出口）

Fusion點心最靚
國金軒
國金軒ifc店大廚劉師傅過檔滿福樓後，該店立即跌出米芝蓮之列。不過今年新開的美麗華國金軒深獲好評，一上榜就得到兩星評價，為國金軒這個品牌保住面子！國金軒新任行政總廚余偉經師傅最新帶來一系列點心，款款令人很驚嘆！當創意點心端來的時候，你會好似食緊一餐高級fusion西餐咁，present得勁精緻，絕對係一次新的點心經驗。

醒你排隊tips
1 預早1星期前訂位
2 Lunch時段想walk in，一定要在11:30am開始等位
3 用中銀、滙豐、東亞、星展、永亨、恒生的白金咭簽賬，食物9折

國金軒
尖沙咀彌敦道118號The Mira 3樓 (2315 5222)
營業：星期一至六11:30am-2:30pm、6pm-10pm；星期日10:30am-3pm、6pm-10pm

平均消費$200有找3星之選
新同樂
就在國金軒對面的新同樂，於跑馬地開業40多年，但從未得到米芝蓮推薦。直至搬到美麗華商場，經過評審8次試食，終成為唯一一間不設在酒店的三星食肆，「一係唔拎，一拎就拎三星」！訪問期間食店的電話響個不停，由於檯與檯之間的距離好闊落，圍數不多，座位有限，自入選後客人都要在兩星期前訂位，每日都好爆棚。抵讚嘅係這裏有卡位，坐得舒服，夥計服務好好，試過一次過點了過多食物，夥計主動提醒減量，不會為了賺錢造成浪費。點心做得好特別，以為精緻又三星，埋單一定唔平，誰不知每人唔使$200，好飽抵到暈！

醒你排隊tips
1 需約兩星期前致電訂位
2 想walk in食，下午2:30pm最大機會，但3pm截單，要食得快。

新同樂
尖沙咀美麗華商場4樓（2152 1417）
營業：11:30am-3pm、6pm-11pm

口碑燒賣
燒賣每日限量約80籠，齋睇都雙眼發光好吸引，食落蝦及肉味出眾。$14